ނޭޕާލަށް ކުރިމަތިވި ނުރައްކާތެރި ފެންބޮޑުވުމުގެ ހާދިސާގައި ޗަންދިކާ ކުމާރީ ޝްރެސްތާ މަރުވީ ކަމަށް ބަލައި، އޭނާގެ އާއިލާއިން މަރުގެ ހިތާމަ ފާޅުކުރުމުގެ ރަސްމިއްޔާތުތައް ފެށި ފަހުން، ދިރިހުއްޓާ ސަލާމަތްކޮށްފި އެވެ.
ހާދިސާ ހިނގިތާ 10 ދުވަސް ފަހުން އޭނާ ފެނިފައިވަނީ ސުންނާފަތިވެފައިވާ ބެތުރަވަތީ އަވަށުގައި ހުރި އޭނާގެ ގޭގެ ދަށުންނެވެ. އޭނާ ސަލާމަތްވީ ފެނާއި ޗަކައިގެ ތެރޭގައި ހުރި ކުޑަ ވައިކޮޅެއް ލިބޭ ފަދަ ހަނި ތަންކޮޅެއްގެ ތެރޭގައި ތާށިވެފައި އޮއްވަ އެވެ.
"އެ ހަތަރު ބުރީގެ އިމާރާތް ފެންބޮޑުވުމުގެ ތެރޭގައި ވަނީ ވެއްޓި، ކައިރީގައި އޮތް މަޑު ފަސްގަނޑެއްގެ ތެރެއަށް ގަނބައިގެން ގޮސްފައި. އެ ސަރަހައްދުގައި ހަރަކާތްތެރިވަމުން ދަނިކޮށް 'އަހަރެން ސަލާމަތްކުރޭ' އޭ ބުނެ ގޮވާ އަޑު އިވުނު،" ފުލުސް އޮފިސަރު މަހެންދުރަ ދަރުނާލް ބުންޏެވެ.
ހޮނިހިރު ދުވަހު 45 މިނެޓަށް ކުރިއަށް ގެންދިޔަ ސަލާމަތްކުރުމުގެ އޮޕަރޭޝަނެއްގައި، ދަރުނާލް އާއި އޭނާގެ ޓީމުން ޝްރެސްތާ އެ ހަނި ތަންކޮޅުން ނެރެ، އަސްކަރީ ހޮސްޕިޓަލަކަށް ވަނީ ފޮނުވާފަ އެވެ.
"އަހަރެން އާއިލާއާ ގުޅަމުން ދިޔައިރު، އެމީހުން ތިބީ 11 ދުވަހުގެ މަރުގެ ހިތާމަ ފާޅުކުރުމުގެ މުއްދަތު ފަށާފައި،" ދަރުނާލް ކިޔައިދިނެވެ.
ނޭޕާލަށް ކުރިމަތިވި ފެންބޮޑުވުމުގައި އެންމެ ބޮޑަށް ގެއްލުންވި ބެތުރަވަތީ އަވަށުން ގެއްލުނު އެތައް ސަތޭކަ ބައެއްގެ ތެރޭގައި ޝްރެސްތާ ހިމެނެ އެވެ. އެ އަވަށުގެ ބޮޑު ސަރަހައްދެއް ވަނީ މަޑު ފަސްގަނޑެއްގެ ދަށުވެފަ އެވެ. ސަލާމަތްކުރާ ފަރާތްތަކުން އަދިވެސް ދަނީ އެ ސަރަހައްދުން ގިނަ އަދަދެއްގެ މީހުންގެ ހަށިތައް ނެރެމުންނެވެ.
ނޭޕާލްގެ އެކި ސަރަހައްދުތަކުން 1,300 އަށްވުރެ ގިނަ މީހުން މަރުވި މި ކާރިސާގައި، ބެތުރަވަތީގެ މާރުކޭޓާއި ގިނަ އާންމު ގެތައް ވަނީ ފެނާއެކު އައި ކުނިބުނިތަކުގެ ދަށުވެފަ އެވެ. އަދިވެސް އެތައް ހާސް ބަޔަކު ވީނުވީއެއް ނޭނގި ވަނީ ގެއްލިފަ އެވެ.
