ފައިނަލް މެޗުގައި 5-6 އިން ޕެނަލްޓީ ޖަހައިގެން ބަނޑޮސް މޯލްޑިވްސް ބަލިިކޮށް، ރާއްޖޭގެ އެންމެ ފޯރިގަދަ ރިސޯޓް ފުޓްސަލް މުބާރާތް، ރިސޯޓް ލީގުގެ ނޯތު މާލެ ޒޯންގެ ޗެމްޕިއަންކަން، ބަރޮސް މޯލްޑިވްސް އިން ހޯދައިފި އެވެ.
ޖުމްލަ އެކު، 15 ރިސޯޓުން ނޯތު މާލެ ޒޯންގައި ވާދަކުރާއިރު، މުބާރާތުގެ މެޗުތައް ކުޅެނީ ބަނޑޮސް މޯލްޑިވްސްގަ އެވެ. ސެމީ ފައިނަލުގައި ބަރޮސް އިން ވަނީ 4-1 އިން ޕަޓިނާ މޯލްޑިވްސް ބަލިކޮށްފަ އެވެ. އަދި، އަނެއް ސެމީގައި ބަނޑޮސް އިން ވަނީ އޮބްލު ސެލެކްޓް ސަންގެލި 3-2 އިން ބަލިކޮށްފަ އެވެ.
އިއްޔެގެ ފައިނަލްގެ ފުރިހަމަ ވަގުތު ހަމަވިއިރު ދެ ޓީމު އޮތީ 2-2 އިން އެއްވަރުވެފަ އެވެ. ބަރޮސް އިން ލަނޑުތައް ޖެހީ މުހައްމަދު ނަޒީހު އާއި މުހައްމަދު ސަހާއު އަލީ އެވެ. ބަނޑޮސްގެ ލަނޑުތައް ޖެހީ ހުސެއިން ޝާމިހު އާއި މުހައްމަދު އިކްރާމް އެވެ.
ޕެނަލްޓީގައި، ބަނޑޮސްގެ މާހީ މުފީދު އާއި އަހުމަދު ރީހާން އަތުން ނާކާމިޔާބުވިއިރު، އެ ޓީމުން ހަސަން މުއާން، ޝަޔާން އުމަރު އަދި ޝާމިހު ޕެނަލްޓީތައް ވައްދާލި އެވެ. އަނެއްކޮޅުން، ބަރޮހުގެ ނަޒީހު އަތުން ޕެނަލްޓީ ނާކާމިޔާބުވިއިރު، އަހުމަދު މިރުސާދު، ހަސަން ސަލީމް، ސަހާއު އަދި އަބްދުﷲ ލައުސަން ޕެނަލްޓީތައް ވައްދާލި އެވެ.
މި ޒޯނުގައި އެންމެ ގިނަ ގޯލު ޖެހީ ހިލްޓަންގެ އަލީ ސާމް އެވެ. މި ޒޯނުގެ އެންމެ މޮޅު ކުޅުންތެރިއަކަށް، ބަނޑޮހުގެ އަހުމަދު ޝަމާލް ހޮވުނުއިރު، މޮޅު ކޯޗަކީ ބަރޮސްހެ އަހުމަދު މުރުތަﷲ (މުރޭ) އެވެ. މޮޅު ފަސް ކުޅުންތެރިންގެ ތެރޭގައި ހިމެނެެނީ، ބަނޑޮހުގެ އިކްރާމް، މުހައްމަދު ސުނައިޒު، ބަރޮސްގެ ހަސަން ސަލީމް، ނަޒީހު އަަދި ލައިސަން އެވެ.
