ފުލިދޫ ޕޮލިހާއި ވ. އަތޮޅު މަދަރުސާ ގުޅިގެން، އެ މަދަރުސާގެ ދަރިވަރުންނާއި މުދައްރިސުން އަދި ބެލެނިވެރިންނަށް ކުރިއަށް ގެންދިޔަ މޫދު ކުލާހެއްގައި ނޭވާލާން އުނދަގޫވި ބެލެނިވެރިޔަކަށް ފަރުވާދެނިކޮށް އިއްޔެ ނިޔާވެއްޖެ އެވެ.
އެ ހާދިސާގައި ނިޔާވީ ބ. ކުޑަރިކިލު، އާއިޝަތު އާތިފާ، 39، އެވެ. އޭނާ ނިޔާވީ ވ. ފުލިދޫ ހެލްތު ސެންޓަރަށް ގެންގޮސް ފަރުވާދެމުން ދަނިކޮށް ކަމަށް ފުލުހުން ބުންޏެވެ.
އާއިޝަތު އާތިފާގެ ހަށިގަނޑު މާލޭ އައިޖީއެމްއެޗް ހޮސްޕިޓަލަށް ގެނެސް މެޑިކަލް އެގްޒެމިނޭޝަންއެއް ހެދުމަށްފަހު ރޭ ދަންވަރުގެ ވަގުތެއްގައި ވަނީ އާއިލާއާ ހަވާލުކޮށްފަ އެވެ.
އާތިފާގެ ހަށިގަނޑު ރޭ ފަތިސް ނަމާދަށްފަހު މާލޭ އާސަހަރާ މިސްކިތުގައި ވަނީ ވަޅުލާފަ އެވެ. ނަމަވެސް އެ ހާދިސާއާ ގުޅިގެން ބަލަންޖެހޭ ކަންކަން ބަލަމުންދާ ކަމަށް ފުލުހުން ބުންޏެވެ.
