ފަހި ދިރިއުޅުން ކޯޕަރޭޝަން (އެފްޑީސީ) އިން ބަލަހައްޓަމުންދާ ހައުސިން ޔުނިޓްތަކުގެ އުސޫލުތަކާއި ގަވާއިދުތަކާ ހިލާފުވެގެން ނޮވެމްބަރު 5، ގެނިޔަލަށް 92 މައްސަލައެއް ރެކޯޑުކުރެވިފައިވާ ކަމަށް އެ ކޯޕަރޭޝަނުން ބުނެފި އެވެ.
އެފްޑީސީން ބުނީ މި މައްސަލަތަކާ ގުޅިގެން ހުށަހެޅިފައިވާ 92 މައްސަލައިގެ ތެރޭގައި އެންމެ ގިނައީ ހުއްދަ ނެތި ބަދަލު ގެނައުމުގެ މައްސަލަތައް ކަމަށާއި އެއީ 44 މައްސަލަ ކަމަށެވެ.
ހުއްދަ ނެތި ބަދަލު ގެނައި 44 މައްސަލަތަކުގެ ތެރެއިން 14 މައްސަލައެއްގައި ވެރިފަރާތް ޖޫރިމަނާކޮށްފައިވާއިރު، އެކަކަށް އިންޒާރުގެ ނޯޓިސް ވަނީ ދީފަ އެވެ. އަދި ބާކީ 29 މައްސަލަވެސް އެފްޑީސީން އަދިވެސް ދަނީ ބަލަމުންނެވެ.
ހުއްދަ ނެތި ޔުނިޓްތައް ކުއްޔަށް ދޫކުރި 18 މައްސަލައެއް އެފްޑީސީއަށް ފާހަގަކުރެވިގެން ހަތް މީހަކު ޖޫރިމަނާކޮށް، ދެ ދެ ފްލެޓަކަށް ވަނީ އިންޒާރުގެ ނޯޓިސް ދީފަ އެވެ. އަދި ބާކީ ނުވަ މައްސަލަ މިހާރުވެސް ދަނީ ބަލަމުންނެވެ.
އާންމު ތަންތަނަށް ގެއްލުން ދިނުމުގެ 16 މައްސަލައެއް ފާހަގަކުރެވިގެން ފަސް ފްލެޓަކަށް އިންޒާރުދީ، 11 މައްސަލައެއް ދަނީ ބަލަމުންނެވެ. އަދި އެންގުންތަކަށް އަމަލުނުކުރާ 10 މައްސަލައެއްގެ ތެރެއިން އެއް ފްލެޓަކަށް އިންޒާރުދީ ނުވަ މައްސަލައެއް ދަނީ ބަލަމުންނެވެ.
މީގެއިތުރުން ކުނި އެޅުމުގެ ގަވާއިދާ ހިލާފުވި ހަތަރު މައްސަލައެއްގައި ދެ ފްލެޓެއް ޖޫރިމަނާކޮށް ދެ މައްސަލައެއް ބަލަމުންދާ ކަމަށް އެފްޑީސީން ބުންޏެވެ.
އެފްޑީސީގެ ޔުނިޓްތަކަށް ކުލި ދެއްކުމުގެ ތަފާސްހިސާބުތައް ބަލާއިރު ނޮވެމްބަރު 4، ގެ ނިޔަލަށް 3،432 ހައުސިން ޔުނިޓުން ބަރާބަރަށް ކުލި ދައްކަމުންދާއިރު، 495 ޔުނިޓަކުން ގަވާއިދުން ކުލި ނުދައްކަ އެވެ.
އެފްޑީސީން ހުޅުމާލޭގައި އިމާރާތްކޮށްފައިވާ ފްލެޓުތަކުގެ ތެރެއިން ދެ ފްލެޓެއް ހުސްކުރަން އެ ކޯޕަރޭޝަނުން އެންގި އެވެ. ނަމަވެސް އެ ދެ ފްލެޓުގެ ތެރެއިން އެއް ފްލެޓަކުން ކުލި ދައްކަން އެއްބަސްވެ، އަނެއް ފްލެޓުން ކުލި ދައްކަން ދެކޮޅު ހެދުމުން ކޯޓަށް މައްސަލަ ހުށަހަޅަން މިދިޔަ މަހު ވަނީ ނިންމާފަ އެވެ.
