މަސްތުވާތަކެތީގެ ވިޔަފާރިކުރާކަމުގެ ތުހުމަތުގައި އއ. ރަސްދޫގެ 10 ގެއެއް ބަލައިފާސްކޮށް ނުވަ މީހަކު ހައްޔަރުކޮށްފި އެވެ.
އެ މައްސަލައިގައި ހައްޔަރުކޮށްފައި ވަނީ އަށް ދިވެހިންނާއި ބިދޭސީއެކެވެ. ހައްޔަރުކުރި ދިވެހީންގެ ތެރޭގައި ހިމެނެނީ ރަސްދޫއަށް ނިސްބަތްވާ ހަ މީހުންނާއި އއ. ތޮއްޑޫއަށް ނިސްބަތްވާ ފިރިހެނަކާއި ހދ. ކުމުންދޫއަށް ނިސްބަތްވާ އަންހެނެކެވެ.
ހައްޔަރުކުރި މީހުންގެ ތެރެއިން އިބްރާހިމް ދީނާން، ހަވާމަންޒިލް، އއ. ރަސްދޫ އާއި ރިމާޒު މުހައްމަދު، ހިކިފިނިފެންމާގެ، އއ. ތޮއްޑޫ އާއި އަލީ ވަސީމް، ކާނޭޝަންމާގެ، އއ. ރަސްދޫ އަދި، މެހެދީ ހަސަން، ބަންގްލަދޭޝް ކޯޓަށް ހާޒިރުކުރުމުން 10 ދުވަހަށް ބަންދުުކުރަން އަމުރުކޮށްފައިވާ ކަމަށް ފުލުހުން ބުންޏެވެ.
އަދި، އެ މައްސަލައިގައި ހައްޔަރުކުރި މުހައްމަދު އުލްވާން ރަޝީދު، ލިލީވީޑް، އއ. ރަސްދޫ އާއި އަހުމަދު އަރީފް، ގުލްދަސްތާގެ، އއ. ރަސްދޫ އާއި އަހުމަދު މުހައްމަދު، ކާނޭޝަންމާގެ، އއ. ރަސްދޫ ފަސްދުވަހަށް އަދި، އަހުމަދު އިކްލީލް، ފެހިވިނަ، އއ. ރަސްދޫ ހަތް ދުވަހަށް ބަންދުކުރަން އަމުރުކޮށްފައިވާ ކަމަށް ފުލުހުން ބުންޏެވެ. އެ މައްސަލައިގައި ހައްޔަރުކުރި ލީނާ މޫސާ، ވިދުވަރުގެ، ހދ. ކުމުންދޫ ބަންދުކުރަން ކޯޓުން އަމުރުކޮށްފައި ވަނީ ތިން ދުވަހުގެ މުއްދަތަކަށެވެ.
ފުލުހުން ބުނީ އެ މީހުން ހައްޔަރުކުރީ ޑްރަގް އެންފޯސްމެންޓާއި ކައުންޓާ ނާކޮޓިކްސް އިންޓެލިޖެންސް އަދި، އއ. އަތޮޅު ފުލުހުން ގުޅިގެން އިއްޔެ ކުރިއަށް ގެންދިޔަ އޮޕަރޭޝަނެއްގެ ތެރެއިން ކަމަށެވެ.
އެ އޮޕަރޭޝަނުގެ ތެރެއިން ބަލައިފާސްކުރި ގޭގެއިން މަސްތުވާތަކެއްޗާއި ބަނގުރާ އުފެއްދުމަށް ބޭނުންކުރާ ކަމަށް ބެލެވޭ ސާމާނު ފެނިފައިވާ ކަމަށް ފުލުހުން ބުންޏެވެ.
