ހުޅުމާލެ ހޮސްޕިޓަލުގައި "ޑައިގްނޯސްޓިކް ސެންޓާ ފޯ އޮންކޮލޮޖީ ސާވިސަސް" ގާއިމުކުރަން ބޭރުގެ ދެ ކުންފުންޏަކާއެކު އެމްއޯޔޫއެއްގައި ސޮއިކޮށްފި އެވެ.
މި ސެންޓަރު ގާއިމުކުރަން މާލެ ސިޓީ ގްރޫޕް އޮފް ހޮސްޕިޓަލްސް (އެމްސީޖީއެޗް) އިން ސޮއިކުރީ އިނގިރޭސިވިލާތުގެ ކުންފުންޏެއް ކަމަށްވާ ކުއަންޓަމް ހެއިޓްސް އާއި އިންޑިއާގެ ވަސްކިއުލާ ޓެކްނޮލޮޖީއާ އެކުގަ އެވެ. އެ ސެންޓަރު ގާއިމުކުރުމުގެ މަސައްކަތް ކުރާނީ އިނގިރޭސިވިލާތުގެ ކުންފުންޏާއި އިންޑިއާ ކުންފުންޏާ ގުޅިގެންނެވެ.
އެމްސީޖީއެޗްގެ އިބްރާހިމް އަބްދުލްރައްޒާގު ހަލީމް ވިދާޅުވީ މި ހިދުމަތް ގާއިމުވުމާއެކު ރާއްޖޭގައި ކެންސަރު ބައްޔަށް ދެވޭ ހާއްސަ ފަރުވާ ހަރުދަނާކޮށް، ރާއްޖެއިން ބޭރަށް ބަރޯސާވާންޖެހޭ މިންވަރު ކުޑަކޮށް، ފެންވަރު ރަނގަޅު ހިދުމަތްތަކެއް ލިބިގެންދާނެ ކަމަށެވެ.
މި މަރުކަޒުން ހިދުމަތް ދޭނީ އެކި ދާއިރާތަކުގެ ތަޖުރިބާކާރުން ހިމެނޭ ޓިއުމާ ބޯޑުގެ ލަފަޔާއެކު ބަލި ދެނެގަތުމުން ފެށިގެން ފޮލޯއަޕާ ހަމައަށް ވަށާޖެހޭ ނިޒާމެއްގެ ތެރެއިން ކަމަށާއި އެ ސެންޓަރު ގާއިމުކޮށް 2028 ގައި ހިދުމަތް ދެވޭނެ ކަމަށް އޭނާ ވިދާޅުވި އެވެ.
މީގެއިތުރުން އޭނާ ވިދާޅުވީ ނަފްސާނީ އެހީތެރިކަމާއި ބަލިމީހާގެ ފެންވަރު ރަނގަޅުކޮށްދޭނެ ސަޕޯޓިވް ކެއާގެ ތެރޭގައި ހިމެނޭނެ އެހެނިހެން ހިދުމަތްތައް ވެސް މި މަރުކަޒުން ފޯރުކޮށްދެވޭނެ ކަމަށެވެ.
"އަޅުގަނޑުމެންގެ މަގްސަދަކީ ބަލިމީހާގެ ގާތްތިމާގެ މީހުންނާއި އާއިލާގެ ގާތުގައި ތިބެގެން ވީ އެންމެ އަވަސް މުއްދަތެއްގެ ތެރޭގައި ބަލި ދެނެގަނެ، ހާއްސަ ފަރުވާ އާއި ކްލިނިކަލް މޮނިޓަރިން އަދި ސަޕޯޓިވް ކެއާ އެއް ފުރާޅެއްގެ ދަށުން ލިބޭނެ ހާއްސަ މަރުކަޒެއް ގާއިމުކުރުން،" ރައްޒާގް ވިދާޅުވި އެވެ.
ރައްޒާގު ވިދާޅުވީ ސެންޓަރުން ހިދުމަތްދިނުމަށް ބޭނުންވާ ބައިނަލްއަގުވާމީ ބައިވެރިންގެ އެހީގައި ދިވެހި ޑޮކްޓަރުންނާއި، ނަރުހުންނާއި، ފިޒިއޯސިސްޓުންނާއި، ރޭޑިއޯޖޮލިސްޓުންގެ އިތުރުން އެހެނިހެން މުވައްޒަފުން ތަމްރީނު ކުރުމަށްވެސް ވަނީ ރާވާފައި ކަމަށެވެ.
ރާއްޖޭގައި ބައެއް ހޮސްޕިޓަލުތަކުން ކެންސަރާ ގުޅޭ ސާޖަރީތަކާއި ކީމޯ ތެރަޕީގެ ހިދުމަތް ދެމުން ގެންދެ އެވެ. ނަމަވެސް ރޭޑިއޭޝަން ތެރަޕީ އާއި ނިއުކްލިއާ މެޑިސިން އަދި މުހިންމު ސްކޭންތައް ނުހެދެ އެވެ.
