އެމެރިކާގެ މެސެޗޫސެޓްސް ސަރަހައްދަށް މޫސުން ގޯސްވާނެ ކަމަށް ލަފާކޮށް އިންޒާރު ނެރެފައިވާތީ ކަމަށް ބުނެ، ހުކުރު އަދި ހޮނިހިރު ދުވަހު ބޭއްވުމަށް ހަމަޖެހިފައި އޮތް މަޝްހޫރު ލަވަކިޔުންތެރިޔާ އެޑް ޝީރަންގެ ކޮންސަޓްތައް ކެންސަލްކޮށްފި އެވެ.
އެޑް ޝީރަން މިހާރު އެމެރިކާގައި ކުރިއަށްގެންދާ މިއުޒިކް ދަތުރުގެ ތެރެއިން މި ދެ ކޮންސަޓް ބޭއްވުމަށް ކުރިން ތާވަލުކޮށްފައި އޮތީ ބޮސްޓަން ކައިރީގައި އޮންނަ ފޮކްސްބަރޯގެ ގިލެޓް ސްޓޭޑިއަމްގަ އެވެ.
ޝީރަންގެ މި ދަތުރުގެ ސުރުޚީތައް ފަހަކަށް އައިސް އަމާޒުވެފައިވަނީ، އޭނާގެ ކޮންސަޓްތަކުގައި ބައިވެރިވާ ރެޕް އާޓިސްޓް މެކްލްމޯ ފަލަސްތީނަށް ތާއީދުކޮށް ވާހަކަދެއްކުމާ ގުޅިގެން އޭނާ ޝޯތަކުން ވަކިކުރަން ނިންމި ނިންމުމާ ގުޅިގެން އުފެދުނު ހިޔާލުތަފާތުވުންތަކަށެވެ. މެކްލްމޯ ޝޯތަކުން ބޭރުކުރުމަށް ބާރުއަޅާފައިވަނީ ގިލެޓް ސްޓޭޑިއަމްގެ ވެރިޔާ ރޮބަޓް ކްރާފްޓް ހިމެނޭހެން ސްޓޭޑިއަމްތަކުގެ ވެރިންނެވެ.
ކޮންސަޓް ބާއްވާ ސްޓޭޑިއަމުން ނެރުނު ބަޔާނެއްގައި ބުނީ، ބޮސްޓަން އާއި ނިއު އިންގްލެންޑްގެ ސަރަހައްދުތަކަށް މި ހަފުތާ ބަންދުގައި މޫސުން ވަރަށް ބޮޑަށް ގޯސްވާނެ ކަމަށް އިންޒާރު ނެރެފައިވާތީ، ކަމާބެހޭ ފަރާތްތަކާ މަޝްވަރާކުރުމަށްފަހު ގިލެޓް ސްޓޭޑިއަމްގައި ބާއްވަން އޮތް އެޑް ޝީރަންގެ ކޮންސަޓްތައް ކެންސަލްކުރަން ޕްރޮމޯޓަރުންނާއި ޓުއާ އިންތިޒާމުކުރާ ފަރާތްތަކުން ނިންމާފައިވާ ކަމަށެވެ.
މީގެ އިތުރުން، ޓިކެޓް ގަތް ފަރާތްތަކަށް ފައިސާ އަނބުރާ ލިބޭނެ އިންތިޒާމު މިހާރު ހަމަޖެހިފައިވާ ކަމަށާއި، "ޓިކެޓްމާސްޓާ" މެދުވެރިކޮށް ޓިކެޓް ގަތް ފަރާތްތަކަށް އެއްވެސް އުނދަގުލަކާ ނުލައި އޮޓޮމެޓިކުން ފައިސާ ރިފަންޑް ކުރެވޭނެ ކަމަށްވެސް އެ ބަޔާނުގައިވެ އެވެ.
މިދިޔަ ހަފުތާގައި ޝީރަންއަށް ވަނީ މެކްލްމޯ ޝޯތަކުން ވަކިކުރި މައްސަލައިގައި އާންމުންގެ ބޮޑު ފާޑުކިޔުމެއް އަމާޒުވެފަ އެވެ.
މެކްލެމޯ ޝޯތަކުން ވަކިކުރީ، މީގެ ކުރިން ބޭއްވި ކޮންސަޓްތަކެއްގައި އޭނާ ފަލަސްތީނު މިނިވަންކުރުމަށް ގޮވާލައި، ގާޒާގައި ހިންގަމުންދަނީ "ނަސްލު ނައްތާލުމުގެ ގަތުލުއާންމެއް" ކަމަށް ބުނެ، ގާޒާގެ މަންޒަރުތައް ސްޓޭޖުން ދެއްކުމާ ގުޅިގެންނެވެ.
ޔަހޫދީ ބިލިއަނަރު ރޮބަޓް ކްރާފްޓް ވަނީ މެކްލްމޯގެ ވާހަކަތަކަކީ ނަފުރަތު އުފައްދާ ވާހަކަތަކެއް ކަމަށް ތުހުމަތުކޮށްފަ އެވެ. އަދި އޭނާގެ މިލްކިއްޔާތުގައި އޮންނަ "ނިއު އިންގްލެންޑް ޕެޓްރިއަޓްސް" އެމެރިކަން ފުޓްބޯޅަ ޓީމުގެ ދަނޑު ކަމަށްވާ ގިލެޓް ސްޓޭޑިއަމްގައި މެކްލްމޯއަށް ޕާފޯމް ނުކުރެވޭނެ ކަމަށް އޭނާ ބުންޏެވެ.
މި މައްސަލައިގައި ޝީރަން ބުނީ މެކްލްމޯ ވަކިކުރުމަކީ އޭނާގެ ނިންމުމެއް ނޫން ކަމަށާއި، އެއީ ޕްރޮމޯޓަރުން ނިންމި ނިންމުމެއް ކަމަށެވެ. މެކްލެމޯ ޝޯތަކުން ވަކިކުރުމާ ގުޅިގެން، ޝީރަންއާއެކު މަސައްކަތްކުރާ އެހެން އާޓިސްޓުން ވެސް ވަނީ އިހުތިޖާޖުގެ ގޮތުން ޝޯތަކުން ވަކިވެފަ އެވެ.
މިދިޔަ ހަފުތާ ބަންދުގައި އަލުން ސްޓޭޖަށް އަރައި ޝީރަން ވަނީ، އޭނާއަށް ބައެއް އުނދަގޫ ނިންމުންތައް ނިންމަން ޖެހުނު ކަމަށާއި، އެކަމުގައި ގޯސްތަކެއް ހެދިފައިވާތީ އެކަމަށް މައާފަށް އެދޭ ކަމަށް ސަޕޯޓަރުންގެ ގާތުގައި ބުނެފަ އެވެ.
