ފުލުހުންނަށް ބޮޑެތި ޒިންމާތަކެއް މަތިކޮށް ފާސްކުރި އެއްގަމު ދަތުރުފަތުރުގެ އައު ގާނޫނަށް އަމަލުކުރަން މިއަދު ފަށައިފި އެވެ.
އެ ގާނޫނުގެ ދަށުން ޓްރެފިކް ފުލުހުންގެ މައިގަނޑު ޒިންމާތަކުގެ ތެރޭގައި ގާނޫނާ ހިލާފުވާ ޑްރައިވަރުން ޖޫރިމަނާކުރުމާއި، ލައިސަންސުން ޕޮއިންޓު ކެނޑުމުގެ އިތުރުން، ގަވާއިދާ ހިލާފަށް ޕާކުކުރާ އުޅަނދުތައް ނެގުމާއި ޓޯކުރުމުގެ ބާރު ވެސް ފުލުހުންނަށް ދީފައިވެ އެވެ.
އައު ގާނޫނުގައި ޓްރެފިކް ފުލުހުންނަށް ލިބިދޭ ބާރުތަކުގެ ތެރޭގައި ޓްރެފިކް ވަޔަލޭޝަން ސްލިޕް ދޫކުރުމާއި، އުޅަނދުތައް ބޫޓުކުރުން ހިމެނެ އެވެ. އެގޮތުން ޖޫރިމަނާގެ އަދަދު ފަސްހާސް ރުފިޔާއަށްވުރެ އިތުރުވާނަމަ އުޅަނދު ބޫޓުކުރެވޭނެ އެވެ.
ދިގު ކިޔުން: އެއްގަމު ދަތުރުފަތުރުގެ އާ ގާނޫނާއެކު އައި ބޮޑެތި ބަދަލުތައް
މި ބަދަލުތަކަށް ސޯޝަލް މީޑިއާގައި ތައުރީފާއި ފާޑުކިޔުން ވެސް ދަނީ އަމާޒުވަމުންނެވެ. ގާނޫނާމެދު ކޮންމެ ގޮތަކަށް ދެކުނު ނަމަވެސް އޮކްޓޯބަރު 1، 2026، އިން ފެށިގެން ގާނޫނަށް ބަދަލުތަކެއް އަންނާނެ. އެހެންކަމުން މި ލިޔުމުގައި މި ބަލައިލަނީ، ވެހިކަލްތަކާ ބެހޭ ގާނޫނުން އަލަށް ތައާރަފުވާ ކަންކަމާއި ރައްޔިތުންނަށް އެނގެން މުހިންމު މައުލޫމާތުތައް.
ވެހިކަލް ބޫޓު ކުރުމަކީ އެ ވެހިކަލެއް ނުދުއްވޭ ގޮތަށް ފުރޮޅުގައި ތަޅު އެޅުވުމެވެ. ބޫޓު ކުރާ އުޅަނދުތަކުގެ ވަޔަލޭޝަން ފައިސާ 72 ގަޑިއިރުގެ ތެރޭގައި ނުދައްކައިފި ނަމަ އެ ވެހިކަލެއް ފުލުހުންގެ ބެލުމުގެ ދަށަށް ގެންދަން ޖެހެ އެވެ. ބޫޓުކުރާ އުޅަނދުތަކުގެ ޖޫރިމަނާ ހަތްދިހަ ދެ ގަޑިއިރުގެ ތެރޭގައި ނުދައްކައިފިނަމަ، އެ އުޅަނދެއް ފުލުހުންގެ ބެލުމުގެ ދަށަށް ގެންދަންޖެހެ އެވެ.
ގާނޫނުގައި ބުނެފައިވަނީ، ޓޯކުރާ އުޅަނދުތަކަކީ ގާނޫނާ އެއްގޮތަށް ޓޯކޮށްފައިވާ އުޅަނދުތަކެއްކަން ފުލުހުންގެ ސީނިއާ އޮފިސަރަކު ކަނޑައަޅަންޖެހޭނެ ކަމަށެވެ. ނުބައިކޮށް ޓޯކޮށްފައިވާނަމަ 24 ގަޑިއިރުގެ ތެރޭގައި ވެރިފަރާތާ ހަވާލުކުރަންޖެހެ އެވެ.
ގަވާއިދުން ޓޯކުރާ އުޅަނދުތަކާ ތިރީސް ދުވަހުގެ ތެރޭގައި ވެރިފަރާތުން ހަވާލުނުވެއްޖެނަމަ އެ އުޅަނދެއް ނީލަންކިއުމުގެ ބާރު ފުލުހުންނަށް ލިބެ އެވެ. މި ހުރިހާ މަސައްކަތެއް ފުލުހުން ކުރަންޖެހޭނީ ޔުނީފޯމުގައި ތިބެގެން ކަމަށްވިޔަސް، ޔުނީފޯމުގައި ނެތް ހާލަތެއްގައި ވެސް ފުލުހެއްކަން އަންގައިދޭ ކާޑު ދެއްކުމަށްފަހު މުއާމަލާތް ކުރެވިދާނެ ކަމަށް އެ ގާނޫނުގައި ބަޔާންކޮށްފައިވެ އެވެ.
އުޅަނދު ރަޖިސްޓްރީކުރުމުގެ އުސޫލުތައް ވެސް މި ގާނޫނުގައި ވަނީ ބޮޑެތި ހަރުކަށިކޮށްފަ އެވެ. އެގޮތުން ހަތަރު ފުރޮޅުލީ އުޅަނދެއް ރަޖިސްޓްރީކޮށްދެވޭނީ އެ އުޅަނދެއް ބާއްވާނެ ގަރާޖެއް ނުވަތަ ދިހަ އަހަރުގެ މުއްދަތަށް ރަޖިސްޓްރީކޮށްފައިވާ ޕާކިން ސްޕޭސްއެއް އޮތުމުން ކަމަށް އެ ގާނޫނުގައި ބަޔާންކުރެ އެވެ. އަދި، މީހެއްގެ ނަމަށް އެއް އުޅަނދަށްވުރެ ގިނަ އުޅަނދު ރަޖިސްޓްރީކުރާނަމަ އިތުރު ފީއެއް ދައްކަންޖެހޭ ގޮތަށް އެ ގާނޫނުގައި ވަނީ ކަނޑައަޅައިފަ އެވެ. މީގެ އިތުރުން، އުޅަނދެއްގެ މިލްކުވެރިކަން ބަދަލުވެއްޖެނަމަ އައު ވެރިފަރާތުގެ ނަމަށް އުޅަނދު ބަދަލުކުރުން މިހާރު ވަނީ މަޖުބޫރުކޮށްފަ އެވެ.
