ސިންގަޕޫރު (ނޮވެމްބަރު 15) - ބައިނަލްއަގުވާމީ އެކުވެރިކަމުގެ މެޗެއްގައި ޖަޕާން އަތުން ފަހު ވަގުތު 3-2 އިން ބްރެޒިލް ބަލިވި މެޗުގައި އެ ޓީމުގެ ކެޕްޓަން، ރަފީނިއާ އާއި ކޯޗު، ކާލޯ އަންޗެލޮޓީ އަށް ރަތް ކާޑެއް ދައްކައިފި އެވެ.
އަންޗެލޮޓީ އާއި ރަފީނިއާ އަށް ރަތެއް ދެއްކީ އިތުރު ވަގުތުގެ ފުރަތަމަ މިނިޓްގައި ޖަޕާނުން ލަނޑު ޖަހައި މޮޅުވިއިރު، އެ ލަނޑު ޖެހުމުގެ ކުރިން ފައުލެއް ކުރި ކަމަށް ކުރި އެޕީލްތަކުގެ ތެރެއިން ރެފްރީއާ ބޭއަދަބީ ބަހުން ތަކުރާރުކޮށް މުއާމަލާތް ކުރުމުންނެވެ. ޓަކްސުހިރޯ ޓަކަމާޓޯ، ޖަޕާން މޮޅުވި ލަނޑު ޖެހުމުގެ ކުރިން، ބްރެޒިލްގެ ޖޮއާއޯ ގޯމޭސަށް ފައުލުުކުރި ކަމަށް ބްރެޒިލުން އެޕީލްކުރި ނަމަވެސް ރެފްރީ ނިންމީ ކުރިއަށްދާށެވެ.
ރަތް ކާޑާ ބެހޭގޮތުން، އަންޗެލޮޓީ ބުނީ، އޭނާ އަށް ރަތެއް ދެއްކީ ބެންޗުގައި ތިބި ކުޅުންތެރިން ކޮންޓްރޯލް ނުކުރެވިގެން ކަމަށެވެ.
"ޔަގީނުން ވެސް މި ނަތީޖާ މިހެން މި އޮތީ ރެފްރީ އަށް ކޮންމެވެސް ނުފޫޒެއް ފޯރައިގެން،" އަންޗެލޮޓީ ބުންޏެވެ.
ޓަކެފޫސާ ކޫބޯ އާއި ކެއިޓޯ ނަކަމޫރާގެ ލަނޑުތަކުން ޖަޕާނުން ވަނީ 19 މިނިޓް ތެރޭ ދެ ލަނޑުގެ ލީޑެއް ނަގައިފަ އެވެ. މެޗުގެ 33 ވަނަ މިނިޓްގައި ވިނީޝިއުސް ލަނޑެއް ޖަހައި، ޓީމަށް އުންމީދެއް ހޯދައިދިންއިރު، ބްރެޒިލަށް އެއްވަރުކޮށްދިނީ ވެސް އޭނާ އެވެ. ބްރެޒިލްގެ ދެ ވަަނަ ލަނޑު، ވީނީޝިއުސް ކާމިޔާބުކުރީ، 75 ވަނަ މިނިޓްގަ އެވެ. މި ދެ ލަނޑަށް ވެސް ފުރުސަތު ތަނަވަސްކޮށްދިނީ ބްރޫނޯ ގިމާރޭސް އެެވެ.
މޮޅުވުމަށްޓަކައި ލަނޑެއް ޖަހަން ބްރެޒިލުން ގިނަ މަސައްކަތްތަކެއް ކުރި ނަމަވެސް، އެކަން ކާމިޔާބުކުރީ ޖަޕާނުންނެވެ. އެ ޓީމުން މޮޅުވި ލަނޑު ޖެހީ މެޗުގެ އިތުރުު ވަގުތުގެ ތެރޭގަ އެވެ.
މިއީ، މިދިޔަ 18 މަސް ދުވަސް ތެރޭ އެކުވެރިކަމުގެ މެޗަކުން ބްރެޒިލް އަތުން ޖަޕާން މޮޅުވި ދެ ވަނަ ފަހަރެެވެ. ޖަޕާނާއި ބްރެޒިލް ވަނީ، މި ފަހަރު އެމެރިކާ، މެކްސިކޯ އަދި ކެނަޑާގައި ބޭއްވި ފީފާ ވޯލްޑް ކަޕްގެ ގަދަ 32 ޓީމުގެ ބުރުގައި ވާދަކޮށްފަ އެވެ. އެ މެޗުން 2-1 އިން މޮޅުވީ ބްރެޒިލް އެވެ.
