ރ. މަޑުއްވަރީގައި ބިދޭސީއެއް އަތުން ފޭރި މާރާމާރީ ހިންގި މައްސަލައެއް ފުލުހުން ބަލަން ފަށައިފި އެވެ.
ފުލުހުން ބުނީ މަޑުއްވަރީގައި ބިދޭސީ އަންހެނެއް އަތުން ފޭރި މާރާމާރީ ހިންގި މި މައްސަލައިގައި މިހާތަނަށް އެއްވެސް މީހަކު ހައްޔަރުކޮށްފައި ނުވާ ކަމަށެވެ.
ސޯޝަލް މީޑިއާގައި ދައުރުވަމުންދާ ވީޑިއޯއިން ފެންނަ ގޮތުގައި ބިދޭސީ އަންހެން މީހާ އަތުން ފޭރި މާރާމާރީ ހިންގާފައިވަނީ ބަންގްލަދޭޝްއަށް ނިސްބަތްވާ ފިރިހެނެކެވެ.
ރާއްޖޭގައި ބިދޭސީން ހިންގާ ކުށްތައް ދުވަހަކަށްވުރެ ދުވަހެއް ދަނީ އިތުރުވަމުންނެވެ. އެގޮތުން އެކި މައްސަލަތަކުގައި މީހުން ހައްޔަރުކޮށް، ބައެއް މީހުން ދަނީ ޑިޕޯޓްކުރަމުންނެވެ.
ފުލުހުންގެ ތަފާސް ހިސާބުތައް ދައްކާގޮތުގައި މި އަހަރު މިހާތަނަށް ފޭރުމުގެ 108 މައްސަލައެއް ވަނީ ރިޕޯޓުކޮށްފަ އެވެ. އޭގެ ތެރެއިން ފަސް މައްސަލައަކީ މި މަހު ހުށަހެޅުނު މައްސަލަތަކެވެ.
