ނޮވެމްބަރު މަހު ބަންގްލަދޭޝްގައި ބާއްވަން ނިންމާފައިވާ 15 ވަނަ ސާފް ޗެމްޕިއަންޝިޕް ފުޓްބޯޅަ މުބާރާތުގައި ވީޑިއޯ އެސިސްޓަންޓް ރެފްރީ (ވީއޭއާރް) ބޭނުންކުރުމުގެ މަަސައްކަތް ހަލުވި ދުވެލީގައި ކުރަމުން އަންނައިރު، މި ފަހަރުގެ މުބާރާތުގައި، ވީއޭއާރްގެ ލައިޓް ގެންގުޅުމުގެ ފުރުސަތު ބޮޑުވެއްޖެ އެވެ.
ސާފް އިން އިއުލާނުކޮށްފައިވާ ގޮތުގައި މި އަހަރުގެ ސާފް ޗެމްޕިއަންޝިޕް ކުރިއަށްދާނީ ނޮވެމްބަރު 4-17 އަށް ބަންގްލަދޭޝްގެ ވެރި ރަށް ޑާކާގަ އެވެ. މީގެ ކުރިން، ބަންގްލަދޭޝްގެ ދެ ސިޓީއެއްގައި ސާފް ޗެމްޕިއަންޝިޕް ކުޅެން ނިންމި ނަމަވެސް ފަހުން ސާފް އިން ނިންމާފައިވަނީ މުބާރާތް ކުޅޭނީ ޑާކާގައި ކަމަށެވެ.
ޗައިނާގެ ކުންފުންޏެއް ކަމަށްވާ ޓެކްނޯ އިން މި ފަހަރުގެ މުބާރާތުގެ ޓައިޓަލް ސްޕޮންސަރުކަން ނަގާފައިވާއިރު، މިއީ، 2018 ވަނަ އަހަރުގެ ސާފް ޗެމްޕިއަންޝިޕްގެ ސްޕޮންސަރަކަަށް ސުޒުކީ މަސައްކަތް ކުރި ފަހުން މި ފަދަ ގޮތަކަށް ރައިޓްސް ދިން ފުރަތަމަ ފަހަރެވެ.
ސާފް ޗެމްޕިއަންޝިޕް ފުޓްބޯޅަ މުބާރާތުގައި، ވީޑިއޯ އެސިސްޓަންޓް ރެފްރީ (ވީއޭއާރް)ގެ ބޭނުންކުރަން ބޭރުގެ ކުންފުންޏަކާ ވާހަކަ ދައްކަމުން އަންނަ ކަމަށް ސާފްގެ ޖެނެރަލް ސެކްރެޓަރީ، ޕްރުޝޮތަމް ކަޓޭލް، ޓައިމްސް އޮފް އިންޑިއާ އަށް ދާދި ފަހުން ދިން އިންޓަވިއުއެއްގައި ވަނީ ބުނެފަ އެވެ.
ބަންގްލަދޭޝް މީޑިއާގައި ރިޕޯޓްކޮށްފައިވާ ގޮތުގައި، ފުރަތަމަ ފަހަރަށް ސާފް ޗެމްޕިއަންޝިޕްގައި ވީއޭއާރް ބޭނުންކުރުމުގައި ސާފް އިން ތަފާތު ވިސްނުންތަކެއް ގެންގުޅެ އެވެ. ގައުމީ ޓީމުތައް ވާދަކުރާ މުބާރާތްތަކުގައި ވީއޭއާރް ބޭނުންކުރުމުގައި ފީފާގެ ރުހުން ހޯދަން ޖެހެ އެވެ. ސާފް އިން މިހާރު އަންނަނީ ފީފާއާ ކުރަން ޖެހޭ މުއާމަލާތްތައް ކުރިއަށްގެންދަމުންނެވެ. އަދި، ފީފާއާ އެކު ސާފް އިން. ކުރަން ޖެހޭ ފަހުގެ މަޝްވަރާތައް ކުރިއަށް އޮތް ހަފްތާއެއްހާ ދުވަސްތެރޭ ފެށިގެންދާނެ އެވެ.
ސާފް ޗެމްޕިއަންޝިޕް ބަންގްލަދޭޝްގައި؛ ވީއޭއާރް ބޭނުންކުރުމުގެ ފުރުސަތު ބޮޑު
މި އަހަރުގެ ނޮވެމްބަރު 4 އިން 17 އަށް ބަންގްލަދޭޝްގެ ޑާކާގައި ބާއްވާ 15 ވަނަ ސާފް ޗެމްޕިއަންޝިޕްގައި ވީއޭއާރް ބޭނުންކުރުމުގެ ފުރުސަތު ބޮޑުކަމަށް ސާފް އިން ވަނީ ހާމަކޮށްފައި އަށް އަހަރަށްފަހު ބަންގްލަދޭޝްގައި މި މުބާރާތް ބާއްވާއިރު، މުބާރާތުގެ ގުރުއަތުލުން އޮންނާނީ އަންނަ މަހުގެ އެއްވަނަ ދުވަހު ބޫޓާންގައި. ސަސްޕެންޝަންގެ ސަބަބުން ނޭޕާލް ނުފެނިދާނެ
ވީއޭއާެރް ބޭނުންކުރުމުގައި ސާފް އިން އަންނަނީ އާސިއާން ފުޓްބޯލް ފެޑެރޭޝަނާ އެކު ވެސް ވާހަކަ ދައްކަމުންނެވެ. އެއީ، އާސިއާންގެ ބައެއް ގައުމުތަކުގައި ވީއޭއާރް ޓެސްޓްކޮށްފައިވާއިރު، އެ ގައުމުތަކުގައި މި ކަމުގެ ތަޖުރިބާ ހުރި ރެފްރީންނާއި ޓެކްނިކަލް ފަރާތްތައް ހިމެނޭތީ އެވެ.
މި ވަގުތަށް ބަލާއިރު، ސާފްގެ ވިސްނުން ހުރީ ވީއޭއާރް ލައިޓް، މި ފަހަރުގެ ސާފް ޗެމްޕިއަންޝިޕްގައި ބޭނުންކުރުމަށެވެ. އެއީ، ދަނޑުގައި މެޗު ކުރިއަށްދާއިރު ނަގާ ވީޑިއޯ ފޫޓޭޖުތައް ހައި ސްޕީޑް އިންޓަނެޓް މެދުވެރިކޮށް، އެހެން ގައުމެއްގައި ހުންނަ ވީއޭއާރް ޓެކްނިކަލް ޓީމަކަށް ފޮނުވައިގެން، ދަނޑުގައި ހުންނަ މޮނީޓަރުން ރެފްރީ އަށް ވީޑިއޯތައް ދެއްކޭގޮތަށެެވެ. މިއީ، މިހާރު ވެސް އޭޝިއާ، އެފްރިކާ، ޔޫރަޕް އަދި ދެކުނު އެމެރިކާގައި ޓެސްޓް ކުރަމުން އަންނަ މޮޑެލް އެކެވެ.
ބަންގްލަދޭޝްގައި މި ފަހަރުގެ ސާފް ޗެމްޕިއަންޝިޕް ހޯސްޓްކުރާއިރު، މި މުބާާރާތް އެ ގައުމުގައި މި ހޯސްޓްކުރަނީ، އަށް އަހަރަށް ފަހު އެވެ. އެންމެ ފަހުން، ބަންގްލަދޭޝްގައި ސާފް ޗެމްޕިއަންޝިޕް ބޭއްވީ 2018 ވަަނަ އަހަރު އެވެ. ބަންގްލަދޭޝް އިން ވަނީ 2003 ވަނަ އަހަރާއި 2009 ވަނަ އަހަރުގައި ވެސް ސާފް ޗެމްޕިއަންޝިޕް ހޯސްޓްކޮށްފަ އެވެ. އެ ގޮތުން، 2003 ވަނަ އަހަރު ރާއްޖޭން ފައިނަލުގައި ޕެނަލްޓީ ޖަހައިގެން ބަންގްލަދޭޝް އަތުން ބަލިވިއިރު، 2009 ވަނަ އަހަރު އިންޑިއާ އަތުން ފައިނަލުގައި ޕެނަލްޓީ ޖަހައިގެން ބަލިވި އެވެ. އަދި، 2018 ވަނަ އަހަރު ފައިނަލުގައި އިންޑިއާ ބަލިކޮށް ރާއްޖޭން ޗެމްޕިއަންކަން ހޯދި އެވެ.
އެންމެ ފަހުން ސާފް ޗެމްޕިއަންޝިޕް ބާއްވާފައިވަނީ، 2023 ވަނަ އަހަރު އިންޑިއާގެ ބެންގަލޫރުގަ އެވެ. އެ ފަހަރުގެ މުބާރާތް ކުރިއަށްދިޔައީ، ދައުވަތު ދީގެން ލެބަނަން އާއި ކުވެއިތު ވެސް ހިމަނައިގެންނެވެ. އެ ފަހަރުގެ މުބާރާތުގައި ސަސްޕެންޝަނުގެ ސަބަބުން ސްރީ ލަންކާ ނުކުޅެ އެވެ. މި ފަހަރުގެ މުބާރާތް ބާއްވާނެ ތާރީހު ސާފް އިން އިއުލާނުކުރިއިރު، ނޭޕާލް މި ވަގުތު އޮތީ ފީފާގެ ސަސްޕެންޝަނެއްގަ އެވެ.
ސާފް ޗެމްޕިއަންޝިޕްގެ ގުރުއަތުލުން ކުރިއަށްދާނީ އަންނަ މަހު އެއް ވަނަ ދުވަހު ބޫޓާންގެ ތިމްޕޫގައި ކުރިއަށްދާ ސާފްގެ އަހަރީ އާންމު ޖަލްސާގެ ހަވާސާގެ ތެރެއިން ބާއްވާ އިވެންޓެއްގަ އެވެ.
