ދިވެހިރާއްޖޭގެ ކަނޑުފަޅުތަކުގައި ދަތުރުކުރާ 'މޯލްޑިވްސް ލެޖެންޑް' ލިވަބޯޑާއި 'އިންފިނިޓީ އެކްސް' ސަފާރީގެ ޑައިވިން ޓީމުތަކާ ދެމެދު ހިނގި ހާދިސާގެ މައްސަލަ ތަހުގީގުކޮށްދިނުމަށް ނޭޝަނަލް އެސޯސިއޭޝަން ބޯޓިން އެސޯސިއޭޝަން އޮފް މޯލްޑިވްސް (އެންބީއޭއެމް) އިން ގޮވާލައިފި އެވެ.
އެ ހާދިސާއާ ގުޅިގެން އެންބީއޭއެމްއިން ނެރުނު ބަޔާނެއްގައި ވަނީ އެކަން ހިނގައިދިޔަ ގޮތް ވަކި ފަރާތަކަށް ނުޖެހި ފުރިަހަމައަށް ތަހުގީގުކޮށްދިނުމަށް ފުލުހުންނަށާއި ޓޫރިޒަމް މިނިސްޓްރީއަށް ގޮވާލައިފަ އެވެ.
ޑައިވަރުންތަކެއްގެ މެދުގައި ކަނޑުއަޑީގައި ހިނގި ހަމަނުޖެހުމެއްގެ ވީޑިއޯއެއް ސޯޝަލް މީޑިއާގައި ދަނީ ދައުރުވަމުންނެވެ. އެކަމާ ގުޅިގެން އެންބީއޭއެމްއިން ވަނީ ކަންބޮޑުވުން ފާޅުކޮށްފަ އެވެ. އެ ޖަމިއްޔާއިން އެދިފައި ވަނީ އެ ހާދިސާގެ އަސްލު ސާފުނުވަނީސް ވަކި ފަރާތަކަށް ތުހުމަތު ނުކުރުމަށް އިލްތިމާސްކޮށްފަ އެވެ.
ދައުރުވަމުންދާ ވީޑިއޯއިން ފެންނަނީ ކަނޑުއަޑީގެ މަންޒަރުތައް ބަލައިލުމަށް ފީނަމުންދިޔަ ޑައިވަރުންގެ ތެރެއިން ދެ މީހެއްގެ ދެމެދުގައި ހަމަނުޖެހުމެއް ހިނގައި، އެކަކު އަނެކަކު ގަޔަށް އަތްލާ މަންޒަރެވެ. އަދި، ޑައިވް ނިންމައިލުމަށްފަހު، ދޯންޏަށް އަރައި ތިބެ ދެބައި މީހުންގެ މެދުގައި ބަހުގެ ހަމަލާތައް ބަދަލުކުރާ މަންޒަރު ވެސް އެ ވީޑިއޯއިން ފެނެ އެވެ.
އެ ހާދިސާގެ ސަބަބުން ރާއްޖޭގެ ބޯޓިން އަދި، ޑައިވިން ސިނާއަތުގެ އަގުވެއްޓި ރާއްޖެއަކީ ފަތުރުވެރިންނަށް ނުރައްކާތެރި ތަނެއްގެ ގޮތުގައި ދެއްކުމަށް ބައެއް ފަރާތްތަކުން މަސައްކަތް ކުރާ ކަމަށް ތުހުމަތުކޮށް އެންބީއޭއެމްއިން ވަނީ އެކަން ހަރުކަށި އިބާރާތުން ކުށްވެރިކޮށްފަ އެވެ.
އޭގެ އިތުރުން، ރާއްޖޭގައި އޮޕަރޭޓުކުރާ ބޭރުގެ އުޅަނދުތަކުގެ މިލްކުވެރިކަމާމެދު ވެސް އެ ޖަމިއްޔާއިން ވަނީ ސުވާލު އުފައްދާފައެވެ. އެގޮތުން އިންފިނިޓީ އެކްސް ފަދަ ކުރިން ބޭރުގެ އުޅަނދުތަކުގެ ގޮތުގައި އޮޕަރޭޓްކުރި އުޅަނދުތައް، ދިވެހި ކުންފުނިތަކުގެ ނަމަށް ބަދަލުކުރި ނަމަވެސް، އެ އުޅަނދުތަކުގައި ދިވެހިންގެ ހަގީގީ ބައިވެރިވުން އޮތް މިންވަރު ބަލައި ތަހުގީގު ކުރުމަށް އެންބީއޭއެމުން ވަނީ އެދިފަ އެވެ.
އެންބީއޭއެމް އިން ވަނީ އިންފިނިޓީ އެކްސްއާ ގުޅޭ މައުލޫމާތުގެ ފުށުއެރުންތަކެއް ހުރިކަން ވެސް އެ ބަޔާނުގައި ފާހަގަކޮށްފަ އެވެ. އެގޮތުން ޓޫރިޒަމް މިނިސްޓްރީގައި އެ އުޅަނދު ރަޖިސްޓްރީކޮށްފައި ވަނީ 20 ކޮޓަރިއާއި 40 އެނދުގެ ގޮތުގައި ކަމަށްވީ ނަމަވެސް، ބައިނަލްއަގުވާމީ ބުކިން ސައިޓްތަކުގައި އެ އުޅަނދުގެ މައުލޫމާތު ދީފައިވަނީ 19 ކޮޓަރިއާއި 30 ފަސިންޖަރުންގެ ގޮތުގައި ކަމަށް އެ ޖަމިއްޔާއިން ބުނެފައިވެ އެވެ.
މިފަދަ ފުށުއެރުންތައް ހުރުމަކީ ކަންބޮޑުވާންޖެހޭ ކަމެއް ކަމަށާއި، ހުރިހާ އޮޕަރޭޓަރުންނަކީވެސް ހަމަހަމަކަމާއެކު ޤަވާޢިދުތަކަށް ބޯލަނބާ ފަރާތްތަކެއްކަން ކަށަވަރުކުރުމަށް ވަނީ ގޮވާލާފައެވެ.
