ވޭސްޓް މެނޭޖްމެންޓް ކޯޕަރޭޝަން (ވެމްކޯ) ގެ މުވައްޒަފުންނަށް މިދިޔަ މަހުގެ މުސާރަ ނުދީ، އަންނަ ހޮނިހިރު ދުވަހުގެރޭ އޮންނަ އިހުތިރާމު ކެމްޕޭން ލޯންޗު ކުރުމުގެ ޖަލްސާއަށް ދާން މަޖުބޫރުކުރަން ފަށައިފި އެވެ.
އަދަދު އަށް މައުލޫމާތު ދިން ވެމްކޯގެ މުވައްޒަފުން ބުނީ ހޮނިހިރު ދުވަހުގެރޭ އޮންނަ ޖަލްސާއަށް ދާން ކުންފުނީގެ މެނޭޖުމެންޓުން އަންގާފައިވާ ކަމަށެވެ. ނަމަވެސް، މިދިޔަ މަހުގެ މުސާރަ މިއަދާ ހަމައަށް ވެސް ބައެއް މުވައްޒަފުންނަށް ދީފައި ނުވާ ކަމަށް އެ މުވައްޒަފުން ބުންޏެވެ.
"ޖަލްސާއަށް ދާން މަޖުބޫރު، އެކަމަކު އަދިވެސް މިދިޔަ މަހުގެ މުސާރަ ބައެއް މުވައްޒަފުންނަށް ނުދޭ،" ވެމްކޯގެ މުވައްޒަފަކު ބުންޏެވެ.
ހޮނިހިރު ދުވަހުގެރޭ ބާއްވާ އިހުތިރާމު އަދާކުރުމުގެ ގައުމީ ކެމްޕޭން ލޯންޗުކުރުމުގެ ޖަލްސާއަށް ދާން ވެމްކޯ މުވައްޒަފުންގެ އިތުރުން ވެސް ބައެއް އެހެން އެސްއޯސީތަކުން މުވައްޒަފުންނަށް ސަރުކާރުން ދަނީ މަޖުބޫރު ކުރަމުންނެވެ.
ވެމްކޯގެ ބައެއް މުވައްޒަފުންނަށް އަދިވެސް މުސާރަ ނުދޭ
ވެމްކޯގެ ބައެއް މުވައްޒަފުންނަށް މިދިޔަ މަހުގެ މުސާރަ އަދިވެސް ނުލިބޭތީ، ބިލްތައް ނުދެއްކި ޖޫރިމަނާވުމާއި ކުލި ދެއްކުން ލަސްވުމުގެ ކަންބޮޑުވުން މުވައްޒަފުން ފާޅުކޮށްފިއެވެ. މުސާރަ ދިނުން ލަސްވާ މައްސަލަ މިދިޔަ އަހަރުން ފެށިގެން ކުރިމަތިވަމުންދާއިރު، މިހާރު ގިނަ މުވައްޒަފުންނަށް މުސާރަ ލިބެނީ ކޮންމެ މަހެއްގެވެސް 10 ވަނަ ދުވަހާ ގާތްވުމުންނެވެ.
އޭގެ އިތުރުން، ސަރުކާރުގެ ސިވިލް ސާވިސް ވަޒީފާތަކުގައި ތިބި މުވައްޒަފުން ވެސް އެ ޖަލްސާއަށް ދާން މަޖުބޫރުކޮށް ސިވިލް ސާވިސް ކޮމިޝަނުން ވަނީ ސަރުކާރު އޮފީސްތަކުގެ ޕާމަނަންޓް ސެކްރެޓްރީންނާއި ޒިންމާދާރު އިސްވެރިންނަށް މިދިޔަ ހަފުތާގައި ސިޓީއަކުން އަންގައިފަ އެވެ. އިހުތިރާމު އަދާކުރުމުގެ ގައުމީ ކެމްޕޭން ލޯންޗު ކުރުމުގެ ޖަލްސާގައި ސިވިލް ސާވިސް މުވައްޒަފުން ބައިވެރިވާކަން ކަށަވަރު ކުރުމަށް ވެސް އެ ސިޓީގައި އަންގައިފައިވެ އެވެ.
ހެރިޓޭޖް މިނިސްޓްރީން ކުރިއަށްގެންދަން ރާވާފައިވާ އިހުތިރާމް އަދާކުރުމުގެ ގައުމީ ކެމްޕެއިން ލޯންޗުކުރުމަށް ހަމަޖެހިފައިވަނީ އަންނަ ހޮނިހިރު ދުވަހު މާފަންނު ޓްރެކް ސަރަހައްދުގައި ބާއްވާ ރަސްމިއްޔާތެއްގަ އެވެ.
އަދަދު އަށް މައުލޫމާތު ލިބިފައިވާ ގޮތުގައި އިހުތިރާމް އަދާކުރުމުގެ ކެމްޕެއިނަށް ހެރިޓޭޖް މިނިސްޓްރީން ވަނީ މިހާތަނަށް ގިނަ ހަރަދުތަކެއް ކޮށްފަ އެވެ. މަޝްރޫއުގެ ޝިއާރަކީ "އިހުތިރާމުގެ އުފާ – މުޖުތަމައުގެ ނަފާ" ކަމުގައި ކަނޑައަޅާފައިވާއިރު، އެ ކެމްޕެއިން ކުރިއަށްގެންދަން ނިންމާފައިވަނީ ފަސް އަހަރު ދުވަހަށެވެ.
ގައުމީ ފެންވަރުގައި ގައުމީ އިހުތިރާމް އަދާކުރުމުގެ ދުވަސް އަހަރަކު އެއްފަހަރު ފާހަގަކުރުމަށްވެސް ސަރުކާރުން ވަނީ ނިންމައިފަ އެވެ.
