އުރުދުންގެ ކަރަކް ގަވަރުނޭޓްގައި ހުންނަ ނަސާރާއިންގެ ފައްޅިއަކަށް މިދިޔަ ހުކުރު ދުވަހު ދިން ބަޑީގެ ހަމަލާއާ ގުޅިގެން، ސީރިޔާގެ އިރުދެކުނުގައި ހަރަކާތްތެރިވާ ހަތިޔާރު އެޅި ޖަމާއަތްތަކުން "ފިލައިގެން ތިިބޭ ތަންތަނަށް" އަމާޒުކޮށް ހަމަލާދީފައިވާ ކަމަށް އުރުދުންގެ އަސްކަރިއްޔާއިން ބުނެފި އެވެ. ފައްޅިއަށް ދިން އެ ހަމަލާގައި މަދުވެގެން ނުވަ މީހަކު މަރުވެ، އެތައް ބަޔަކު ވަނީ ޒަހަމްވެފަ އެވެ.
އުރުދުންގެ އަސްކަރިއްޔާއިން ބުނި ގޮތުގައި ސީރިޔާއަށް ދިން މި ވައިގެ ހަމަލާތައް ކުރިއަށް ގެންގޮސްފައިވަނީ "ސީރިޔާ ސަރުކާރާ ގުޅިގެން" ނެވެ.
މި ރޭޑުތަކުގެ ސަބަބުން ޓެރަރިސްޓް ޖަމާއަތްތަކަށް ނިސްބަތްވާ ގިނަ ބަޔަކު މަރުވެ ޒަހަމްވެފައިވާ ކަމަށާއި، އެ މީހުން ބޭނުންކުރާ ގިނަ އަދަދެއްގެ އުޅަނދުތައް ހަލާކުކޮށްލާފައިވާ ކަމަށް ވެސް އުރުދުންގެ އަސްކަރިއްޔާއިން ބުނެފައިވެ އެވެ.
ނަމަވެސް، އުރުދުންއާ ގުޅިގެން އެއްވެސް މަސައްކަތެއް ކޮށްފައިވާ ކަމަށް ސީރިޔާއިން ވަނީ އިންކާރުކޮށްފަ އެވެ.
ސީރިޔާ ސަރުކާރުން ނެރުނު ބަޔާނެއްގައި ބުނެފައިވަނީ، މި އަސްކަރީ އޮޕަރޭޝަން ހިންގާފައިވަނީ ކުރިން އެއްވެސް މަޝްވަރާއެއް ކުރުމެއް ނެތި އަދި އެއްވެސް އެންގުމަކާ ނުލައި ކަމަށެވެ. އަދި މި ހާދިސާއާ ގުޅިގެން ތަހުގީގެއް ފަށާފައިވާ ކަމަށް ވެސް އެ ބަޔާނުގައިވެ އެވެ.
ސީރިޔާގެ ސިވިލް ޑިފެންސް ސާވިސްއިން ބުނި ގޮތުގައި ހޯމަ ދުވަހުގެ ރޭ ދިން މި ހަމަލާތައް ދެރާ އަދި ސުވައިދާ ޕްރޮވިންސްގެ ހަތަރު ސަރަހައްދަކަށް އަމާޒުވެފައިވެ އެވެ. އަދި އެ ސަރަހައްދުތަކުން ހަތް މީހެއްގެ ހަށިގަނޑު ފެނިފައިވާ ކަމަށާއި، އޭގެ ތެރޭގައި ތިން ފިރިހެނުންނާއި، އަންހެނަކާއި ތިން ކުޑަކުދިން ހިމެނޭ ކަމަށް އެ އިދާރާއިން ބުނެ އެވެ.
މަރުވި މީހުންގެ ތެރެއިން ފަސް މީހުންނަކީ އެއް އާއިލާއަކަށް ނިސްބަތްވާ ބައެއް ކަމަށާއި، އެ މީހުން މަރުވީ ދެރާ ޕްރޮވިންސްގެ އަލް-ތައި އަވަށުގައި ހުރި ފޭލިގެއަކަށް ދިން ހަމަލާއެއްގައި ކަމަށް ސިވިލް ޑިފެންސްއިން ބުނެ އެވެ. އެ އާއިލާގެ އިތުރު ތިން މީހަކު ޒަހަމްވެފައިވާއިރު، އޭގެ ތެރޭގައި ކުޑަކުއްޖަކު ވެސް ހިމެނެ އެވެ.
ދެވަނަ ހަމަލާ އަމާޒުވީ ދެރާގެ އަލް ޝައްޔާ ސަރަހައްދަށެވެ. އެ ހަމަލާގައި އުމުރުން 80 އަހަރުގެ ފިރިހެނަކު ވަނީ މަރުވެފަ އެވެ. ތިންވަނަ ހަމަލާ ދެރާގެ އައިން އަލް-ބާސަލް ސަރަހައްދުގެ މުޒައިރިބްގައި ހުރި މީހުން ދިރިއުޅޭ އިމާރާތަކަށް އަމާޒުވި ނަމަވެސް، އެއްވެސް މީހަކަށް އަނިޔާއެއް ލިބިފައެއް ނުވެ އެވެ.
ހަތަރުވަނަ ހަމަލާ އަމާޒުވީ ސުވައިދާ ޕްރޮވިންސްގެ ޝަހްބާ އަވަށުގައި ހުރި މީހުން ދިރިއުޅޭ އިމާރާތަކަށެވެ. އެ ހަމަލާގައި އުމުރުން 60 އަހަރުގެ ފިރިހެނަކު ވަނީ މަރުވެފަ އެވެ.
މި ހަމަލާތަކަށް ފަހު، ސީރިޔާގެ ބޯޑަރު ބަލަހައްޓާ އިދާރާއިން ވަނީ ނަސީބް ބޯޑަރު ބަންދުކޮށް، ދެ ފަރާތަށް ކުރާ ދަތުރުފަތުރުތައް ހުއްޓާލާފަ އެވެ. ނަސީބް ބޯޑަރަކީ އުރުދުން އާއި ސީރިޔާއާ ދެމެދު މީހުންނާއި މުދާ އުފުލުމަށް ބޭނުންކުރާ ހަމައެކަނި ބޯޑަރެވެ.
މިދިޔަ ހޯމަ ދުވަހުގެ ކުރީކޮޅު، އުރުދުންގެ ސަލާމަތީ ބާރުތަކުން ވަނީ ފައްޅިއަށް ދިން ހަމަލާގައި ބައިވެރިވި ކަމުގެ ތުހުމަތުގައި އެއް އާއިލާއެއްގެ ތިން މީހުން ހައްޔަރުކޮށްފަ އެވެ. މި މީހުން ހައްޔަރުކުރީ އަލް-ޖަދީދާ އަވަށުގައި ސަލާމަތީ ބާރުތަކާ ދެމެދު ހިނގި ބަޑީގެ ހަމަލާތަކަކަށް ފަހުގަ އެވެ.
