އުމުރުން 13 އަހަރުގައި މަޝްހޫރު ރެޕް ލަވަކިޔުންތެރިޔާ ޖޭ-ޒީ އޭނާ ރޭޕްކުރި ކަމަށް ބުނެ ތުހުމަތުކުރި އަންހެން މީހާ، އެއީ ދޮގު ވާހަކައެއް ކަމަށް އެއްބަސްވެއްޖެ އެވެ.
ނަން ހާމަކޮށްފައިނުވާ މި އަންހެން މީހާ 2024 ވަނަ އަހަރު ކޯޓަށް ހުށަހެޅި މައްސަލައިގައި ބުނެފައިވަނީ، 2000 ވަނަ އަހަރު ބޭއްވި އެމްޓީވީ ވީޑިއޯ މިއުޒިކް އެވޯޑްސްއަށް ފަހު އޮތް ޕާޓީއެއްގައި، އަސްލު ނަމުން ނަމަ ޝޯން ކާޓާ (ޖޭ-ޒީ) އާއި ޝޯން "ޑިޑީ" ކޯމްބްސް އޭނާއަށް މަސްތުވާ އެއްޗެއް ދިނުމަށްފަހު ރޭޕްކުރި ކަމަށެވެ.
މި ތުހުމަތުތަކަށް އެ ދެ ތަރިން އޭރުވެސް އިންކާރުކުރިއިރު، އެ އަންހެން މީހާ ވަނީ މިދިޔަ އަހަރު އެ މައްސަލަ އަނބުރާ ގެންގޮސްފަ އެވެ. އޭގެ ފަހުން ޖޭ-ޒީ ވަނީ އެ އަންހެން މީހާއާއި އޭނާގެ ވަކީލުންނާ ދެކޮޅަށް ދައުވާ އުފުލާފަ އެވެ.
އެ މައްސަލައިގައި މިދިޔަ ބުރާސްފަތި ދުވަހު ހުށަހެޅި ބަޔާނެއްގައި އެ އަންހެން މީހާ ބުނެފައިވަނީ، ޝޯން "ޖޭ-ޒީ" ކާޓާ އޭނާ ރޭޕްކޮށްފައި ނުވާ ކަމަށެވެ. އަދި އޭނާއަކީ ދުވަހަކުވެސް ޖޭ-ޒީއާ ބައްދަލުވެފައިވާ ނުވަތަ ވާހަކަދައްކާފައިވާ މީހެއް ނޫން ކަމަށާއި، ޖޭ-ޒީގެ ފަރާތުން އޭނާއަށް އެއްވެސް ކަހަލަ ބޭއަދަބީ އަމަލެއް ކުރިމަތިވެފައި ނުވާ ކަމަށް ވެސް އެ ބަޔާނުގައި ބުނެފައިވެ އެވެ.
ކޯޓު ލިޔެކިޔުންތަކުގައި "ޖޭން ޑޯ" ގެ ނަމުން ނިސްބަތްކޮށްފައިވާ އެ އަންހެން މީހާ އިތުރަށް ބުނެފައިވަނީ، ޖޭ-ޒީ އާއި ޑިޑީ އޭނާ ރޭޕްކުރި އިރު ތިންވަނަ ސެލެބްރިޓީއަކު ބަލަން ހުރި ކަމަށް ބުނެ ދެއްކި ވާހަކައަކީ ދޮގެއް ކަމަށެވެ. އަދި ޖޭ-ޒީއާ ދެކޮޅަށް އޭނާ ކުރި އެއްވެސް ތުހުމަތެއްގައި އެއްވެސް ހަގީގަތެއް ނެތް ކަމަށް ވެސް އޭނާ ބުންޏެވެ.
"އަޅުގަނޑު ކުރި މި ދޮގު ތުހުމަތުތަކުގެ ސަބަބުން ޖޭ-ޒީއަށް އިންތިހާއަށް ތަދާއި، ތަކުލީފާއި އަދި ދުވަހަކުވެސް އިއާދަނުކުރެވޭނެ ފަދަ ބޮޑެތި ގެއްލުންތަކެއް ލިބިފައިވާކަން އަޅުގަނޑު ގަބޫލުކުރަން،" އެ އަންހެން މީހާ ބުނެފައިވެ އެވެ.
މި ތުހުމަތުތަކާ ގުޅިގެން ޖޭ-ޒީ މީގެ ކުރިން ބުނެފައިވަނީ އެއީ އޭނާގެ އަތުން ފައިސާ އަތުލުމަށް (ބްލެކްމެއިލް ކުރުމަށް) ރޭވި ކަމެއް ކަމަށެވެ. އަދި އެއީ އެއްވެސް އަސާސެއް ނެތް، ހަދައިގެން ދައްކާފައިވާ ވަރަށް ދަށު ދަރަޖައިގެ ވާހަކަތަކެއްގެ ގޮތުގައި އޭނާ ސިފަކުރި އެވެ.
މަޝްހޫރު ލަވަކިޔުންތެރިޔާ ބިޔޯންސޭގެ ފިރިމީހާ، ޖޭ-ޒީ، 2025 ވަނަ އަހަރުގެ ފެބްރުއަރީ މަހު އެ އަންހެން މީހާ މައްސަލަ އަނބުރާ ގެންދިއުމުން ބުނެފައިވަނީ، މިކަމުގެ ސަބަބުން އޭނާގެ އަންހެނުންނާއި، ދަރިންނާއި، އާއިލާއަށް ލިބުނު ނަފްސާނީ އަނިޔާއަކީ ދުވަހަކުވެސް ހަނދާނުން ފޮހެލެވޭނެ ކަންކަމެއް ނޫން ކަމަށެވެ.
އެމެރިކާގެ އެލަބާމާއަށް ނިސްބަތްވާ މި އަންހެން މީހާގެ ނަން މިހާރު ވަނީ ޖޭ-ޒީ ހުށަހަޅާފައިވާ ދައުވާއިން އުނިކޮށްފަ އެވެ.
އެ އަންހެން މީހާ ބުނި ގޮތުގައި، އޭނާ މިވީ އިއުތިރާފަކީ ޖޭ-ޒީގެ ފަރާތުން ނުވަތަ އެހެންވެސް ފަރާތަކުން ފައިސާ ލިބިގެން ވީ އިއުތިރާފެއް ނޫނެވެ.
