އިންޑިއާ އައުޓްގެ ނަމުގައި ކުރީގެ ރައީސް އަބްދުﷲ ޔާމީން އިސްވެ ހުންނަވައި ހިންގަވާ ކެމްޕެއިނަކީ ރައްޔިތުންގެ ޝުއޫރުތަކާ ކުޅެގެން ހިންގާ ނޭއްގާނީ ހަރަކާތެއް ކަމަށް އަދާލަތު ޕާޓީން ބުނެފި އެވެ.
ރާއްޖެ އާއި އިންޑިއާއާއެކު މިހާރު ހަދާފައިވާ އަސްކަރީ އެއްބަސްވުންތަކުގެ ސަބަބުން ޕީޕީއެމް އާއި ޕީއެންސީން ބުނާއިރު، އާދަލަތު ޕާޓީން ރޭ ނެރުނު ބަޔާނެއްގައި ބުނެފައިވަނީ އެ ޕާޓީ ބައިވެރިވާ ސަރުކާރެއްގައި ދިވެހިންގެ މިނިވަންކަމާއި ސިޔާދަތާއި އިސްތިގުލާލަށް ލޮޅުމެއް އަތުވެދާނެ އަތުވެދާނެ އެއްވެސް ކަމަކަށް ފުރުސަތު ނުދޭނެ ކަމަށެވެ.
ރާއްޖެ-އިންޑިއާ ގުޅިގެން މިހާރު ހިނގާ ބައެއް ކަންކަމަކީ ޔާމީނުގެ ވެރިކަމުގައި ބިންގާ އަޅާފައިވާ ކަންކަން ކަމަށާއި އިންޑިއާ އައުޓްގެ ނަމުގައި އެ މަނިކުފާނު އިސްވެ ހުންނަވައި ހިންގަވާ ކެމްޕޭނަކީ ސިޔާސީ މަގުސަދެއްގައި ހިންގަވާ ހަރަކާތެއް ކަމަށް އަދާލަތު ޕާޓީން ބުނެ އެވެ.
"މިކަމުގެ ނަތީޖާއަކަށް ވާނީ ބައިނަލްއަގުވާމީ މަސްރަހުގައި ދިވެހީން އެކަހެރިވެ، ގައުމާއި ރައްޔިތުންނަށް ފޫނުބެދޭވަރުގެ ގެއްލުންވުމެވެ،" ބަޔާނުގައިވެ އެވެ.
އިންޑިއާ އުއުޓް ހަރަކާތުގައި ކުރީގެ ރައީސް ޔާމީން، ކ. ގުރައިދޫގައި ސަޕޯޓަރުންނާ ވާހަކަ ދައްކަވަނީ. -- ފޮޓޯ: ޕީޕީއެމް
ދިވެހިންގެ ކުރިއެރުމާއި ތަރައްގީއަށް އެހީތެރިވެދޭ ބައިވެރިންނާމެދު ހިތްތަކުގައި ނަފުރަތާއި ރުޅިވެރިކަން އުފެއްދުމަށް، ސިޔާސީ ބަޔަކު ކުރަމުންދާ މަސައްކަތް ކުށްވެރިކުރާ ކަމަށާއި، ވަކިން ހާއްސަކޮށް އަވަށްޓެރި އިންޑިއާ އާމެދު ދިވެހިންގެ ހިތްތަކުގައި ނަފުރަތު އުފެއްދުމަށް ޔާމީނު އިސްވެހުންނަވާ ކުރައްވަމުން ގެންދަވާ ޒިންމާދާރުކަން ކުޑަ ކަންކަމާމެދު ކަންބޮޑުވާ ކަމަށް އަދާލަތުގެ ބަޔާނުގައިވެ އެވެ.
ސަލާމަތާއި ވިޔަފާރީގެ ދާއިރާގައި އިންޑިއާ ކަނޑުގެ އަހަންމިއްޔަތުކަން އިތުރުވަމުން އަންނައިރު، އެ ކަނޑުގެ މަސްލަހަތު ހިމާޔަތްކުރުމަކީ ދިވެހި ހާރިޖީ ސިޔާސަތުގައި މުހިންމު ކަމެއް ކަމަށާއި ގުޅިލާމެހިފައިވާ ޒަމާނެއްގައި ބައިނަލްއަގުވާމީ މަސްރަހުގައި އެކަހެރިކަމާއި ވަކިވެގަތުން އިސްކުރުމަކީ ދިވެހިންނަށް އެންމެ މަސްލަހަތު ހުރި ގޮތް ނޫން ކަމަށް ބަޔާނުގައި ބުނެފައިވެ އެވެ.
ވަކިން ހާއްސަކޮށް ތަރައްގީ އާއި އެނޫންވެސް ދިވެހިން އެދޭ ދިރިއުޅުން ހާސިލުކުރުމަށްޓަކައި އަވަށްޓެރި ގައުމުތަކާއި އަދި ހެޔޮއެދޭ ގައުމުތަކާ ގުޅިގެން މަސައްކަތްކުރަން ޖެހޭ ދުވަސްވަރެއްގައި އަވަށްޓެރި ގައުމުތަކާއި ދުނިޔޭގެ އެހެން ގައުމުތަކާ ގުޅުންބަދަހިކުރަންޖެހޭ ކަމަކީ ގަބޫލުކުރަން ޖެހޭ ހަގީގަތެވެ،" އެ ބަޔާނުގައިވެ އެވެ.
އިންޑިއާއާއެކު މިހާރު ހަދާފައިވާ އެއްބަސްވުންތަކަށް ވާސިލުވުމުގެ އަސްލަކީ، ކުރީގެ ރައީސް އަބްދުﷲ ޔާމީންގެ ވެރިކަމުގައި 2016 ގައި އެކުލަވާލާފައިވާ އެކްޝަން ޕްލޭން ކަމާއި، އެ އެކްޝަން ޕްލޭންގައި ހިމެނޭ ކަންކަން ރާއްޖެއަށް މުހިންމު ކަމާއި ތަންފީޒުކުރުން ކުރިއަށް ގެންދިއުމަށް، ދެ ގައުމުގެ ބައްދުވުންތަކުގައި ކުރިން ފެށިގެން ވެސް އެދިފައިވާ ރައްޔިތުންގެ މަޖިލީހުގެ 241 ކޮމިޓީގައި ސިފައިން ވެސް އަދި އެ ކޮމިޓީގައި ތިއްބެވި އެމްޑީޕީގެ މެމްބަރުން ވިދާޅުވެފައިވެ އެވެ.
އެ އެއްބަސްވުންތަކުގެ ސަބަބުން ރާއްޖޭގެ ގައުމީ ސަލާމަތާއި މިނިވަން ކަމަށް އެއްވެސް ގެއްލުމެއް ނެތް ކަމަށް، އެމްޑީޕީގެ މެޖޯރިޓީ އޮތް ރައްޔިތުންގެ މަޖިލީހުން ވަނީ ފާސްކޮށްފަ އެވެ.
އިންޑިއާ އާއި ރާއްޖެއާ ދެމެދު އޮންނަ ގާތް ގުޅުމާމެދު ސުވާލު އުފައްދައި އެ ގުޅުމުގެ ސަބަބުން ރާއްޖޭގެ މިނިވަންކަމާއި އިސްތިގުލާލަށް ނުރައްކާވާކަމަށް ބުނެ ދޮގު މައުލޫމާތު ފަތުރާތީ ދިވެހި ސަރުކާރުން ވަނީ ކަންބޮޑުވުން ފާޅުކޮށްފަ އެވެ.
"އިންޑިއާ އައުޓް" ހަރަކާތް އެ ގޮތުގައި ހިންގިގެން ނުވާނެ ކަމަށާއި އެކަން ފުލުހުން ނުކުމެ ހުއްޓުވުމަށް ކުރީގެ ރައީސް މުހައްމަދު ނަޝީދު ވިދާޅުވެފައި ވާއިރު، އެމްއެންޕީ ރައީސް ދަނގެތީ ދާއިރާގެ މެމްބަރު މުހައްމަދު ނާޒިމް ވިދާޅުވެފައި ވަނީ ގައުމީ ހަރަކާތެއްގެ ގޮތުގައި ކަމަށް ބުނެ އިދިކޮޅުން ކުރިއަށް ގެންދާ "އިންޑިއާ އައުޓް" ކެމްޕޭނަކީ ބޮޑު ޖަރީމާއެއް ކަމަށެވެ.
"މިއީ ވަކި ބޭފުޅަކު އެ ބޭފުޅަކު އެ ބޭފުޅެއްގެ ސަރުކާރުގަ ހިނގާފަ ހުރި އެކި ކަންކަން ފޮރުވައި މަތި އަޅަން ހިންގާ ކެމްޕޭނެއް،" ކުރީގެ ޑިފެންސް މިނިސްޓަރު ނާޒިމް ވިދާޅުވި އެވެ.
