މެންޗެސްޓާ (ނޮވެމްބަރު 12) - މެންޗެސްޓާ ޔުނައިޓެޑްގެ ކޯޗުކަމުން މައިކަލް ކެރިކް ވަކިކުރަން އެ ކްލަބްގެ ބޯޑުން ނިންމާފައިވާ ކަމަށް އިނގިރޭސި މީޑިއާތަކުން ރިޕޯޓްކޮށްފި އެވެ.
ސްކައި ސްޕޯޓްސް އިން ރިޕޯޓްކުރާ ގޮތުގައި، ޔުނައިޓެޑުން މިހާރު ވަނީ ކެރިކް މަގާމުން ދުރުކޮށް، މި ވަގުތު އެމެރިކާ ގައުމީ ޓީމުގެ ކޯޗަކަށް ހުރި އާޖެންޓީނާގެ މައުރީސިއޯ ޕޮޗެޓީނޯއާ ޓީމު ހަވާލުކުރަން އަނގަބަހުން އެއްބަސްވުމަކަށް އަތުވެފަ އެވެ. އެކަމަކު، ޕޮޗެޓީނޯ، ޔުނައިޓެޑާ އެކު އެއްބަސްވުމެއްގައި ސޮއިކުރާނީ، ކޮންކަކަފް ނޭޝަންސް ލީގުގައި އެމެރިކާ އިން ހައިޓީއާ ދެކޮޅަށް ކުޅޭ ދެ މެޗަށް ފަހު އެވެ.
އެމެރިކާގެ ކޯޗުކަމާ 2024 ވަނަ އަހަރު ހަވާލުވި ޕޮޗެޓީނޯ، 2030 ގެ ޖޫންގެ ނިޔަަލަށް އެ ޓީމުގެ ކޮންޓްރެކްޓް އާ ކޮށްފައިވާއިރު، އޭގެ ކުރިން އޭނާ މަގާމުން ވީއްލައި، ކޮންޓްރެކްޓް ނިމުމަކަށް ގެންނަނަމަ ދައްކަންޖެހޭ 10 މިލިއަން ޑޮލަރުގެ ފީގެ ކަންކަމާ ގުޅޭގޮތުން، ޔުނައިޓެޑުން މިހާރު އަންނަނީ އެމެރިކާ ފުޓްބޯޅަ ޖަމިއްޔާއާ އެކު ވާހަކަ ދައްކަމުންނެވެ.
ޕޮޗެޓީނޯ ވެގެންދާނީ، 2013 ވަނަ އަހަރު އަލެކްސް ފާގަސަން، ޔުނައިޓެޑްގެ ކޯޗުކަމުން ވަކިވެ، ރިޓަޔާކުރި ފަހުން، އެ ކްލަބާ ހަވާލުވާނެ، ދާއިމީ އަށް ވަނަ ކޯޗަށެެވެ. މީގެ ކުރިން، 2022 ވަނަ އަހަރު ޔުނައިޓެޑުން ޕޮޗެޓީނޯއާ އެ ޓީމާ ހަވާލުވުމާ ގުޅޭގޮތުން މަޝްވަރާކުރިއިރު، އެ ފަހަރު އެ ކްލަބުން ޓީމު ހަވާލުކުރީ އެ ފަހަރު އަޔަކްސް ދޫކޮށް އެ ޓީމާ ގުޅުނު އެރިކް ޓެން ހާގްއާ އެވެ.
ޔުނައިޓެޑުން މި ސީޒަނުގައި މިހާތަނަށް ކުޅުނު 15 މެޗުން މޮޅުވީ ތިން މެޗުންނެެވެ. ހަތް މެޗުން ބަލިވެފައިވާއިރު، ފަސް މެޗު ވަނީ އެއްވަރުވެފަ އެވެ. އިނގިރޭސި ލީގު ކަޕުން ޔުނައިޓެޑް ވަނީ ކަޓައިފަ އެވެ.
އެންމެ ފަހުން، ޕްރިމިއާ ލީގުގައި އަމިއްލަ ދަނޑުގައި ޔުނައިޓެޑް ވަނީ 4-4 އިން އެސްޓަން ވިލާއާ އެއްވަރުވެފަ އެވެ. މިއާ އެކު، ލީގުގައި އެންމެ ފަހުން ކުޅުނު އަށް މެޗުން ވެސް މޮޅެއް ނުލިބި އޮތް ޔުނައިޓެޑް ވަނީ ލީގުގެ ރެލިގޭޝަން ޒޯނަށް ވެއްޓިފަ އެވެ. ޔުނައިޓަށް ލީގުގައި 10 މެޗުން ލިބުނު އަށް ޕޮއިންޓާ އެކު އޮތީ 18 ވަނައިގަ އެވެ.
ލީގުގައި ބޯންމައުތު އަތުން ޔުނައިޓެޑް 3-0 އިން ބަލިވި މެޗަށް ފަހު، ކްލަބްގެ ހާލަތު ބަދަލުކުރަން ކެރިކަށް ދިނީ ތިން މެޗެވެ. އެއީ، ރޭ އެސްޓަން ވިލާއާ ކުޅުނު މެޗާ ހަމައަށެވެ. އޭގެ ކުރިން، ޗެލްސީ އަތުން ބަލިވިއިރު، ޗެމްޕިއަންސް ލީގުަގައި ރޯމާ އަތުން މޮޅުވި އެވެ. ރޭގެ މެޗުން ވިލާ ކައިރިން ދެ ފަހަރެއްގެ މަތިން ދެ ގޯލުގެ ލީޑަކާ އެއްވަރުކޮށް ޔުނައިޓެޑުން ފަހު ވަގުތާ ހަމައަށް ހިތްވަރު ދެއްކި އެވެ.
މި ސީޒަން ފެށުމުގެ ކުރިން ދެ އަހަރުގެ ކޮންޓްރެކްޓެއްގައި ޔުނައިޓެޑާ އެކު ސޮއިކުރި ކެރިކް މި ވަގުތު އެ ކްލަބުން ދިއުމަކީ އެންމެ ރަނގަޅު ނިންމުން ނޫންތޯ އެހުމުން އޭނާ ބުނީ އެއީ އެކަން ވާނެ ގޮތެއް ނޫން ކަމަށާއި މަގާމުން އިސްތިއުފާ ނުދޭނެ ކަމަށް ބުނެފަ އެވެ.
ފާގަސަން، 2013 ވަނަ އަހަރު ޔުނައިޓެޑުން ދިޔަ ފަހުން އެ ކްލަބަށް ގެނައި ކޯޗުން މަގާމުން ދުރުކުރުމަށްޓަކައި، ޔުނައިޓެޑަށް ބޮޑު ހޭދައެއް ވަނީ ކުރަން ޖެހިފަ އެވެ. އެ ގޮތުން، ކެރިކް، މަގާމުން ވަކިކ އޭނާގެ ކޮންޓްރެކްޓްގެ ބާކީ މުއްދަތަށް މާލީ ބަދަލެއްގެ ގޮތުގައި 13 މިލިއަން ޑޮލަރު ދޭން ޖެހޭނެ ކަމަށް ރިޕޯޓްތައް ބުނެ އެވެ. އަދި، ކެރިއަށް އެ ވަރު ދީފިނަމަ، ފާގަސަން އަށް ފަހު، ޔުނައިޓެޑާ ހަވާލުވި، ހަތް ކޯޗުން ވަކިކުރަން ޖުމްލަ އެކު ކުރި ހަރަދު 100 މިލިއަން ޑޮލަރަށް ވުރެން އިތުރުވާނެ އެވެ. އެންމެ ބޮޑު ހޭދައެއްކުރަން ޖެހުނީ ހޯސޭ މޮރީނިއޯ ވަކިކުރިއިރު އެވެ. މޮރީނިއޯ އަށް ބަދަލެއްގެ ގޮތުގައި 24 މިލިއަން ޑޮލަރު ދޭން ޖެހުނެވެ.
