ކުޑަކުދިންގެ ކާނާގެ ބާވަތެއް ކަމަށްވާ ލެކްޓޯޖެން ރާއްޖެއިން ހުސްވެގެން އުޅެނީ މެނުފެކްޗަރިންއަށް އައި ބަދަލަކާ ގުޅިގެން ދިމާވި އިދާރީ ކަމަކުންކަން އެނގިއްޖެ އެވެ.
މިކަމުގެ މައުލޫމާތު އެނގޭ މީހަކު އަދަދު އަށް ބުނީ ލެކްޓޯޖެންގެ މެނިފެކްޗަރިންއަށް އައި ބަދަލާ ގުޅިގެން ދިމާވި އިދާރީ މައްސަލަ ހައްލުކުރުމުގެ މަސައްކަތް ކުރަމުންދާ ކަމަށާއި ވަރަށް އަވަހަށް ލެކްޓޯޖެން މާކެޓަށް ނެރެވޭނެ ކަމަށެވެ.
"ލެކްޓޯޖެންގެ މެނުފެކްޗަރިންއަށް އައި ބަދަލަކާ ގުޅިގެން ދިމާވި އިދާރީ ސަބަބަކާ ގުޅިގެން ސްޓޮކް ހުސްވީ. ނަމަވެސް އެ މައްސަލަ ހައްލުކޮށް ވީހާވެސް އަވަހަށް ލެކްޓޯޖެން ނެރުމަށް ދަނީ މަސައްކަތް ކުރަމުން،" އޭނާ ބުންޏެވެ.
މައުލޫމާތު ލިބިފައިވާ ގޮތުގައި ލެކްޓޯޖެން މެނުފެކްޗާކުރާއިރު ލޭބަލްގައި ކުރިން ބޭނުންކުރަމުން އައި "ލެކްޓޯޖެން ކްލެސިކް" ނަން މިހާރު ވަނީ "ލެކްޓޯޖެން އެކްޓިވް ޕްރޯ" އަށް ބަދަލުކޮށްފަ އެވެ. އެއާއެކު އިދާރީ މައްސަލަތައް ކުރިމަތިވީ ކަމަށް މައުލޫމާތު ލިބެ އެވެ.
ރާއްޖެއިން ލެކްްޓޯޖެން ހުސްވުމާ ގުޅިގެން ސޯޝަލް މީޑިއާގައި ގިނަ ބަޔަކު ދަނީ އެކަމުގެ ޝަކުވާ ކުރަމުންނެވެ. ނެސްލޭގެ އެ އުފެއްދުން ރާއްޖެއަށް 2003 ވަނަ އަހަރުން ފެށިގެން ދަނީ އެތެރެކުރަމުންނެވެ.
