ޕެނަލްޓީ ޖަަހައިގެން ހާޑް ރޮކް ހޮޓެލް މޯލްޑިވްސް 5-4 އިން ބަލިކޮށް ސަން ސިޔާމް އޮޅުވެލިން ރިސޯޓް ލީގު ސައުތު މާލެ ޒޯންގެ ޗެމްޕިއަންކަން ހޯދައިފި އެވެ.
އޮޅުވެލިން މި ޒޯނުގެ ތަށި އުފުލާލާފައި ވަނީ ދެ ފަހަރަށެވެ. މީގެ އެއް އަހަަރު ކުރިން ވެސް އެ ޓީމުން ވަނީ މި ޒޯނުގެ ޗެމްޕިއަންކަން ހޯދައިފަ އެވެ.
ޖުމްލަ އެކު 12 ޓީމާ އެކު ކުރިއަށް ދިޔަ މި ޒޯނުގެ މެޗުތައް އޮތީ އޮޅުވެލީގަ އެވެ. އިއްޔެގެ ފައިނަލުގައި ފުރިހަމަ ވަގުތު ހަމަވިއިރު، މެޗު އޮތީ 2-2 އިން އެއްވަރުވެފަ އެވެ. ޕެނަލްޓީގައި އޮޅުވެލިން ތިން ޕެނަލްޓީ ވައްދާލިއިރު، ހާޑް ރޮކަށް ޖެހުނީ ދެ ޕެނަލްޓީ އެވެ.
އޮޅުވެލީގެ ހަސަން ސުހެއިލް އަތުން ބައިކޮޅަށް ގޯލެއް ވަންއިރު، ހާޑް ރޮކްގެ އަނެއް ލަނޑު ޖެހީ މުހައްމަދު ތަޝްމީން (ތައްތި) އެވެ. އޮޅުވެލީގެ ލަނޑުތައް ޖެހީ އަބްދުﷲ ސިނާން އާއި އަލީ ޝިއާއު އެވެ.
ޕެނަލްޓީގައި އޮޅުވެލީގެ ސިނާން، އާފާގު ހަމީދު އަދި މުހައްމަދު ވިގާމް އަތުން ނާކާމިޔާބުވިއިރު، އެ ޓީމުގެ އަހުމަދު ޒައިން، ނާއިލް ސޮބާހު އަދި އަބްދުﷲ ހާޒިމް ޕެނަލްޓީ ވައްދާލި އެވެ. ހާޑް ރޮކުން ތައްތި، ސުހެއިލް، ހަސަން އިނާދު އަލީ އަދި މުހައްމަދު އައިލަމް އަތުން ޕެނަލްޓީ ނާކާމިޔާބުވިއިރު، އަހުމަދު މަޝީދު އަދި އަހުމަދު އަޝްރަފް ޔޫސުފް (ސޮބީ) ވަނީ ޕެނަލްޓީ ކާމިޔާބުކޮށްފަ އެވެ.
ސައުތު މާލެ ޒޯންގެ ފޯމެޓް ރޭވިފައި އޮތްގޮތުން، ކޮންމެ ގްރޫޕެއްގެ ވެސް އެއް ވަނަ ޓީމަށް ކުއާޓާ ފައިނަލުގެ ސީދާ ޖާގައެއް ލިބުނެވެ. ދެން، ކޮންމެ ގްރޫޕެއްގައި ހިމެނޭ އަނެއް ދެ ޓީމު ކުޅެން ޖެހޭނީ ޕްލޭއޮފް ބުރުގަ އެވެ. އަދި، ޕްލޭއޮފުން މޮޅުވާ ޓީމުތަކަށް ކުއާޓާ ފައިނަލްގެ ފަހު ހަތަރު ޖާގަ ލިބުނެވެ. ހާޑް ރޮކުން ފައިނަލަށް އައީ ގްރޫޕްގެ އެއް ވަނަ ހޯދައިގެންނެވެ. އޮޅުވެލި އަށް ގްރޫޕްގެ ފުލުން ޖާގަ ލިބުނު ނަަމަވެސް ފަހުން ކަންކަން ރަނގަޅުކޮށް ފައިނަލާ ހަމަައަށް އައިސް ޗެމްޕިއަންކަން ހޯދީ އެވެ.
މި ޒޯނުގެ އެންމެ މޮޅު ކުޅުންތެރިއަކީ އޮޅުވެލީގެ ޝިއާއު އެވެ. އެންމެ މޮޅު ކޯޗަކީ އޮޅުވެލީގެ އަހުމަދު ތޯހާ އެވެ. އެންމެ ގިނަ ގޯލު ޖެހީ، މާދޫގެ މުހައްމަދު މުއްސަފު އިބްރާހިމް އެވެ. އޭނާ ވަނީ ޖުމްލަ ހަ ގޯލު ޖަހައިފަ އެވެ.
ސައުތު މާލެ ޒޯންގެ އެންމެ މޮޅު ފަސް ކުޅުންތެރިންގެ ތެރޭގައި ހިމެނެނީ، އޮޅުވެލީގެ ވިގާމް އާއި އަބްދުﷲ ސުމައިދު ސޯލިހުގެ އިތުުރުން ހާޑް ރޮކްގެ ތައްތި، ސޮބީ އަދި މަޝީދު އެވެ.
