އިދިކޮޅު އެމްޑީޕީގެ ކޮންގްރެސް ހުޅުވަން މިރޭ ބާއްވާ ޖަލްސާގައި ސަރުކާރު ހިންގާ ޕީޕަލްސް ނެޝަނަލް ކޮންގްރެސް (ޕީއެންސީ) ގެ ފަރާތުން ބައިވެރިވެވަޑައިގަންނަވަނީ އެ ޕާޓީގެ ނައިބުރައީސް، ފިޝަރީޒް މިނިސްޓަރު އަހްމަދު ޝިޔާމްކަން އެނގިއްޖެ އެވެ.
އަދަދު އަށް އެނގިފައިވާ ގޮތުގައި އެމްޑީޕީގެ ކޮންގްރެސްގައި ބައިވެރިވެވަޑައިގަތުމަށް ޕީއެންސީއަށް ދައުވަތު ފޮނުވުމުން އެ ދައުވަތު ގަބޫލުކޮށް ކޮންގްރެސް ހުޅުވުމަށް ބާއްވާ ޖަލްސާގައި ބައިވެރިވެވަޑައިގަތުމަށް އެ ޕާޓީން ފޮނުވުމަށް ހަމަޖެހިފައިވަނީ ޝިޔާމް އެވެ.
އެމްޑީޕީގެ ކޮންގްރެސް ހުޅުވުމުގެ ޖަލްސާގައި ޝިޔާމް ބައިވެރިވެވަޑައިގަތުމަށް ހަމަޖެހިފައިވާއިރު، ނިމިދިޔަ ޕީއެންސީގެ ކޮންގްރެސް ހުޅުވުމުގެ ޖަލްސާއަށް އެމްޑީޕީއަށް ދައުވަތު ދިނުމުން އެ ޖަލްސާގައި ބައިވެރިވެވަޑައިގަތީ އެމްޑީޕީގެ ޗެއާޕާސަން، ކުރީގެ ރައީސް މުހައްމަދު ނަޝީދެވެ.
އެމްޑީޕީގެ ކޮންގްރެސް މިރޭ ހުޅުވުމަށްފަހު މާދަމާ މެންދުރުފަހުން ފެށިގެން ރޭގަނޑަށް ބޭއްވުމަށް ހަމަޖެހިފައިވަނީ އިންވެސްޓްމަންޓް ފޯރަމެވެ. އެއަށްފަހު ހޮނިހިރު ދުވަހު ހެނދުނުން ފެށިގެން ކޮންގްރެސްގެ ރަސްމީ މަސައްކަތްތައް ފެށުމަށް ވަނީ ހަމަޖެހިފަ އެވެ.
މިގޮތުން ހޮނިހިރު ދުވަހު އަސާސީ ގަވާއިދަށް ގެންނަ ބަދަލުތަކާ ގުޅޭގޮތުން ބަހުސްކޮށް، އަސާސީ ގަވާއިދަށް ގެންނަ އިސްލާހުތައް ފާސްކުރުމަށް ވަނީ ހަމަޖެހިފަ އެވެ. އޭގެއިތުރުން ބޮޑު ބަދަލާ ގުޅޭ ގަރާރާއި، ލާމަރުކަޒީ ނިޒާމާ ގުޅޭ ގަރާރަށް ބަހުސްކޮށް ގޮތެއް ނިންމުމަށް ވަނީ ހަމަޖެހިފަ އެވެ.
އެމްޑީޕީގެ ކޮންގްރަސްމަނުންގެ ގޮތުގައި 986 ޑެލިގޭޓުން ތިބި ކަމަށް އެ ޕާޓީން ބުނެ އެވެ. އޭގެތެރެއިން ގިނަ ބަޔަކު މިހާތަނަށް ކޮންގްރެސްގައި ބައިވެރިވާން ރަޖިސްޓްރީ ކޮށްފައިވާ ކަމަށް މައުލޫމާތު ލިބެ އެވެ.
އެމްޑީޕީން ކޮންގްރެސް ބާއްވަން މާލެއިން އެއްވެސް ތަނެއް ސަރުކާރުން ހަމަޖައްސައިދީފައި ނުވާތީ އެކަމާ ގުޅިގެން އެ ޕާޓީން ވަނީ ކަންބޮޑުވުން ކަންބޮޑުވުން ފާޅުކޮށްފަ އެވެ. އެ ޕާޓީން ތިން ދުވަހުގެ މި ކޮންގްރެސް ކުރިއަށްގެންދަން ރާވާފައިވަނީ މާލެ ސިޓީ ހޯލްގަ އެވެ.
