ގާހިރާ، މިސްރު (ނޮވެމްބަރު 8) - އާއިލީ މައްސަލަތަކެއްގައި ސޯޝަލް މީޑިއާގައި ވެސް މައްސަލަ ހޫނުވެފައިވާ މިސްރުގެ ފުޓްބޯޅަ ޓީމުގެ ކޯޗުކަމުން ހޮސާމް ހަސަން ވަކިކުރަން މިސްރުގެ ފުޓްބޯލް އެސޯސިއޭޝަނުން ނިންމައިފި އެވެ.
އުމުރުން 60 އަަހަރުގެ ހޮސާމް ވަނީ މީގެ ދެ މަހެއްހާ ދުވަސް ކުރިން، 2030 ވަނަ އަހަރުގެ ފީފާ ވޯލްޑް ކަޕްގެ ނިޔަލަށް މިސްރުގެ ކޮންޓްރެކްޓް އާ ކޮށްފަ އެވެ. އެކަމަކު، އޭނާގެ ވަޒީފާ ގެއްލިފައި މި ވަނީ އާއިލީ މައްސަލަތަކެއްގެ ތެރޭގައި ގިނަ ކަންތައްތަކެއް ހިނގި ފަހުންނެވެ. ހޮސާމް ވަކިކޮށް މިސްރުގެ ކޯޗުކަން ދީފައިވަނީ އަލީ މާހިރު އަށެވެ.
މިސްރުގެ ފުޓްބޯލް އެސޯސިއޭޝަނުން ހޮސާމް ވަކިކުރިކަން އަންގައި ނެރުނު ބަޔާނުގައި އެ ގޮތަށް ނިންމި ސީދާ ސަބަބެއް ބަޔާންކޮށްފައެއް ނުވެ އެވެ. ބަޔާނުގައި ބުނެފައިވަނީ، މިސްރު ޓީމުގެ ނަން ސަލާމަތްކުރުމާއި ދެެމެހެއްޓެނިވި ގޮތެއްގައި ކުރިއަށްގެންދިއުމަށް ބަލާއިރު މިއީ މުހިންމު ނިންމުމެއް ކަމަށެވެ.
އެމެރިކާ، މެކްސިކޯ އަދި ކެނަޑާގައި ބޭއްވި ފީފާ ވޯލްޑް ކަޕް ފުޓްބޯޅަ މުބާރާތުގެ ގަދަ 16 ބުރަށް މިސްރު ގެންގޮސްދިން ކޯޗު ހޮސާމް އަށް މިދިިޔަ ދެތިން މަހެއްހާ ދުވަހަކީ ޒާތީ ދިރިއުޅުމުގައި ގިނަ މައްސަލަތަކެއް ކުރިމަތިވި ދުވަސްވަރެކެވެ. މިދިޔަ އޮގަސްޓް މަހު، ހޮސާމް އާއި އޭނާގެ ކުރީގެ އަންހެނުންގެ މެދުގައި ހިނގި ދެބަސްވުމެއްގެ ކަންކަން ދައްކުވައިދޭ ވީޑިއޯ އެއް ސޯޝަލް މީޑިއާގައި ވައިރަލްވި އެވެ. އަދި، މީގެ ތިން ދުވަސް ކުރިން، މިސްރުގެ ސުޕްރީމް ކައުންސިލް ފޯ މީޑިއާ ރެގިއުލޭޝަނުން ވަނީ ހޮސާމް އަށް ޒާތީ ދިރިއުޅުމުގެ ވާހަކަ ސޯޝަލް މީޑިއާގައި ދެއްކުން މަނާކޮށްފަ އެވެ.
ދާދި ފަހުން، ފީފާ އިން ވަނީ މި ފަހަރުގެ ވޯލްޑް ކަޕްގައި ހިނގި ކަންތައްތަކަކާ ގުޅިގެން މިސްރު ޓީމަށް ފިޔަވަޅުތަކެއް އަޅައިފަ އެވެ.
މެޗަށް ފަހު އޮތް ނޫސްވެރިންގެ ބައްދަލުވުމުގައި ހޮސާމް ބުނީ، އާޖެންޓީނާއާ ދެކޮޅަށް މިސްރު ފެނުނީ މާ ރަނގަޅަށް ކަމަށެވެ. އެކަމަކު، މި މެޗުގެ ނަތީޖާ އަށް އަސަރުކުރީ ދަނޑު މަތިންނާއި ދަނޑު ބޭރުން ވަކި ކަންތައްތަކެއް ބޭނުންވާތީ ކަމަށް ހޮސާމް ވަނީ ތުހުމަތުކޮށްފަ އެވެ. އަދި، މި މެޗުގައި މިސްރަށް ލަނޑު ޖަހައިދިން ޒީކޯ ވެސް ވަނީ ރެފްރީންނަށް ފާޑުކިޔައިފަ އެވެ.
ފީފާ ޑިސިޕްލިނަރީ ކޮމީޓިން މި މެޗުގައި ހިނގައިދިޔަ މައްސަލަތައް ބެލުމަށް ފަހު ނިންމީ، މިސްރުގެ ކޯޗު، ހޮސާމް އާއި އޭނާގެ އެއްމާބަނޑު ބޭބެ، އިބްރާހިމް، ތިން މެޗަށް ސަސްޕެންޑް ކުރުމަށެވެ. އަދި، ފީފާ އިން ވަނީ ޒީކޯ ފަސް މެޗަށް ސަސްޕެންޑްކޮށްފަ އެވެ.
މިސްރުގެ ކޯޗުކަމާ 2024 ވަނަ އަހަރު ފެބްރުއަރީ މަހު ހަވާލުވުމަށް ފަހު، ހޮސާމް ވަނީ އެ ޓީމަށް 38 މެޗުގައި ކޯޗުކޮށްދީފަ އެވެ. އޭގެ ތެރެއިން 21 މެޗުން މޮޅުވިއިރު، 10 މެޗުން ބަލި އަދި ހަތް މެޗުން ވަނީ އެއްވަރުވެފަ އެވެ.
