މެންޗެސްޓާ (ނޮވެމްބަރު 9) - މެންޗެސްޓާ ޔުނައިޓެޑްގެ ކޯޗުގެ މަގާމުން އިސްތިއުފާ ދިނުމުގެ ވިސްނުމެއް ނެތް ކަމަށް މި ވަގުތު ދަށް ފޯމެއްގައި ދުވަސްތައް ގުނަމުން އަންނަ ޔުނައިޓެޑްގެ ކޯޗު މައިކަލް ކެރިކް ބުނެފި އެވެ.
ޔުނައިޓެޑުން މި ސީޒަނުގައި މިހާތަނަށް ކުޅުނު 15 މެޗުން މޮޅުވީ ތިން މެޗުންނެެވެ. ހަތް މެޗުން ބަލިވެފައިވާއިރު، ފަސް މެޗު ވަނީ އެއްވަރުވެފަ އެވެ. އިނގިރޭސި ލީގު ކަޕުން ޔުނައިޓެޑް ވަނީ ކަޓައިފަ އެވެ.
އެންމެ ފަހުން، ރޭ ޕްރިމިއާ ލީގުގައި އަމިއްލަ ދަނޑުގައި ޔުނައިޓެޑް ވަނީ 4-4 އިން އެސްޓަން ވިލާއާ އެއްވަރުވެފަ އެވެ. މިއާ އެކު، ލީގުގައި އެންމެ ފަހުން ކުޅުނު އަށް މެޗުން ވެސް މޮޅެއް ނުލިބި އޮތް ޔުނައިޓެޑް ވަނީ ލީގުގެ ރެލިގޭޝަން ޒޯނަށް ވެއްޓިފަ އެވެ. ޔުނައިޓަށް ލީގުގައި 10 މެޗުން ލިބުނު އަށް ޕޮއިންޓާ އެކު އޮތީ 18 ވަނައިގަ އެވެ.
ހާލަތު ބަދަލުކުރަން ކެރިކަށް މެންޗެސްޓާ ޔުނައިޓެޑުން ފަހު ފުރުސަތު ދީފި
މެންޗެސްޓާ ޔުނައިޓެޑްގެ ނަތީޖާތައް ދަށްވުމާ ގުޅިގެން ކޯޗު މައިކަލް ކެރިކް މަގާމުން ވަކިކުރަން އުޅުމަށްފަހު، ޓީމުގެ ހާލަތު ރަނގަޅުކުރުމަށް އޭނާއަށް ފަހު ފުރުސަތެއް ދޭން އެ ކްލަބުން ނިންމައިފި. މި ސީޒަނުގައި ކުޅުނު 12 މެޗުން އެންމެ ދެ މެޗުން މޮޅުވެފައިވާއިރު، މިއީ ފާއިތުވި 40 އަހަރު ތެރޭގައި އެ ޓީމުން ސީޒަނެއް މިހާ ދަށްކޮށް ފެށި ފުރަތަމަ ފަހަރު.
ލީގުގައި ބޯންމައުތު އަތުން ޔުނައިޓެޑް 3-0 އިން ބަލިވި މެޗަށް ފަހު، ކްލަބްގެ ހާލަތު ބަދަލުކުރަން ކެރިކަށް ދިނީ ތިން މެޗެވެ. އެއީ، ރޭ އެސްޓަން ވިލާއާ ކުޅުނު މެޗާ ހަމައަށެވެ. އޭގެ ކުރިން، ޗެލްސީ އަތުން ބަލިވިއިރު، ޗެމްޕިއަންސް ލީގުަގައި ރޯމާ އަތުން މޮޅުވި އެވެ. ރޭގެ މެޗުން ވިލާ ކައިރިން ދެ ފަހަރެއްގެ މަތިން ދެ ގޯލުގެ ލީޑަކާ އެއްވަރުކޮށް ޔުނައިޓެޑުން ފަހު ވަގުތާ ހަމައަށް ހިތްވަރު ދެއްކި އެވެ.
މި ސީޒަން ފެށުމުގެ ކުރިން ދެ އަހަރުގެ ކޮންޓްރެކްޓެއްގައި ޔުނައިޓެޑާ އެކު ސޮއިކުރި ކެރިކް މި ވަގުތު އެ ކްލަބުން ދިއުމަކީ އެންމެ ރަނގަޅު ނިންމުން ނޫންތޯ އެހުމުން އޭނާ ބުނީ އެއީ އެކަން ވާނެ ގޮތެއް ނޫން ކަމަށެވެ.
"ހާލަތު އެބަ އެެނގޭ. އަހަރެެމެންނަށް ގިނަ މެޗުތަކަކުން މޮޅެއް ނުވެވޭ. އެކަމަކު އަހަރެން އުންމީދުކުރަނީ ޓީމާ އެކު ކުރިއަށްދާން. ކަންކަން ރަނގަޅުވަމުން އެބަދޭ. ހެދޭ ގޯސްތައް ރަނގަޅުކޮށް މެޗުތަކަކުން މޮޅުވީމަ މި ހާލަތު ބަދަލުކުރެވޭނެ،" މުސްތަގުބަލާ ބެހޭގޮތުން ސުވާލު ކުރުމުން ކެރިކް ބުންޏެވެ.
ކެރިކް ބުނީ، ޔުނައިޓެޑްގައި ކުރިއަށްދާންވީ ގޮތް އޭނާ އަށް އެނގޭ ކަމަށާއި އެކަން ކުރަން ހުރިހާ ދުވަހަކު ވެސް މަސައްކަތް ކުރަމުން އަންނަ ކަމަށެވެ.
ރިޕޯޓްތައް ބުނާގޮތުން، ޔުނައިޓެޑުން ކެރިކާ މެދު ކުރިއަށް އޮތް ދުވަސްތެރޭގައި ގޮތެއް ނިންމާނެ އެވެ. ކެރިކް ވަކިކުރާނަމަ، ޔުނައިޓެޑުން ދެން ގެންނާނެ ކަމަށް ބެލެވޭ ކޯޗުންގެ ލިސްޓުގެ ކުރީގައި އޮތީ ޖަރުމަނުގެ ޒުވާން ކޯޗު ހޫޫލިއަން ނާގަލްސްމަން އެވެ. ދެން، ޔުނައިޓެޑުން ޝައުގުވެރިވާ ކޯޗުންގެ ލިސްޓުގައި އޮތީ ކުރިން ޗެލްސީ އާއި ޓޮޓެންހަމް އަށް ކޯޗުކޮށްދިން އެންޓޯނިއޯ ކޮންޓޭ އާއި ބޯންމައުތާއި ނިއުކާސަލް ޔުނައިޓެޑުން ފެނުނު އެޑީ ހޯވް އެވެ.
