ބ. އަތޮޅުން ފެށިގެން ވ. އަތޮޅާ ހަމައަށް ބޯކޮށް ވާރޭވެހި، ވިލާގަނޑުގައި ވައިގަދަވެ ކަނޑުތައް ގަދަވާނެ ކަމަށް ލަފާކޮށް ގައުމީ މޫސުމާ ބެހޭ އިދާރާ (މެޓް އޮފީހުން) ޔެލޯ އެލާޓް ނެރެފި އެވެ.
މެޓް އޮފީހުން މިއަދު ހެނދުނު 07:00 އިން ފެށިގެން 11:00 އާ ހަމައަށް ނެރުނު ޔެލޯ އެލާޓުގައި ބުނެފައިވަނީ، އެ ސަރަހައްދަށް ބޯކޮށް ވާރޭވެހުމާއެކު ގުގުރުން އެކަށީގެންވާ ކަމަށެވެ. އަދި ވިލާގަނޑުގައި ގަޑިއަކު 40 މޭލަށް ވައިގަދަވެ، ކަނޑުތައްވެސް ގަދަވާނެ ކަމަށް ލަފާކޮށްފައިވެ އެވެ.
ފަތިހުން ފެށިގެން މާލެއަށް ދަނީ ވާރޭ ވެހެމުންނެވެ.
ޔެލޯ އެލާޓގެ އިތުރުން، މުޅި ރާއްޖެއަށް ވަނީ ވައިޓް އެލާޓެއްވެސް ނެރެފައެވެ. ހެނދުނު 07:00 އިން މެންދުރު 12:00 އާ ހަމައަށް ނެރުނު މި އެލާޓުގައިވާ ގޮތުން، ރާއްޖޭގެ އެކި ހިސާބުތަކަށް ބޯކޮށް ވާރޭވެހުމާއެކު ގުގުރައި، ވިލާގަނޑުގައި ގަޑިއަކު 35 މޭލަށް ވައިގަދަވާނެ ކަމަށް ބެލެވެއެވެ.
މޫސުން ގޯސްވުމާ ގުޅިގެން، ހާއްސަކޮށް ކަނޑުދަތުރު ކުރައްވާ ފަރާތްތަކުން މޫސުމަށް ސަމާލުވުމަށް މެޓް އޮފީހުން ވަނީ އިލްތިމާސްކޮށްފައެވެ.
