މީހުންގެ ފުރާނައަށް ނުރައްކާވާ ހާލަތުގައި އެއާ އެމްބިއުލާންސްގައި ގެނެސް އާސަންދައިގެ ދަށުން ދޭ ހިދުމަތާއި ރައްޔިތުންގެ މަޖިލީހުގެ މެންބަރުންގެ މެޑިކަލް އިންޝުއަރެންސާ އަޅައި ކިޔުއްވައިފި އެވެ.
އާންމު ރައްޔިތުންނަށް ނުލިބޭ ސިއްހީ އިންޝުއަރެންސްއެއް އާންމު ރައްޔިތުންގެ ފައިސާއިން އެ އާންމުން ތަމްސީލް ކުރަން މަޖިލީހަށް ވަޑައިގަންނަވާ މެންބަރުންނަށް ދިނުމާ ދެކޮޅަށް ގޮވާލައި މަޖިލީހަށް ހުށަހަޅާފައިވާ ޕެޓިޝަނުގައި 7225 މީހުން ސޮއިކޮށްފައިވެ އެވެ.
އެ ޕެޓިޝަނާ ގުޅޭގޮތުން ބަހުސްކުރައްވަމުން ރައްޔިތުންގެ މަޖިލީހުގެ ފޭދޫ ދެކުނު ދާއިރާގެ މެންބަރު، އިބްރާހިމްދީދީ ވިދާޅުވީ މަޖިލިސް މެންބަރުންގެ ސިއްހީ ފަރުވާއަށް ރާއްޖެއިން ބޭރަށް ވަޑައިގެން ގިނަ ހަރަދު ކުރައްވަނީ އެ ބޭފުޅުންގެ އަމިއްލަ ޖީބުން ކަމަށެވެ.
"އާސަންދައިން ބޭސްކުރަން ބަލިވީމާ ޓަސްލާފައި އެއާ އެމްބިއުލާންސް ގޮސްގެން އެ މީހަކު ހަމަ 100،000ރ. ހަރަދުކޮށްގެން ވެސް ސަރުކާރުން ނަގައިގެން އައިސް އެމީހަކަށް ބޭސް އެބަކުރެވޭ އެ މީހެއްގެ ބަލިން ރައްކާތެރިވަންދެން އެއީ ހަ މިލިއަންވިޔަސް، ހަތް މިލިއަން ވެސް ހަރަދުކުރެވިފައި އެބަހުރި ބައެއް އެކްސިޑެންޓުތަކުގައި ބޭރަށް ފޮނުވައިގެން،" އިބްރާހިމްދީދީ ވިދާޅުވި އެވެ.
"އެކަމަކު މަޖިލިސް މެންބަރެއްގެ އަހަރެއްގެ އިންޝުއަރެންސަށް 24،000ރ.، އެ 24،000ރ. އަހަރަކު އޮންނައިރު، މި ތަނުން ބަޖެޓު ކަނޑައަޅާފައި އޮންނަ އަދަދަށް ވެސް މި ތަނުން ބޭނުން ނުކުރެވޭ ގިނަފަހަރު."
އޭނާ ވިދާޅުވީ މަޖިލިސް މެންބަރުންގެ ސިއްހީ އިންޝުއަރެންސް ކަނޑައިލުމަށް ގޮވާލައި ޕެޓިޝަނެއް ހުށަހަޅައިގެން އުޅެނީ ރައްޔިތުންގެ މެދުގައި ފިތުނަ އުފެއްދުމަށްޓަކައި ކަމަށެވެ. އާސަންދައިގެ ދަށުން ލިބޭ ހިދުމަތްތަކާއި މެންބަރުންގެ މެޑިކަލް އިންޝުއަރެންސާ އޭނާ އަޅައި ކިޔުއްވީ އެކަން ސާބިތުކޮށްދެއްވުމަށް ކަމަށް ވިދާޅުވެ އެވެ.
"އަޅުގަނޑުމެން ދަތުރު މި ކުރަނީ އަޅުގަނޑުމެންގެ އަމިއްލަ ހަރަދުގައި ރާއްޖެއިން ބޭރަށް، އެކަމަކު އާސަންދައިން އެހީތެރިޔާ އަށާއި އަދި، ބައެއް ފަހަރު ދެ އެހީތެރިންނަށް ވެސް ޓިކެޓު ދެއްވާފައި ސަރުކާރުން، ދައުލަތުން މި ފޮނުވަނީ ރައްޔިތުންނަށް ބޭސްކުރަން ރާއްޖެއިން ބޭރަށް ހަމަ އެކިއެކި ގައުމުތަކުގެ ހޮސްޕިޓަލްތަކުން،" އިބްރާހިމްދީދީ ވިދާޅުވި އެވެ.
"އަދި، ބައެއްފަހަރު އެންސްޕާއިން އެބަދެއްވާ ހަމަ، ރައްޔިތުންނަށް އެ މީހުން ހުރުމާއި ކެއުމާއި އަދި، އެހެނިހެން އެހީތެރިކަން ވެސް. މަޖިލިސް މެންބަރުންނަކަށް މި އެއްޗެއްސެއް ނުލިބޭ ނޫންތޯ؟"
ކޮންމެ މެންބަރަކާއި އެ މެންބަރެއްގެ އަނބިމީހާ/ފިރިމީހާ އަދި އުމުރުން 18 އަހަރު ނުފުރޭ ދަރިން ރާއްޖެއާއި ސާކް ގައުމުތަކާއި އަދި އާސިއާންގެ ގައުމުތަކުން ސިއްހީ ފަރުވާ ލިބޭނެ ފަދަ މެޑިކަލް އިންޝުއަރެންސް ސްކީމެއްގައި ބައިވެރި ކޮށްދޭން ވާނެ ކަމަށް ބުނަނީ މެންބަރުން އިމްތިޔާޒުތަކުގެ ގާނޫނުގަ އެވެ. އެއީ ކުރީގެ މެންބަރުންނަށް ވެސް ހެލްތު އިންޝޫރެންސް ލިބޭ ގާނޫނެވެ.
އިބްރާހިމްދީދީ ވިދާޅުވީ ދިވެހި ހުރިހާ ރައްޔިތުންނަށް ވެސް މެޑިކަލް އިންޝުއަރެންސް ލިބުމަށް އެދިވަޑައިގަންނަވާ ކަމަށާއި ރައްޔިތުން އެކަމަށް އެދޭނަމަ، އާސަންދައިން ވަކިވެ މެޑިކަލް އިންޝުއަރެންސް ޕެކޭޖެއް އެ މީހުންނަށް ހަމަޖެއްސުން އެއީ އެންމެ ރަނގަޅު ގޮތް ކަމަށެވެ.
"އަޅުގަނޑު ހަމަ، މިވަގުތު އެދެން ރައްޔިތުން މި ގޮތަށް ގަބޫލިއްޔާ ދިވެހި ހުރިހާ ރައްޔިތުން ވެސް އާސަންދައިން ކެނޑިގެން އިންޝުއަރެންސް ޕެކޭޖެއްގައި ޖަހަންވީނުންތޯ؟ އޭރުން އާސަންދައެއް ނޫން، އަޅުގަނޑުމެންނަށް ވެސް އޭރުން ލިބޭނީ އިންޝުއަރެންސް ނޫންތޯ؟ ހުރިހާ ރައްޔިތުންނަށް އިންޝުއަރެންސް ލިބޭނެ،" އިބްރާހިމް ދީދީ ވިދާޅުވި އެވެ.
މިއަދުގެ ބަހުސްގައި ބައިވެރިވެވަޑައިގެންނެވި ޕީއެންސީގެ މެންބަރުން ވިދާޅުވީ މަޖިލީހަށް ހުށަހަޅާފައިވާ ޕެޓިޝަނަކީ ރައްޔިތުންގެ ހިތުގައި މެންބަރުންނާމެދު ނަފުރަތު އުފެއްދުމަށްޓަކައި ހުށަހަޅާފައިވާ ޕެޓިޝަނެއް ކަމަށެވެ.
