އިންޑޮނޭޝިއާގެ އަސްކަރީ ސަބްމެރީނެއް 53 މީހުންނާ އެކު ގެއްލިފައިވާ ކަމަށް އެ ގައުމުން ބުނެފި އެވެ.
އެ ސަބްމެރީން ގެއްލުނީ ބާލީގެ އުތުރުން އަސްކަރީ ތަމްރީނެއް ކުރިއަށް ގެންދަނިކޮށެވެ. "ކޭއާރްއައި ނަންގަލަ-402" ސަބްމެރީން ހޯދަން އަސްކަރީ މަނަވަރުތަކުން މިހާރު ދަނީ މަސައްކަތް ކުރަމުންނެވެ.
އިންޑޮނޭޝިއާއިން ވަނީ ސަބްމެރީން ހޯދުމުގެ މަސައްކަތުގައި އޮސްޓްރޭލިއާ އާއި ސިންގަޕޫރުގެ އެހީއަށް އެދިފަ އެވެ. ނަމަވެސް އެ ގައުމުތަކުން މިހާތަނަށް ވަކި އެއްޗެއް ނުބުނެ އެވެ.
ގެއްލުނު ސަބްމެރީންނަކީ ޖަރުމަނުގައި އުފެއްދި އެއްޗެކެވެ. އޭތި ގެއްލިފައިވަނީ ބާލީގެ އައްސޭރިފަށާ 100 ވަރަކަށް ކިލޯމީޓަރު ދުރުން ވަރަށް ފުން ހިސާބަކަށެވެ.
ބައެއް ރިޕޯޓުތައް ބުނާ ގޮތުން ސަބްމެރިންނާ ގުޅުން ކެނޑުނީ ފުނަށް ޑައިވް ކުރުމުގެ ހުއްދަ ދިން ފަހުންނެވެ. އެއީ އިންޑޮނޭޝިއާގެ އަސްކަރިއްޔާއިން ދުއްވާ ފަސް ސަބްމެރީންގެ ތެރެއިން އެކައްޗެވެ.
މީގެ ކުރިން ވެސް އަސްކަރީ ސަބްމެރީން ގެއްލުމުގެ ހާދިސާތައް ހިނގާފައި ވެއެވެ. އެގޮތުން 2017 ވަނަ އަހަރު 44 މީހުންނާ އެކު ގެއްލުނު އާޖެންޓީނާގެ ސަބްމެރިންނެއް ފެނުނީ އޭގެ އެއް އަހަރު ފަހުން ގޮވާފައި އޮއްވަ އެވެ. ނަމަވެސް މިއީ އިންޑޮނޭޝިއާގައި ސަބްމެރިންނެއް ގެއްލުނު ފުރަތަމަ ފަހަރެވެ.
