ނުރަސްމީ ދަތުރެއްގައި ރައީސްގެ ދެކަނބަލުން ސިންގަޕޫރަށް ފުރާވަޑައިގެންފި

ނުރަސްމީ ދަތުރެއްގައި ރައީސް މުހައްމަދު މުއިއްޒާއި އެމަނިކުފާނުގެ އަނބިކަނބަލުން ސާޖިދާ މުހައްމަދު ސިންގަޕޫރަށް ރޭ ފުރާވަޑައިގެންފި އެވެ. 

ރައީސްގެ ދެކަނބަލުން ސިންގަޕޫރަށް ކުރައްވާ ދަތުރުގެ ތަފްސީލް ރައީސް އޮފީހުން ހާމަކޮށްފައި ނުވާއިރު، ދެކަނބަލުން ރާއްޖެ ވަޑައިގަންނަވާ ތާރީހެއް ވެސް ހާމަކޮށްފައެއް ނުވެ އެވެ. 

މިއީ މުއިއްޒު ވެރިކަމަށް ވަޑައިގެންނެވި ފަހުން ސިންގަޕޫރަށް ކުރައްވާ އަށް ވަނަ ދަތުރެވެ. އެއީ ނުރަސްމީ ހަތް ދަތުރާއި ރަސްމީ އެއް ދަތުރެވެ. 

އެމަނިކުފާނު ވެރިކަމާ ހަވާލުވެވަޑައިގެންނެވި ފަހުން ނުރަސްމީ ދަތުރުތަކުގައި އެންމެ ގިނައިން ވަޑައިގެންނެވީ ސިންގަޕޫރަށެވެ. އޭގެއިތުރުން ނުރަސްމީ ދަތުރުތަކުގައި މުއިއްޒު އިނގިރޭސިވިލާތަށް ވެސް އެކި ފަހަރުމަތިން ވަޑައިގެންފައިވެ އެވެ.