އެމެރިކާގެ ކަންޓްރީ މިއުޒިކް ތަރި އެލާ ލެންގްލީ، އޮކްލަހޯމާގެ ޓަލްސާގައި ހުކުރު ދުވަހުގެ ރޭ ބޭއްވުމަށް ހަމަޖެހިފައި އޮތް ކޮންސެޓް "ސީރިއަސް ސެކިއުރިޓީ ނުރައްކަލަކާ" ގުޅިގެން ކެންސަލްކޮށްފި އެވެ.
ހުރިހާ ޓިކެޓެއް ވިކި ހުސްވެފައިވާ މި ޝޯ ކެންސަލްކުރިކަން އޭނާ އިއުލާންކުރީ ޝޯ ފެށުމުގެ ގާތްގަނޑަކަށް ދެ ގަޑިއިރު ކުރިންނެވެ.
މި ކޮންސެޓް ބޭއްވުމަށް ހަމަޖެހިފައި އޮތީ 19،000 މީހުންގެ ޖާގަ އޮންނަ އެރީނާއެއްގަ އެވެ. އުމުރުން 27 އަހަރުގެ ލެންގްލީ ބުނީ، މިއީ ނިންމަން ވަރަށް އުނދަގޫވި ނިންމުމެއް ނަމަވެސް، މި ފިޔަވަޅު އެޅީ އޭނާގެ ސަޕޯޓަރުންނާއި، އެ ތަނުގެ މުވައްޒަފުންގެ އިތުރުން އޭނާގެ ޓީމުގެ ސަލާމަތާއި ރައްކާތެރިކަމަށްޓަކައި ކަމަށެވެ.
ޓަލްސާ ޕޮލިސް ޑިޕާޓްމަންޓުގެ ކެޕްޓަން ރިޗަޑް މިއުލެންބާގް ވިދާޅުވީ، އެ ކޮންސެޓުގައި ބަޑިޖަހައި ބޮން ގޮއްވައިގެން ބޮޑެތި ގެއްލުންތަކެއް ދޭނެ ކަމަށް ބުނެ މީހަކު ފޯނުން ގުޅައި އިންޒާރު ދީފައިވާ ކަމަށެވެ.
ފުލުހުން ބުނީ އެއީ ސައްހަ ނުރައްކަލެއް ކަމަށް ބެލެވޭނެ އެއްވެސް ހެއްކެއް ފެންނަން ނެތް ކަމަށެވެ. މިކަމާ ގުޅޭ އިތުރު ތަފުސީލެއް ދީފައި ނުވި ނަމަވެސް، ލެންގްލީ ވަނީ އޭނާގެ ސަޕޯޓަރުންގެ ކިބައިން މައާފަށް އެދިފަ އެވެ. އަދި ޓިކެޓަށް ފައިސާ އަނބުރާ ދިނުމާ ގުޅޭ މައުލޫމާތު ވީ އެންމެ އަވަހަކަށް ހިއްސާކުރާނެ ކަމަށް އޭނާ ބުންޏެވެ.
ބީ.އޯ.ކޭ ސެންޓަރުން ނެރުނު ބަޔާނެއްގައި ބުނެފައިވަނީ، އެންމެންގެ ސަލާމަތާއި ރައްކާތެރިކަމަކީ އެ ތަނުން އެންމެ އިސްކަންދޭ ކަންތައް ކަމަށެވެ. އަދި ކަންކަން ވަރަށް ބޮޑަށް ބެލުމަށްފަހު، ޝޯ ކުރިއަށް ނުގެންދެވޭނެ ކަމަށް ނިންމީ ކަމަށް ވެސް އެ ބަޔާނުގައިވެ އެވެ.
މިދިޔަ ސެޕްޓެމްބަރު މަހު ލެންގްލީގެ މަގުބޫލު ލަވަ "ޗޫސިން ޓެކްސަސް" ވަނީ މަރާޔާ ކެރީގެ މަޝްހޫރު ލަވަ "އޯލް އައި ވޯންޓް ފޯ ކްރިސްމަސް އިޒް ޔޫ" އަށް ވުރެ ކުރި ހޯދައި، އެމެރިކާގެ ޗާޓު ތާރީޚުގައި އެންމެ ގިނަ ދުވަހު އެއްވަނައިގައި އޮތް ސިންގަލް ލަވައިގެ ރެކޯޑު މުގުރާލާފަ އެވެ.
އެލަބާމާ އަށް ނިސްބަތްވާ މި ލަވަކިޔުންތެރިޔާ ހޯދި މި ކާމިޔާބީއާއެކު، މިދިޔަ މޭ މަހު ބޭއްވި އެކަޑަމީ އޮފް ކަންޓްރީ މިއުޒިކް އެވޯޑްސްގައި އޭނާ ވަނީ ގިނަ އެވޯޑްތަކެއް ކާމިޔާބުކޮށްފަ އެވެ.
