ރަސްމާލެއިން ޔޫއޭއީގެ އީގަލް ހިލްސްއަށް ދޫކޮށްލާ 500 ހެކްޓަރު ބިމުގައި އެ ކުންފުނިން ހިންގާ މަޝްރޫއުގެ ދަށުން އަޅާ ޕްރޮޕަޓީތައް ވިއްކާއިރު އެއް ގައުމެއްގެ ރައްޔިތުންނަށް އެންމެ ގިނައިން ގަނެވޭނީ 25 ޕަސެންޓު ކަމަށް ރައީސް މުހައްމަދު މުއިއްޒު މިއަދު ވިދާޅުވެއްޖެ އެވެ.
ރައީސް އޮފީހުން ގެނެސްދޭ "ދަ ޕަލްސް" ޕްރޮގްރާމުގައި މުއިއްޒު ވިދާޅުވީ ރިއަލް އެސްޓޭޓް ގާނޫނެއް ތައާރަފު ކުރުމުގެ މަސައްކަތް ކުރަމުންދާ ކަމަށާއި އެ ގާނޫނުގެ ދަށުން އެއްވެސް ގައުމެއްގެ ރައްޔިތުންނަށް ރަސްމާލެއިން ވިއްކާ ޕްރޮޕަޓީތަކުގެ 25 ޕަސެންޓަށްވުރެ ބޮޑު ހިއްސާއެއް ނުގަނެވޭނެ ކަމަށެވެ.
"މިތަނުން [ރަސްމާލެ] ޕްރޮޕަޓީ ހޯދާ މީހުންނަކީ ވަކި އެއް ގައުމެއްގެ ބަޔަކަށްވެސް ނުވާނެ އެނގޭތޯ. އަޅުގަނޑުމެން ގާނޫނުން ރިއަލް އެސްޓޭޓާ ބެހޭ ގާނޫނެއް އަދި ތައާރަފްކުރުން މިއޮތީ ކުޑަ ދުވަސްކޮޅެއްގެ ތެރޭގައި،" މުއިއްޒު ވިދާޅުވި އެވެ.
"ވަކި އެއް ގައުމެއްގެ ނަސްލަކަށް ނިސްބަތްވާ މީހުން އެނގޭތޯ. އެ ވަކި އިންސައްތައަކަށް އަޅުގަނޑުމެން ލިމިޓް ކުރާނަން. އަޅުގަނޑުމެން ކަނޑައަޅާފައި މިއޮތީ އެއްވެސް ގައުމެއްގެ ރައްޔިތުން އެންމެ ގިނަވެގެން 25 އިންސައްތައަށޭ ތިބެވޭނީ. އެނގޭތޯ. އެއަށްވުރެ ގިނައަކުންނެއް ވަކި ގައުމުތަކުގެ ރައްޔިތުން ނުތިބޭނެ."
މުއިއްޒު ވިދާޅުވީ އިޒްރޭލުގެ ރައްޔިތުންނަށް ރަސްމާލެއިން ޕްރޮޕަޓީ ނުގަނެވޭނެ ގޮތަށް ގާނޫނު ބަދަލުކުރާނެ ކަމަށެވެ. ނަމަވެސް ދިވެހިންނަށް ޕްރޮޕަޓީތައް ގަތުމަށް އެއްވެސް ލިމިޓެއް ކަނޑައެޅިފައި ނުވާނެ ކަމަށް އެމަނިކުފާނު ވިދާޅުވި އެވެ.
އޭގެއިތުރުން މިހާތަނަށް ރަސްމާލެއިން ޕްރޮޕަޓީ ގަންނަން ޝައުގުވެރިކަން ފާޅުކޮށްފައިވާ ގިނަ މީހުންނަކީ އަރަބި ގައުމުތަކުގެ މީހުންކަން ފާހަގަކުރައްވާ މުއިއްޒު ވިދާޅުވީ އެތަނުގައި ދިރިއުޅޭނީ ދިވެހިންނާއި އަރަބި އިސްލާމީ ގައުމުތަކުގެ މީހުން ކަމަށެވެ.
"މިހާރުވެސް މިތަނުން ޕްރޮޕަޓީ ގަންނަން ޝައުގުވެރިވާ މީހުންނަށް ބަލާއިރު ހަމަ ގާތްގަނޑަކަށް މުޅިންހެން ޖީސީސީ ގައުމުތައް، މެދުއިރުމަތީގެ އަރަބި ގައުމުތަކުގެ މީހުން ތިބީ އެނގޭތޯ. ދިވެހިރައްޔިތުންނާއި އަރަބިންނާއޭ އަޅުގަނޑު ދަންނަވާނީ މިތާ ތިބޭނީ. އަރަބި އިސްލާމުން އެނގޭތޯ،" މުއިއްޒު ވިދާޅުވި އެވެ.
ސަރުކާރުން ބުނަނީ ރަސްމާލެއަށް އީގަލް ހިލްސް އިން 20 ބިލިއަން ޑޮލަރު އިންވެސްޓު ކުރާނެ ކަމަށެވެ. އެކަމަކު އީގަލް ހިލްސް އިން ބުނަނީ އެ ކުންފުނިން އިންވެސްޓު ކުރާނީ 12 ބިލިއަން ޑޮލަރު ކަމަށެވެ. އަލައްބާރު ފަހުން ވިދާޅުވީ 20 ބިލިއަން ޑޮލަރަކީ އެތަނުގެ މަސައްކަތް ނިމުމުން ތަނުގެ އަގު ހުންނާނެ މިންވަރު ކަމަށެވެ.
ރަސްމާލެ ދޫކޮށްލަނީ 99 އަހަރަށް ކަމަށް ސަރުކާރުން ބުނެ އެވެ. އެއީ ގާނޫނުތައް ހުއްދަ ކުރާ ކަމަކަށް ނުވާތީ ސަރުކާރުން އުޅެނީ އެ ޕްރޮޖެކްޓަށް ފަހިކުރަން ގާނޫނުތަކެއް ހަދާށެވެ. އަދި ނޮވެމްބަރު 11، ގައި އެގްރިމެންޓުގައި ދާއިމީ އެގްރިމެންޓުގައި ސޮއި ކުރެވޭތޯ މިހާރު ދަނީ މަސައްކަތް ކުރަމުންނެވެ.
ރަސްމާލެ ހިއްކުމުެގ ޕްރޮޖެކްޓަކީ ޑިސެމްބަރު 17، 2023 ގައި ފެށި ޕްރޮޖެކްޓެކެވެ. އޭރު ބުނީ އަށް މަސް ތެރޭގައި ބިން ހިއްކާ ނިންމާލާނެ ކަމަށެވެ. ނަމަވެސް އެ ތާރީހާއި އެ ފަހުން ދިން އެއްވެސް ތާރީހަކަށް ރަސްމާލެ ހިއްކާ ނުނިމޭއިރު، މިއަދާ ހަމައަށް މި ޕްރޮޖެކްޓަށް 1000 އަށް ވުރެ ގިނަ ދުވަސް ވޭތުވެއްޖެ އެވެ.
