ރާއްޖޭގައި ކުރިއަށްދާ އެންމެ ފޯރިގަދަ ރިސޯޓް ފުޓްސަލް މުބާރާތް، ރިސޯޓް ލީގުގެ ނޯތު މާލެ ޒޯންގައި މި ފަހަރު 15 ރިސޯޓެއްގެ ކުރިމަތިލުން ފެންނައިރު، ފުރަތަމަ މެޗުތައް ފޯރިގަދަ ކުރިމަތިލުންތަކަކުން ނިމިއްޖެ އެވެ.
އެ ގޮތުން، މުބާރާތުގެ ގްރޫޕް އޭގެ ފުރަތަމަ މެޗުތަކުން، ކުޑަ ހުރާ އިން 4-2 އިން ތާޖު ކޮރަލް އަތުން މޮޅުވިިއިރު، މި ގްރޫޕްގެ އަނެއް މެޗުން ސަމާ އައިލެންޑުން ވަނީ 3-1 އިން ބަރޮސް އަތުން މޮޅުވެފަ އެވެ. މި ގްރޫޕުން އެންމެ ރަނގަޅު ނަތީޖާ ނެރޭ ދެ ޓީމަކަށް ކުއާޓާ ފައިނަލުގެ ސީދާ ޖާގައެއް ލިބޭއިރު، ފުލަށް ދާ ދެ ޓީމެއް މުބާރާތުން ކަޓާނެ އެވެ.
ގްރޫޕް ބީގެ ފުރަތަމަ މެޗުތަކުން، އޯގާ އިން ވަނީ، 3-1 އިން ކުރުނބާ އަތުން މޮޅުވެފަ އެވެ. އަދި، ބަނޑޮސް އިން ވަނީ 3-1 އިން ރިޓްޒް-ކާލްޓަން ބަލިކޮށްފަ އެވެ. ހަތަރު ޓީމު ކުޅޭ މި ގްރޫޕުން އެއް ވަނަ އާއި ދެ ވަނަ އަށް ދާ ޓީމު ކުއާޓާ ފައިނަލަށް ދަތުރުކުރާއިރު، ދެން ފުލަށް ދާ ދެ ޓީމު ކަޓާނެ އެވެ.
ހަަތަރު ޓީމު ހިމެނޭ ގްރޫޕް ސީގައި މިހާތަނަށް ކުޅުނީ އެންމެ މެޗެކެވެ. އެ މެޗުން، ޖޯއީ އައިލެންޑާއި ހެލެނގެލީ ވަނީ 2-2 އިން އެއްވަރުވެފަ އެވެ. ދެން، މި ގްރޫޕްގައި ހިމެނެނީ، ސަންގެލި އާއި އާއިލާފުށި އެވެ.
ގްރޫޕް ޑީގައި ހިމެނެނީ، ތިން ޓީމެވެ. މި ގްރޫޕްގައި މިހާތަނަށް ވަނީ އެއް މެޗު ކުޅެފަ އެވެ. އެ މެޗުން، ޕަޓިނާ ވަނީ 1-0 އިން ހިލްޓަން އަތުން މޮޅުވެފަ އެވެ. މި ގްރޫޕްގައި ދެން އޮތީ، ހުވަފެން ފުށި އެވެ. މި ގްރޫޕްގެ މެޗުތަކަށް ފަހު، އެއް ވަނަ އަށް ކުއާޓާ ފައިނަލުގެ ސީދާ ޖާގައެއް ލިބޭއިރު، ދެ ވަނަ އާއި ތިން ވަނަ ޓީމުގެ މެދުގައި، ޕްލޭއޮފެއް ކުޅުމަށް ފަހު، ކުއާޓާ ފައިނަލުގެ ޖާގަ ލިބޭ ޓީމެއް ކަނޑައަޅާނެ އެވެ.
ނޯތު މާލެ ޒޯންގެ މެޗުތައް އެންމެ ފުރަތަމަ ކަނޑައެޅި ޝެޑިއުލާ އެއްގޮތަށް ކުރިއަށް ނުގެންދެވުނީ، މި ފަހުން ކުރި ވިއްސާރައިގެ ސަބަބުން މެޗުތައް ބާއްވަން އޮތް ދުވަހު ކުރިއަށް ނުގެންދެވިގެން ފަސްކުރަން ޖެހުމުންނެވެ.
