ރާއްޖޭގެ ބިން ބިދޭސީންނަށް މިލްކުކޮށްދިނުމުގެ އިހުތިޔާރު ސަރުކާރަށް ނޯންނާނެ ކަމަށް އިދިކޮޅު އެމްޑީޕީން މިއަދު ބުނެފި އެވެ.
އެމްޑީޕީން ނެރުނު ނޫސް ބަޔާނެއްގައި ބުނީ ރާއްޖޭގެ ބިން ބިދޭސީންނަށް މިލްކުވާނެ ފަދަ އެއްވެސް ސިޔާސަތެއް އެކަށައެޅުމުގެ ބާރު ނުވަތަ އެފަދަ ގޮތަކަށް އެއްބަސްވުމެއް ހެދުމުގެ އިހުތިޔާރު ސަރުކާރަށް ނޯންނާނެ ކަމަށާއި އެކަމާ މެދު ގޮތެއް ނިންމަންޖެހޭނީ ދިވެހި ރައްޔިތުން ކަމަށެވެ.
"ދިވެހިރާއްޖޭގެ ބިން ބިދޭސީންނަށް މިލްކުވާނެ ފަދަ އެއްވެސް ސިޔާސަތެއް އެކަށައެޅުމުގެ ބާރު ނުވަތަ އެއްބަސްވުމެއް ހެދުމުގެ އިހުތިޔާރު ސަރުކާރަކަށް ނޯންނާނެ. އެ ކަމާމެދު ގޮތެއް ނިންމާނަމަ، އެކަން ނިންމަންވާނީ ސީދާ ދިވެހި ރައްޔިތުން،" އެމްޑީޕިން ބުންޏެވެ.
އެމްޑީޕީން ބުނީ ރައްޔިތުންގެ ހިޔާލު ހޯދުމުގެ އާއްމު ވޯޓެއް މެދުވެރިކޮށް، ރައްޔިތުން އެ ކަމުގައި ދެކޭގޮތް ބެލުމަށްފަހުގައި ނޫނީ، ރައްޔިތުންގެ ނަމުގައި ބިދޭސީންނަށް ބިން މިލްކުވާ ގޮތަށް ހެދުން ފަދަ މުއާމަލާތްތަކަށް ނުވަނުމަށް ސަރުކާރަށް ގޮވާލާ ކަމަށެވެ.
ޔޫއޭއީގެ އީގަލް ހިލްސްއަށް ފުށިދިއްގަރުފަޅުގެ ބޮޑު ބައެއް ދިނުމަށް ހިންގާ މުއާމަލާތުގައި ސަރުކާރުން މިހައިތަނަށް އަމަލުކުރަމުންދާ ގޮތުން އެމްޑީޕީން ކަންބޮޑުވުން ފާޅުކުރި އެވެ. އެ ޕާޓީން ބުނީ ސަރުކާރުން މިހާތަނަށް އެ ކަމާ ގުޅިގެން ހާމަކުރި މައުލޫމާތު ދިމާނުވުމާއި، ފުރިހަމަ މައުލޫމާތު ހިއްސާކުރަން ފަސްޖެހުމަކީ ނުރައްކާތެރިކަމުގެ ނިޝާނެއް ކަމަށެވެ.
އީގަލް ހިލްސްއާއެކު ހެދި އެއްބަސްވުން ދެމިގެންދާނެ މުއްދަތާއި، ދިވެހި ދައުލަތުން އަދާކުރަންޖެހޭ މަސްއޫލިއްޔަތުތަކާއި، އުފުލަންޖެހޭ މާލީ އިލްތިޒާމުތަކާއި، ބޭރުގެ ފަރާތަށް ދޭ މާލީ ލުއިތަކާއި އިސްތިސްނާތަކާއި، އަދި އެ ފަރާތުން އަދާކުރަންޖެހޭ މަސްއޫލިއްޔަތުތަކާއި އެންމެހައި ޒިންމާތައް ރައްޔިތުންނަށް ސާފުވާނެހެން ހާމަކުރަން އެމްޑީޕީން ގޮވައިލި އެވެ.
"މި ދެންނެވި މަޝްރޫއުގެ ދަށުން، ދިވެހިރާއްޖޭގެ ބިން ބިދޭސީންނަށް މިލްކުވާނެ އެއްވެސް އުސޫލަކަށް އެއްބަސްވެފައިވާކަން ނުވަތަ ނޫންކަން ކަށަވަރުކޮށްދިނުމަށް ސަރުކާރަށް ގޮވައިލަން. މީގެ އިތުރުން، މި މަޝްރޫއުގެ ދަށުން ހިންގާ އެއްވެސް މުއާމަލާތެއްގެ ސަބަބުން، މުސްތަގުބަލުގައި ދިވެހި ބިމުގެ މައްޗަށް ބިދޭސީންގެ ދާއިމީ މިލްކުވެރިކަމުގެ ހައްގެއް އުފަންވެދާނެފަދަ އެއްވެސް ކަމެއްވެސް ހިމެނިފައިވާކަން ނުވަތަ ނޫންކަން ސާފުކޮށްދިނުމަށް ސަރުކާރަށް ގޮވައިލަން،" އެމްޑީޕީން ބުންޏެވެ.
ނަމަވެސް އެމްޑީޕީން ބުނީ އެ ޕާޓީން ބޭރުގެ އިންވެސްޓަރުންނަށް އަބަދުވެސް މަރުހަބާ ކިޔާ ކަމަށާއި އެ ފަރާތްތަކަކީ ދިވެހި ރާއްޖޭގެ ތަރައްގީގައި ނުހަނު މުހިންމު ބައެއްކަމުގައި ދެކޭ ކަމަށެވެ.
އޭގެއިތުރުން ރާއްޖޭގެ އިގްތިސާދު އެހެން ހަރުފަތަކަށް ގެންދިއުމަށްޓަކައި، ޕްރައިވެޓް ސެކްޓަރު ފުޅާކޮށް، މިނިވަން ވިޔަފާރީގެ ފުރުސަތުތައް އިތުރަށް ހުޅުވައިލުމުގެ ގޮތުން ހަރުދަނާ އުސޫލުތަކުން ކުރާ ކޮންމެ ކަމަކަށް އެމްޑީޕީން ތަރުހީބު ދޭނެ ކަމަށްވެސް ބުންޏެވެ.
ރަސްމާލޭގެ 500 ހެކްޓަރުގެ ބިން އިޒްރޭލަށް ވާގިވެރިވާ ޔޫއޭއީގެ އީގަލް ހިލްސްއަށް ދޭން ސަރުކާރުން ނިންމާފައި 99 އަހަރަށް ކަމަށް ސަރުކާރުން ބުނި ނަމަވެސް، އެގްރިމެންޓު ފްރޭމްކޮށްފައި އޮތް ގޮތުން އެތަން އެއްކޮށް ގެއްލޭނެ އެވެ.
ރަސްމާލެއިން ޕްރޮޕަޓީސް ގަންނަ މީހާއަށް ލިބޭ މީހާ އެތަން ވިއްކާލުމުން، އަލުން 99 އަހަރުގެ އާ ލީސް މުއްދަތެއް ފެށޭނެ އެވެ. އަދި ހިބައިން ދިނަސް އަނެއްކާ 99 އަހަރުގެ އާ ލީސް މުއްދަތެއް ފެށޭނެ އެވެ. މިކަން ވަނީ އީގަލް ހިލްސް އިން ޔަގީންކޮށްދީފަ އެވެ.
