ދިވެހިރާއްޖޭގައި މިހާރު އަމަލު ކުރަމުންދާ ގާނޫނުތަކުގެ ދަށުން ރަސްމާލެ ޕްރޮޖެކްޓަށް ހުއްދަ ނުލިބޭތީ، އެ ޕްރޮޖެކްޓަށް މަގުފަހިކުރަން އާ ގާނޫނުތަކެއް ހަދަން ނިންމާފައިވާ ކަމަށް ބަންޑާރަނައިބު އަހުމަދު އުޝާމް މިއަދު ވިދާޅުވެއްޖެ އެވެ.
ޔޫއޭއީގެ އީގަލް ހިލްސް އަށް ރަސްމާލެ ދޫކޮށްލަން ސަރުކާރުން އެއްބަސްވީ 99 އަހަރަށެވެ. ރަސްމާލެއިން އެޕާޓްމަންޓެއް ގަންނަ ބިދޭސީ މީހާއަށް ލިބޭ 99 އަހަރުގެ ލީސް މުއްދަތުގައި އެތަން ވިއްކާލައިފި ނަމަ ނުވަތަ ހިބައިން ދީފި ނަމަ 99 އާ ލީސް މުއްދަތެއް ފެށޭނެ އެވެ.
އެގޮތަށް ރަސްމާލެ ދޫކޮށްލުން ގާނޫނުއަސާސީއާ ހިލާފު ކަމަށް ބުނެ އެ ޕްރޮޖެކްޓު ހުއްޓުވައިދޭން ސުޕްރީމް ކޯޓަށް މައްސަލައެއް ވައްދާފައި އޮއްވާ، އެކްސްގައި ކުރެއްވި ޕޯސްޓެއްގައި އުޝާމް ވިދާޅުވީ ރަސްމާލޭ ޕްރޮޖެކްޓު ކުރިއަށް ގެންދިއުމުގެ ކުރިން ޕްރޮޖެކްޓަށް ބޭނުންވާ "ގާނޫނުތައް މަޖިލީހުން ފާސްކުރަންޖެހޭނެ" ކަމަށެވެ.
"ރަސްމާލޭގައި ހިންގުމަށް ރާވާފައިވާ މަޝްރޫއު ގަވަން ކުރާނީ މިހާރު އެކުލަވާލަމުން އަންނަ ރިއަލް އެސްޓޭޓް ގާނޫނުގެ ދަށުން،" އުޝާމް ވިދާޅުވި އެވެ. "މަޝްރޫއު ފެށުމުގެ ކުރިން ... މިކަމާ ގުޅުންހުރި ގާނޫނުތައް މަޖިލީހުން ފާސްކުރަންޖެހޭނެ."
ރަސްމާލޭ އެއްބަސްވުމުގައި ސަރުކާރުގެ ފަރާތުން ކޮންސްޓްރަކްޝަން މިނިސްޓަރު އަބްދުﷲ މުއްތަލިބު ސޮއި ކުރެއްވީ ސެޕްޓެމްބަރު 21، ގަ އެވެ. އެއިރު ސޮއި ކުރީ ޕްރޮޖެކްޓުގެ ކޮމާޝަލް ޓާމްސް ނުވަތަ ލެޓާ އޮފް އިންޓެންޓްގައި ކަމަށް އުޝާމް ވިދާޅުވެފައިވެ އެވެ.
އޭގެ އިތުރުން އޭނާ ވިދާޅުވީ، ޕްރޮޖެކްޓު ފެށުމުގެ ކުރިން އަދި އެހެން "އެގްރިމެންޓުތަކެއްގައި" ސޮއިކުރާނެ ކަމަށެވެ. އެކަމަކު އެގްރިމެންޓުތަކުގައި ސޮއިކުރާނީ މިހާރު ސޮއިކޮށްފައިވާ އެގްރިމެންޓަށް ބިނާކޮށް ކަމަށް ބަންޑާރަނައިބު ވިދާޅުވި އެވެ.
"މަޝްރޫއު ފެށުމުގެ ކުރިން މި އެގްރީމެންޓްގައިވާ ޓަރމްސްތަކުގެ މައްޗަށް ބިނާކޮށް އިތުރަށް މަޝްވަރާކޮށްގެން އެކުލަވާލާ ޑެފިނިޓިވް އެގްރީމެންޓްތަކެއްގައި [ސޮއިކުރާނެ]،" އޭނާ ވިދާޅުވި އެވެ.
ރާއްޖޭގެ ބައެއް ބޭރު މީހުންނަށް 99 އަހަރަށް ވުރެ ދިގު ނޫން މުއްދަތަކަށް ދިނުން ގާނޫނުއަސާސީ ހުއްދަ ކުރެ އެވެ. ނަމަވެސް އެކަމާ ގުޅޭ ގާނޫނެއް މިހާތަނަކަށް ނެތެވެ. ޓޫރިޒަމާ ބެހޭ ގާނޫނުން ހުއްދަ ލިބެނީ 50 އަހަރަށެވެ. އަދި ލީސް މުއްދަތު އިތުރު 49 އަހަރަށް އެކްސްޓެންޑު ކުރެވިދާނެ އެވެ.
ސްޕެޝަން އިކޮނޮމިކް ގާނޫނުގެ ދަށުން ބިދޭސީ ބަޔަކަށް އެންމެ ގިނަވެގެން ބިމެއް ދޫކުރެވެނީ 66 އަހަރަށެވެ. އެކަމަކު އެ މުއްދަތު 33 އަހަރަށް އިތުރު ކުރެވިދާނެ އެވެ.
ރަސްމާލެ ދޫކޮށްލަން ސަރުކާރުން އެއްބަސްވީ އެކުއިޒިޝަން ފީއެއް އަދި ބިމު ކުއްޔެއް ވެސް ނުނަގާ ގޮތަށެވެ. ސަރުކާރަށް ލިބޭ ހަމައެކަނި އެއްޗަކީ ރަސްމާލޭގައި އަޅާ ކޮމާޝަލް ޕްރޮޕަޓީސް ވިއްކައިގެން ލިބޭ ރެވެނިއުގެ 10 ޕަސެންޓާއި އެޕާޓްމަންޓުތައް ވިއްކައިގެން ލިބޭ ރެވެނިއުގެ ހަތަރު ޕަސެންޓެވެ.
ވަޒީރު މުއްތަލިބު ވިދާޅުވީ ރަސްމާލޭގައި އަޅާ އިމާރާތްތައް ވިއްކައިގެން ދައުލަތަށް ތިން ބިލިއަން ޑޮލަރު ނުވަތަ 46 ބިލިއަން ރުފިޔާ 10 އަހަރު ތެރޭގައި ލިބޭނެ ކަމަށެވެ. އެއީ މިދިޔަ އަހަރު ބަޖެޓަށްވުރެ ވެސް ކުޑަ އަދަދެކެވެ.
