އަންނަ ނޮވެމްބަރު މަހު، 5-17 އަށް ބަންގްލަދޭޝްގައި ބާއްވާ ޓެކްނޯ ސާފް ޗެމްޕިއަންޝިޕް 2026 ގައި ބައިވެރިވުމަށް ނޭޕާލަށް ދީފައި އޮތް މުއްދަތުގެ ތެރޭގައި، އެ ގައުމަށް ފީފާ އިން ދީފައި އޮތް ސަސްޕެންޝަނަށް ހައްލެއް ނުލިބުމުން، ސައުތު އޭޝިއަން ފުޓްބޯލް ފެޑެރޭޝަން (ސާފް) އިން މުބާރާތުގެ ޝެޑިއުލް ފައިނަލްކޮށްފި އެވެ.
ބޫޓާންގެ ތިމްޕޫގައި، މިދިޔަ އޮގަސްޓް މަހު އެއް ވަނަ ދުވަހު ކުރިއަށްދިޔަ، މި އަހަރުގެ ސާފް ޗެމްޕިއަންޝިޕްގެ ގުރުއަތުލުމުގައި ނޭޕާލްގެ ނަން ރަސްމީކޮށް ހިމަނާފައިނުވެ އެވެ.
ގްރޫޕް އޭގައި އޮތީ މި ފަހަރުގެ ސާފް ޗެމްޕިއަންޝިޕް ހޯސްޓްކުރާ، ބަންގްލަދޭޝްގެ އިތުރުން، ބޫޓާން އާއި ސްރީ ލަންކާ އެވެ. ގްރޫޕް ބީގައި އޮތީ އެންމެ ފަހުގެ ޗެމްޕިއަން، އިންޑިއާގެ އިތުރުން ޕާކިސްތާން އަދި ރާއްޖެ އެވެ. އިންޑިއާ އިން ނޮވެމްބަރު މަހު، ނިއު ޒީލެންޑުގެ ފީފާ ބްރޭކުގައި ދެ މެޗު ކުޅޭތީވެ، ސާފް ޗެމްޕިއަންޝިޕަށް އެ ޓީމުން ފޮނުވަނީ، ޒުވާން ކުޅުންތެރިން ހިމެނޭ ސްކޮޑެއް ކަމަށް ރިޕޯޓްތައް ބުނެ އެވެ. މީގެ ކުރިން، 2018 އާއި 2009 ގައި އިންޑިއާ އިން ބަންގްލަދޭޝްގައި ހޯސްޓްކުރި ސާފް ޗެމްޕިއަންޝިޕަށް ފޮނުވީ 23 އަހަރުން ދަށުގެ ޓީމެކެވެ.
ސާފް އިން ނޭޕާލަށް ފުރުސަތަު ދީފައި އޮތީ، މިދިޔަ މަހުގެ 30 ގެ ކުރިން ފީފާގެ ސަސްޕެންޝަނުން ސަލާމަތްވުމަށެެވެ. މިދިޔަ ޖޫން މަހުގެ 24 ވަނަ ދުވަހު، ފީފާ އިން ނޭޕާލް ސަސްޕެންޑްކުރީ، އޭގެ ކުރިން ހިނގައިދިޔަ ހަމަ މަހުގެ ތެރޭގައި، އެ ގަައުމުގެ ފުޓްބޯޅަ ފެޑެރޭޝަން، އަންފާގައި ހުރި މައްސަލަތައް ނޭޕާލް ސަރުކާރާ ގުޅިގެން ހައްލުކުރަން ދިން އެއްވެސް ފުރުސަތެއްގައި ފީފާގެ އެންގުންތަކަށް ފުރިހަމަ އަށް ބޯލަނބާފައިނުވާތީ އެވެ.
ސާފުން ނޭޕަލަށް ދިން މުއްދަތުގެ ތެރޭގައި، އެ ގައުމަށް ސަސްޕެންޝަނުގެ މައްސަލައިގައި ހައްލެއް ނުހޯދި، 15 ވަަނަ ސާފް ޗެމްޕިއަންޝިޕްގައި އެ ޓީމުގެ ބައިވެރިވުމެއް ނޯންނާނެ އެވެ. މިއީ، ސާފް ޗެމްޕިއަންޝިޕްގެ ތާރީހުގައި ވެސް ނޭޕާލް ނުލައި މުބާރާތް ބާއްވާ ފުރަތަމަ ފަހަރެވެ.
ފީފާގެ ސަސްޕެންޝަނުގައި އޮތް ނޭޕާލުން ޑޮމެސްޓިކް ފުޓްބޯޅަ ކުރިއަށްގެންދިއުމަށް އެ ގައުމުގެ ސަރުކާރުން އަންނަނީ ބާރު އަޅަމުންނެވެ.
ރާއްޖޭގައި 2021 ވަނަ އަހަރު ބޭއްވި ސާފް ޗެމްޕިއަންޝިޕްގެ ފައިނަލުގައި ކުުޅުނު ނޭޕާލް، އެންމެ ފަހުން 2023 ވަނަ އަހަރު ބޭއްވި ސާފް ޗެމްޕިއަންޝިޕްގައި ކެޓީ ގްރޫޕް ސްޓޭޖުންނެވެ.
ބަންގްލަދޭޝްގައި މި ފަހަރުގެ ސާފް ޗެމްޕިއަންޝިޕް ހޯސްޓްކުރާއިރު، މި މުބާާރާތް އެ ގައުމުގައި މި ހޯސްޓްކުރަނީ، އަށް އަހަރަށް ފަހު އެވެ. އެންމެ ފަހުން، ބަންގްލަދޭޝްގައި ސާފް ޗެމްޕިއަންޝިޕް ބޭއްވީ 2018 ވަަނަ އަހަރު އެވެ. ބަންގްލަދޭޝް އިން ވަނީ 2003 ވަނަ އަހަރާއި 2009 ވަނަ އަހަރުގައި ވެސް ސާފް ޗެމްޕިއަންޝިޕް ހޯސްޓްކޮށްފަ އެވެ.
ސާފް ޗެމްޕިއަންޝިޕް 2026 ޝެޑިއުލް
ގްރޫޕް ބީ: އިންޑިއާ - ޕާކިސްތާން (5 ނޮވެމްބަރު)
ގްރޫޕް އޭ: ބޫޓާން - ބަންގްލަދޭޝް (5 ނޮވެމްބަރު)
ގްރޫޕް ބީ: ރާއްޖެ - ޕާކިސްތާން (8 ނޮވެމްބަރު)
ގްރޫޕް އޭ: ސްރީ ލަންކާ - ބޫޓާން (8 ނޮވެމްބަރު)
ގްރޫޕް ބީ: އިންޑިއާ - ރާއްޖެ (11 ނޮވެމްބަރު)
ގްރޫޕް އޭ: ބަންގްލަދޭޝް - ސްރީ ލަންކާ (11 ނޮވެމްބަރު)
ސެމީ ފައިނަލް ދެ މެޗު (14 ނޮވެމްބަރު)
ފައިނަލް މެޗު (17 ނޮވެމްބަރު)
