މެންޗެސްޓާ (ނޮވެމްބަރު 6) - އިނގިރޭސި ޕްރިމިއާ ލީގުގައި މިރޭ އަމިއްލަ ދަނޑުގައި މެންޗެސްޓާ ސިޓީ އަތުން 2-0 އިން ބަލިވެ، މެންޗެސްޓާ ޔުނައިޓެޑްގެ ދަށް ރެކޯޑް ދިގުލައިފި އެވެ.
މި ނަތީޖާއާ އެކު ޔުނައިޓެޑް ވަނީ 1989 ވަނަ އަހަރަށް ފަހު ފުރަތަމަ ފަަހަރަށް އެއް އަހަރު ތެރޭ އަށް ލީގު މެޗާއި އަށް ކަޕް މެޗުން ބަލިވެފަ އެވެ. އަދި ޔުނައިޓެޑުން އެންމެ ފަހުން އަމިއްލަ ދަނޑުގައި ކުޅުނު 14 މެޗުގައި ވެސް ކްލީންޝީޓެއް (ބައިކޮޅަށް ލަނޑެއް ނުވަދެ ނިންމާލެވިފައިނުވާއިރު) ނުލިބި ނިންމާލިއިރު، މިއީ 1964 ވަނަ އަހަރަށް ފަހު އެ ޓީމުން އަމިއްލަ ދަނޑުގައި ކުރިމަތިލާން ޖެހިފައިވާ އެންމެ ދަށް ޑިފެންސިވް ރެކޯޑެވެ.
އެންމެ ފަހުން ޔުނައިޓެޑް އަމިއްލަ ދަނޑުގައި ލީގުގައި ކުޅުނު ހަތަރު މެޗުން ވެސް މޮޅުވެފައިނުވެ އެވެ. އެވަޓަންއާ 1-1 އިން އެއްވަރުވިއިރު، އެސްޓަން ވިލާ އަތުން 1-0 އިން ވަނީ ބަލިވެފަ އެވެ. ލިވަޕޫލް އަތުން 5-0 އިން ބަލިވިއިރު، މިއަދު ސިޓީން ވެސް މި ވަނީ ޔުނައިޓެޑް ބަލިކޮށްފަ އެވެ.
ސިޓީން މިހާތަނަށް ވަނީ ޕްރިމިއާ ލީގުގައި ޔުނައިޓެޑް ދަނޑުގައި އަށް މެޗުން މޮޅުވެފަ އެވެ. ރަށުންބޭރުގައި ސިޓީގެ އެންމެ ރަނގަޅު ރެކޯޑެއް އޮތީ ޔުނައިޓެޑް ދަނޑުގަ އެވެ.
މިރޭގެ މެޗުގެ ތެރެއިން ސިޓީގެ ކުޅުންތެރިން އުފާފާޅުކުރާއިރު ޔުނައިޓެޑްގެ ރޮނާލްޑޯ ހުއްޓިގެން.
އަނިޔާގެ ސަބަބުން ރަފައެލް ވަރާން ނުލައި ޔުނައިޓެޑުން ކުޅުނުއިރު، ސަސްޕެންޝަންގެ ސަބަބުން އެ ޓީމުގެ ޕަައުލް ޕޮގްބާ ވެސް ހުރީ ކުޅުމާ ދުރުގަ އެވެ.
ޔުނައިޓެޑުން މިރޭގެ މެޗު ފަށަން ޖެހުނީ ވެސް ބޭނުންވި ގޮތަކަށް ނޫނެވެ. މެޗުގެ ހަތް ވަނަ މިނިޓްގައި ސިޓީން ލީޑުނެގީ ޔުނައިޓެޑްގެ އައިވަރީ ކޯސްޓް ޑިފެންޑަރު، އެރިކް ބައީ އަތުން ބައިކޮޅަށް ވަން ގޯލުންނެވެ. ސިޓީގެ ޔާއޯ ކަންސޭލޯ ނެގި ހުރަހެއް ދިފާއުކުރަން އުޅުމުގެ ތެރޭގައި ބައީ ފައިން ފޮނުވާލި ބޯޅަ ވަނީ ބައިކޮޅަށެވެ.
އޭގެ ފަހުން ސިޓީން ވަނީ ފުލުފުލުގައި ޔުނައިޓެޑްގެ ގޯލަށް ނުރާއްކާތެރި ހަމަލާތަކެއް ފޮނުވާލައިފަ އެވެ. އެ ހުރިހާ ބޯޅައެއް ހުއްޓުވުމުގައި ޔުނައިޓެޑްގެ ގޯލްކީޕަރު ޑޭވިޑް ޑެހެއާ ވަނީ މޮޅު ކުޅުމެއް ދައްކައިފަ އެވެ. ޔުނައިޓެޑުން ވެސް މަޑުމަޑުން އެޓޭކްކޮށް މެޗުގެ ތެރެއަށް ވަންނަން މަސައްކަތްކުރިއިރު، އޭރިއާތެރެއިން ޔުނައިޓެޑްގެ ކްރިސްޓިއާނޯ ރޮނާލްޑޯ ޖެހި ބޯޅަ ސިޓީގެ ކީޕަރު އެޑަސަން މޮރާއޭސް ވަނީ މަތަކޮށްފަ އެވެ.
ސިލްވާ ގޯލު ޖެހުމުން ޑެހެއާ ހިތްހަމަނުޖެހިފައި.-- ފޮޓޯ: އޭއެފްޕީ
ފުރަތަމަ ހާފުގެ އިތުރު ވަގުތުގައި ސިޓީން ދެ ވަނަ ގޯލެއް ޖެހިއިރު، މި ގޯލުގައި ޑެހެއާގެ މިސްޓޭކް ފެނުނެވެ. ކަންސޭލޯ ނެގި ހުރަސް ރޮނގުކައިރިން ބެނާޑޯ ސިލްވާ މަޑުމަޑުން ފޮނުވާލި ބޯޅަ ދިފާއުކުރަން ޑެހެއާ ނެގި އަތުގައި ޖެހިފައި ބޯޅަ ވަނީ ގޯލުގެ ކަނަށެވެ.
ޔުނައިޓެޑުން ބަދަލުތަކެއް ގެނެސްގެން ދެ ވަނަ ހާފުގައި ގޯލެއް ޖަހައި ޓީމުގެ ހާލަތު ރަނގަޅުކުރަން ގިނަ ގޮތްގޮތުން ބެލި ނަމަވެސް އޭގެ އެއްވެސް ފައިދާއެއް ނުފެނުނެވެ.
އަނެއްކޮޅުން ލީޑުފުޅާކުރަން ސިޓީ އަށް ވެސް ލަނޑު ޖަހަން ލިބުނު ފުރުސަތު އެ ޓީމުގެ ކުޅުންތެރިން ވަނީ ނަގާލައިފަ އެވެ. ސިޓީގެ ޒުވާން ވިންގް، ފިލް ފޯޑެން އަށް ހުސްކޮށް ލިބުނު ފުރުސަތަކުން އޭނާ ޖެހި ބޯޅަ ދިޔައީ އަރިމަތިން ބޭރުންނެވެ.
މި މޮޅާ އެކު ސިޓީ ވަނީ ލީގުގެ ދެ ވަަނަ އަށް ޖެހިލައިފަ އެވެ. އެއީ 11 މެޗުން 23 ޕޮއިންޓް ހޯދައިގެންނެވެ. ދެ ވަނައިގައި ކުރިން އޮތް ލިވަޕޫލަށް 10 މެޗުން 22 ޕޮއިންޓް ލިބިފައިވާއިރު، މާދަމާރޭ ރަށުންބޭރުގައި ވެސްޓް ހޭމް ޔުނައިޓެޑް އަތުން ބަލިނުވެ ފަރުޖައްސާލައިގެން ވެސް ލިވަޕޫލަށް އަލުން ދެ ވަނަ އަށް އެރޭނެ އެވެ.
ޔުނައިޓެޑްގެ ކޯޗު އޮލެ ގުނަ ސޯލްޝެއާ އަށް ޕްރެޝަރު ބޮޑުވެފައިވާއިރު، އެ ޓީމު އޮތީ 11 މެޗުން 17 ޕޮއިންޓާ އެކު ލީގުގެ ފަސް ވަނައިގަ އެވެ. އެކަމަކު، މި ހަފްތާގެ މެޗުތައް ނިމޭ ގޮތަކުން ޔުނައިޓެޑް އިތުރަށް ފަހަތަށް ވެއްޓުމުގެ ފުރުސަތު އެބައޮތެވެ.
