ބާލިން (ޖެނުއަރީ 15) - ޖަރުމަނު ލީގުގައި ރޭ އާލިން ބްރައުޓް ހާލަންޑްގެ ދެ ގޯލާ އެކު 5-1 އިން ފްރެއިބާގް ބަލިކޮށް ބޮރޫޝިއާ ޑޯޓްމަންޑުން ލީގުގެ އެއް ވަނައިގައި އޮތް ބަޔާން މިއުނިކާ ދެމެދު ފަރަގު ކުޑަކޮށްފި އެވެ.
ބަޔާން މި ވަގުތު އެއް ވަނައިގައި އޮތީ 18 މެޗުން 43 ޕޮއިންޓާ އެކު އެވެ. ރޭގެ މޮޅާ އެކު ޑޯޓްމަންޑުން ވަނީ 19 މެޗުން 40 ޕޮއިންޓް ހޯދައިފަ އެވެ. ތިން ވަނައިގައި އޮތް ހޮފެންހައިމަށް 18 މެޗުން ވަނީ 31 ޕޮއިންޓް ލިބިފަ އެވެ. މިއަދު ކޮލޯނާ ދެކޮޅަށް ކުޅޭ މެޗުން މޮޅުވެ، ބަޔާނަށް އަލުން ހަ ޕޮއިންޓަށް ލީޑުފުޅާކުރެވޭނެ އެވެ.
ޑޯޓްމަންޑް ދަނޑުގައި ކުޅުނު ރޭގެ މެޗުގެ ފުރަތަމަ 30 މިނިޓްގައި ޑޯޓްމަންޑުން ދެ ގޯލުގެ ލީޑެއް ނެގިއިރު، މި ދެ ގޯލު ވެސް ޖެހީ ބެލްޖިއަމްގެ ފުލްބެކް ތޯމަސް މޮނިއޭ އެވެ. މެޗުގެ 14 އާއި 29 ވަނަ މިނިޓްގައި މޮނިއޭ މި ގޯލުތައް ޖެހިއިރު، ދެ ގޯލަށް ވެސް ފުރުސަތު ތަނަވަސްކޮށްދިނީ އެ ޓީމަށް ކުޅޭ ޖަރުމަނު ގައުމީ ޓީމުގެ ވިންގް ހޫލިއަން ބްރަންްޑްޓް އެވެ.
ފުރަތަމަ ހާފު ނިމުމުގެ ކުރިން ހާލަންޑް ވަނީ ޑޯޓްމަންޑްގެ ތިން ވަނަ ގޯލު ޖަަހައިފަ އެވެ. ކުޅުން ރަނގަޅުކޮށް، ފްރެއިބާގުން ގޯލެއް ޖަަހަން ކުރި މަސައްކަތް މެޗުގެ 61 ވަނަ މިނިޓްގައި ކާމިޔާބުކުރި އެވެ. އެ ޓީމުގެ ގޯލު ޖެހީ އެރްމެޑިން ޑެމިރޯވިޗް އެވެ.
ހާލަންޑް، ޑޯޓްމަންޑްގެ ހަތަރު ވަނަ ގޯލު ޖެހީ މެޗުގެ 75 ވަނަ މިނިޓްގަ އެވެ. މަހުމޫދު ދާހޫދު ދިން ބޯޅައަކުން ހާލަންޑް ޖެހި މި ގޯލާ އެކު އޭނާގެ ލަނޑުގެ ރެކޯޑަކީ ޖަރުމަނު ލީގުގައި ކުޅުނު 56 މެޗުން 55 ގޯލެވެ. ޖުމްލަ އެކު ޑޯޓްމަންޑަށް ކުޅުނު 77 މެޗުން 78 ގޯލެވެ. ޑޯޓްމަންޑްގެ ފަހު ގޯލު ޖެހީ މެޗުގައި މޮޅު ކުޅުމެއް ދެއްކި ދާހޫދެވެ.
