މިހާރު ކުރިއަށްދާ ރިސޯޓް ސުޕަ ލީގުގެ ފައިނަލުގެ ސީދާ ޖާގަ ނ. އަތޮޅުގެ ޗެމްޕިއަން، ވެލާ ޕްރައިވެޓް އައިލެންޑް މޯލްޑިވްސް އިން ހޯދައިފި އެވެ.
ފައިނަލުގައި ވެލާއާ ދެކޮޅަށް ކުޅޭ ޓީމެއް ކަނޑައެޅޭނީ ސެމީ ފައިނަލުގައި، ދ. ޒޯންގެ ޗެމްޕިއަން، ސެއިންޓް ރެޖިސް ވޮއްމުލި އާއި ސައުތު މާލެ ޒޯންގެ ޗެމްޕިއަން، ސަން ސިޔާމް އޮޅުވެލި ބައްދަލުކުރާ މެޗުންނެވެ.
ރިސޯޓް ސުޕަ ލީގުގެ ފޯމެޓް ރޭވިފައިވާ ގޮތުން، ހޯމް އެންޑް އަވޭ މެޗުތައް ނިމުމަށް ފަހު، އެގްރިގޭޓުން އެންމެ ރަނގަޅު ނަތީޖާ ނެރޭ ޓީމަކަށް ފައިނަލުގެ ސީދާ ޖާގައެއް ލިބޭނެ އެވެ. ވެލާ އަށް އެ ޖާގަ ލިބުނީ، ބ އަތޮަޅުގެ ޗެމްޕިއަން، ފިނޮޅު ސީސައިޑް މޯލްޑިވްސް ކައިރިން 14-2 ގެ އެގްރިގޭޓަކުން މޮޅުވެގެންނެވެ.
ދެ ވަނަ އަށް އެންމެ ރަނގަޅު އެގްރިގޭޓް ނެރޭ ޓީމަކާއި ތިން ވަނަ އަށް އެންމެ ރަނގަޅު އެގްރިގޭޓް ނަތީޖާ ހޯދާ ޓީމެއްގެ މެދުގައި ސެމީ ފައިނަލް މެޗެއް ކުޅޭ ގޮތަށް އޮތްއިރު، އޮޅުވެލިން ވަނީ އެގްރިގޭޓަށް ބަލާއިރު، ނޯތު މާލެ ޒޯންގެ ޗެމްޕިއަން، ބަރޮސް އަތުން 7-2 އިން އެގްރިގޭޓުން މޮޅުވެފަ އެވެ.
ސެމީގެ ފަހު ޖާގަ ހޯދީ، ވޮއްމުލިންެނެވެ. ވޮއްމުލިން ވަނީ ރިސޯޓް ސުޕަ ލީގުގެ އެންމެ ފަހުގެ ޗެމްޕިއަން، އަރި ޒޯންގެ ޗެމްޕިއަން، ކޮންރަޑް ބަލިކޮށްފަ އެެވެ. ކޮންރަޑްގައި ކުޅުނު ފުރަތަމަ ލެގު 3-3 އިން އެއްވަރުވިއިރު، ވޮއްމުލިން ނަތީޖާ ނެރުނީ އަންގްސާނާ ވެލާވަރުގައި ކުޅުނު ލެގުގަ އެވެ. އިއްޔެ ކުޅުނު އެ މެޗުގައި، ވޮއްމުލި މޮޅުވީ 5-2 އިންެނެވެ. އެގްރިގޭޓަށް ބަލާއިރު ކުރިހޯދީ، 8-5 އިންނެވެ.
ސެމީ ފައިނަލް މެޗު އޮތީ އަންނަ އަންގާރަ ދުވަހު އެވެ. އަދި، ފައިނަލް މެޗު އޮތީ ބުރާސްފަތި ދުވަހު އެވެ.
މިދިޔަ އަހަރުގެ ރިސޯޓް ސުޕަ ލީގުގެ ފައިނަލުގައި ޖޯލި މޯލްޑިވްސްގެ މައްޗަށް ޕެނަލްޓީ ޖަހައިގެން ކުރިހޯދައި، ކޮންރެޑް މޯލްޑިވްސް ރަންގެލި އައިލެންޑުން މުބާރާތުގެ ޗެމްޕިއަންކަން ހޯދި އެވެ. ޖުމެއިރާ އޮޅަހާލި އައިލެންޑްގައި ކުޅުނު ފައިނަލް މެޗުގެ ފުރިހަމަ ވަގުތު ހަމަވިއިރު، މެޗުގެ ނަތީޖާ ވަނީ 1-1 އިން އެއްވަރުވެފަ އެވެ. އަދި، ނަތީޖާ ނެރެން ޕެނަލްޓީ ޖަހަން ޖެހުނުއިރު، ކޯންރެޑުން ވަނީ ހަތަރު ޕެނަލްޓީ ކާމިޔާބުކޮށްފަ އެވެ. ޖޯލި އަށް ދެ ޕެނަލްޓީ ވައްދާލެވުނުއިރު، ޕެނަލްޓީ ނިމުނީ، 4-2 އިން ކޮންރެޑް މޮޅުވެގެންނެވެ.
