މަސްތުގެ ހާލަތުގައި ހުރެގެން ވެހިކަލްތައް ދުއްވުން އާދަޔާ ހިލާފަށް އިތުރުވެފައިވާ މައްސަލަ ސަމާލު ކަމަށް އައިސްފައިވާ ކަމަށް ހޯމް މިނިސްޓަރު އަލީ އިހުސާން ރޭ ވިދާޅުވެއްޖެ އެވެ.
ރައީސް އޮފީހުން ބޭއްވި "އަހާ ފޯރަމް" ގައި އިހުސާން ވިދާޅުވީ މަސްތުގެ ހާލަތުގައި ވެހިކަލް ދުއްވުން އާދަޔާ ހިލާފަށް އިތުރުވެފައިވާތީ އެކަމަށް ހާއްސަ ސަމާލުކަމެއް ދީގެން މަސައްކަތް ކުރަމުންދާ ކަމަށެވެ.
"މަސްތުގެ ހާލަތުގައި ތިބެގެން ވެހިކަލްތައް ދުއްވަމުންދާކަން އަޅުގަނޑުމެންނަށް އާދަޔާ ހިލާފަށް ފާހަގަކުރެވިފައި އެބައޮތް. އެކަމަށް މިހާރު ވަރަށް ބޮޑަށް ސަމާލުކަން ދީގެން ދިވެހި ފުލުހުން ދަނީ މަސައްކަތްކުރަމުން،" އިހުސާން ވިދާޅުވި އެވެ.
އިހުސާން ވިދާޅުވީ މިދިޔަ ދެ އަހަރު ދުވަހުގެ ތެރޭގައި އެހެން މީހުންނަށް ގެއްލުންވާ ގޮތަށާއި މަގުމަތީގެ އުސޫލުތަކާ ހިލާފަށް ދުއްވަމުންދިޔަ 1،904 ސައިކަލު ދިގު މުއްދަތަށް ޓޯކޮށް ބޮޑެތި އަދަދުން ޖޫރިމަނާކޮށްފައިވާ ކަމަށެވެ.
މީގެއިތުރުން އަތޮޅު ތެރޭގައި ޓްރެފިކް ފުލުހުން މިހާރަށްވުރެ ބޮޑަށް ގާއިމުކޮށް ޓްރެފިކްގެ ކަންކަން ހަރުދަނާކޮށް ބަލަހައްޓަމުންދާނެ ކަމަށް އިހުސާން ވިދާޅުވި އެވެ.
ލައިސަންސަށް ކުފޫ ހަމަނުވާ މީހުންނަށް ލައިސަންސް އިޝޫކުރަމުންދާކަން ފާހަގަކުރައްވާ އިހުސާން ވިދާޅުވީ ބައެއް އެކްސިޑެންޓުތަކުގައި މަގުމަތީގެ ގަވާއިދުތަކާ ގާނޫނުތައް އެއްގޮތަކަށްވެސް ނޭނގޭ މީހުން ވެހިކަލްތައް ދުއްވަން ތިބޭ ކަމަށެވެ.
މި އަހަރު މިހާތަނަށް 2،254 އެކްސިޑެންޓު މައްސަލަ ފުލުހުންނަށް ރިޕޯޓުކޮށްފައިވެ އެވެ. އޭގެތެރެއިން 204 އެކްސިޑެންޓަކީ މި މަހުގެ ތެރޭގައި ހިނގާފައިވާ އެކްސިޑެންޓުތަކެވެ.
