ވިހިވަނަ ގަރުނުގައި ހިނގާފައިވާ އެންމެ ބޮޑު އެއް ހައިރާން ކުރުވަނިވި ހާދިސާ ކަމަށްވާ، މަޝްހޫރު އޭވިއޭޓަރު އެމީލިއާ އިއާހާޓް 1937 ވަނަ އަހަރު ގެއްލުމާ ގުޅޭ އާ ހެކިތަކެއް ހޯދުމަށް އެމެރިކާގެ މެރިން އާކިއޮލޮޖިސްޓުންގެ ޓީމަކުން ޕެސިފިކް ކަނޑުގެ ހުޅަނގު ބިތުގައިވާ ކުޑަ ރަށަކަށް ދަތުރު ފަށައިފި އެވެ.
އެމީލިއާ އިއާހާޓްގެ ހަނދާންތަކާ ގުޅިފައިވާ ޕާޑިއު ޔުނިވާސިޓީގެ އެހީތެރިކަމާއެކު ކުރިއަށްގެންދާ މި ދަތުރުގެ މަގްސަދަކީ، މީގެ ހަ އަހަރު ކުރިން ސެޓެލައިޓް ފޮޓޯތަކުން އެ ރަށުގެ ފަޅުތެރެއިން ފެނުނު އެއްޗަކީ އިއާހާޓް ދަތުރުކުރި "ލޮކްހީޑް އިލެކްޓްރާ 10-އީ" މަރުކާގެ ދެ އިންޖީނުލީ ބޯޓުގެ ބައިތައްތޯ ކަށަވަރު ކުރުމެވެ.
މި ބޯޓުގެ ބައިތައް ފެނިއްޖެނަމަ، ބައެއް ތަހުގީގުވެރިން ގަބޫލުކުރާ ގޮތަށް، އިއާހާޓް އާއި އޭނާގެ ނެވިގޭޓަރު ފްރެޑް ނޫނަން، ތެޔޮ އެޅުމަށް ކަނޑައަޅާފައިވާ މަންޒިލާ އެތައް ސަތޭކަ މޭލެއް ދުރުގައިވާ މި މުރަކަ ރަށަށް ބޯޓު ޖައްސަން އުޅުމުގެ ތެރޭގައި އެކްސިޑެންޓްވެ، އެ ރަށުގައި ތާށިވެ މަރުވީކަން ކަށަވަރުވާނެ އެވެ.
މި މަހުގެ ކުރީކޮޅު ލޮސް އެންޖެލިސް އިން ފުރި މި ޓީމު، ކިރިބަތީ ރިޕަބްލިކްގެ ފީނިކްސް އައިލެންޑްސްގައި ހިމެނޭ ފަޅު ރަށެއް ކަމަށްވާ ނިކުމަރޯރޯ އަށް 13 އޮކްޓޯބަރުގައި ދާނެ އެވެ.
މި މިޝަންއާ ގުޅޭގޮތުން ނެރުނު ބަޔާނެއްގައި، އޮރެގަންގެ ޔޫޖީންގައި ހުންނަ އާކިއޮލޮޖިކަލް ލެގަސީ އިންސްޓިޓިއުޓްގެ ވެރިޔާ އަދި ޕާޑިއު ޔުނިވާސިޓީއާ ގުޅިގެން މި މަސައްކަތް އިސްކޮށް ބަލަހައްޓަވާ ރިޗަޑް ޕެޓިގްރޫ ވިދާޅުވީ، އިއާހާޓްގެ އިލެކްޓްރާ ބޯޓު ފެނުމަކީ އޭނާގެ މުޅި އުމުރުގައި ވެސް ހޯދޭނޭ އެންމެ ބޮޑު ހޯދުމަށް ވާނެ ކަމަށެވެ.
މި ދަތުރުގެ ތައްޔާރީތަކަށް މިދިޔަ ހަފުތާގައި ފިޖީގައި ހުންނެވި، ޕާޑިއު ޔުނިވާސިޓީގެ ޖެނެރަލް ކައުންސެލް އަދި މި އެކްސްޕެޑިޝަންގެ މެންބަރު ސްޓީވް ޝުލްޓްޒް ދެއްވި އިންޓަވިއުއެއްގައި ވިދާޅުވީ، މިއީ އޭވިއޭޝަން ތާރީޚުގައި އަދި ޚާއްސަކޮށް 20 ވަނަ ގަރުނުގައި ދިމާވި އެންމެ ބޮޑު އެއް ސިއްރު ހައްލުކުރުން ކަމަށެވެ.
ނަމަވެސް، މި މިޝަން ކާމިޔާބުވާނެ ކަމާ މެދު ޝައްކު އުފައްދާ ފަރާތްތައް ވެސް އެބަތިއްބެވެ. އޭގެ ތެރޭގައި އިއާހާޓްގެ މައްސަލަ ދިރާސާކުރާ ވާދަވެރި އެކްސްޕްލޯރާ، "ދަ އިންޓަނޭޝަނަލް ގްރޫޕް ފޯ ހިސްޓޮރިކް އެއާކްރާފްޓް ރިކަވަރީ" (ޓައިގާ) ގެ ކޯ-ފައުންޑަރު ރިކް ގިލެސްޕީ ހިމެނެ އެވެ. އޭނާއަކީ 2024 ވަނަ އަހަރު ނެރުނު "ވަން މޯ ގުޑް ފްލައިޓް: ދަ އެމީލިއާ އިއާހާޓް ޓްރެޖެޑީ" ފޮތުގެ މުސައްނިފު ވެސް މެއެވެ.
މީގެ ކުރިން ދެ ފަހަރެއްގެ މަތިން މީގެ މިޝަން ކުރިއަށް ގެންދިޔަ ނަމަވެސް ކާމިޔާބެއް ނުވެ އެވެ. އެމީލިއާ އިއާހާޓް އެންމެ ފަހުން ފެނުނީ ޖުލައި 2، 1937 ގަ އެވެ. އެމެރިކާއިން ބުނާ ގޮތުގައި އޭނާގެ މަތިންދާބޯޓު ވަނީ ވެއްޓިފަ އެވެ. ނަމަވެސް މިހާތަނަށް އެ ބޯޓުގެ ބައިތައް އަދި އޭނާގެ ހަށިގަނޑު ފެނިފައެއް ނުވެ އެވެ.
