އޯކްލޭންޑް، އޮސްޓްރޭލިއާ (އޮކްޓޫބަރު 1) - އަންނަ ހޮނިހިރު ދުވަހު، އިންޑިއާއާ ދެކޮޅަށް ބްރެޒިލްގެ ގައުމީ ފުޓްބޯޅަ ޓީމުން ކުޅޭ މެޗުގައި، މި ވަގުތު އެންމެ ފޯމުގައި ހުރި ބްރެޒިލްގެ ފޯވާޑް، ރަފީނިއާ ނުކުޅޭނެ ކަމަށް އެ ޓީމުން ބުނެފި އެވެ.
އަންގާރަ ދުވަހު ބްރެޒިލުން އޮސްޓްރޭލިއާއާ ދެކޮޅަށް ކުޅުނު މެޗުގައި، ރަފީނިއާގެ ފަލަމަސްގަނޑަށް ވަނީ އަނިޔާވެފަ އެވެ. ބްރެޒިލުން 4-2 އިން މޮޅުވި އެ މެޗުގައި ރަފީނިއާ އަށް ލިބުނު އަނިޔާއާ ހެދި، ޓީމާ އެކު ހުުރުމުގެ ބަދަލުގައި ރަފީނިއާ ވަނީ ބާސެލޯނާ އަށް އެނބުރި ގޮސްފަ އެވެ. އެއީ، ބްރެޒިލްްގެ ޑޮކްޓަރާއި ބާސެލޯނާގެ މެޑިކަލް ޓީމު މަޝްވަރާކުރުމަށް ފަަހު ނިންމި ނިންމުމެކެވެ.
މި އަހަރުގެ ޖޫން/ޖުލައި މަހު އެމެރިކާ، މެކްސިކޯ އަދި ކެނަޑާގައި ބޭއްވި ވޯލްޑް ކަޕްގެ ތެރެއިން ވެސް އަނިޔާވެގެން މެޗުތަކެއް ގެއްލުނު ރަފީނިއާ އަށް މިދިޔަ ސީޒަނުގައި އިންޖަރީގެ އެކި މައްސަލަތަކެއް ވަނީ ދިމާވެފަ އެވެ. އެ ގޮތުން، މިދިޔަ ސީޒަނުގައި ރަފީނިއާ އަށް މަސްގަނޑުގެ އެކި އަނިޔާގެ ކަންކަން ދިމާވެ، 25 މެޗު ގެއްލިފައިވެ އެެވެ.
މި ވަގުތު މުޅި ދުނިޔޭގެ ފުޓްބޯޅަ އަށް ބަލާއިރު ވެސް އެންމެ ފޯމުގައި ހުރި އެއް ކުޅުންތެރިއަކީ ރަފީނިއާ އެެވެ. ޖަރުމަނުގެ ކޯޗު، ހަންސީ ފްލިކްގެ ކޯޗުކަމުގައި ބާސެލޯނާ އިން މި ސީޒަނުގައި ދައްކަމުން އަންނަ މޮޅު ކުޅުމުގައި ފޯވާޑެއްގެ ގޮތުގައި އެޓޭކު ލީޑުކުރަނީ ރަފީނިއާ އެވެ. އެ ގޮތުން، ސީޒަނުގެ އަށް މެޗުގައި ރަފީނިއާ ވަނީ 14 ލަނޑު ޖަހައިފަ އެވެ.
ބްރެޒިލުން 1-1 އިން އޮސްޓްރޭލިއާއާ އެއްވަރުވި މެޗުގައި ރަފީިނިއާ ވަނީ ލަނޑު ޖަހަން ފުރުސަތު ހޯދައިދީފަ އެވެ. އަދި، ދެ ވަނަ މެޗުގައި އަންގާރަ ދުވަހު، ފުރަތަމަ ހާފަށް ފަހު ބަދަލުކުރުމުގެ ކުރިން ޕެނަލްޓީއެއް ވެސް ޖެހި އެވެ.
އިންޓަނޭޝަނަލް ބްރޭަކަށް ފަހު ބާސެލޯނާ އިން ކުޅޭ ފުަރަތަމަ މެޗު އޮތީ މި މަހު 10 ވަނަ ދުވަހު، ގެޓަފޭއާ ދެކޮޅަށެވެ. އޭގެ ފަހުން މި މަހު ދެން އޮތީ، ޗެމްޕިއަންސް ލީގުގައި ޕީއެސްޖީ އާއި ގަލަތަސަރާއިއާ ކުޅޭ މެޗުތަކުގެ އިތުރުން ސްޕެނިޝް ލީގުގައި ރެއާލް މެޑްރިޑާ ބައްދަލުުކުރާ މެޗެވެ.
ރަފީނިއާ ވަނީ ބްރެޒިލަށް ކުޅެދިން 43 މެޗުން 12 ލަނޑު ޖަހައިފަ އެވެ. އޭނާ ނުލައި، ބްރެޒިލުން ހޮނިހިރު ދުވަހު، އިންޑިއާއާ ކުޅޭ މެޗު އޮތީ ކަލްކަތާގެ މަޝްހޫރު ސޯލްޓް ލޭކް ސްޓޭޑިއަމްގަ އެވެ.
