އިސްލާމިކް ޓްރޭޑް ފިނޭންސް ކޯޕަރޭޝަނުގެ ސީއީއޯ އަދީބް ޔޫސުފް އަލް އާމާ، ރައީސް މުހައްމަދު މުއިއްޒުއާ މިއަދު ބައްދަލު ކުރައްވައިފި އެވެ.
ރައީސް އޮފީހުން އާންމު ކުރި ބަޔާނެއްގައި ބުނެފައި ވަނީ ރައީސުލްޖުމްހޫރިއްޔާގެ ރަސްމީ ގެކޮޅު މުލީއާގޭގައި ކުރިއަށްގެންދިޔަ އެ ބައްދަލުވުމުގައި، ރާއްޖެ އާއި އައިޓީއެފްސީއާ ދެމެދު އިގްތިސާދީ ގޮތުން ގުޅުން ބަދަހި ކުރުމަށާއި ރާއްޖޭގެ ވިޔަފާރި އާއި އުމްރާނީ ތަރައްގީ އާއި ތަރައްގީގެ ލަނޑުދަނޑިތަކާ ގުޅޭ ގޮތުން މަޝްވަރާ ކުރި ކަމަށެވެ.
އައިޓީއެފްސީ އާއި ދިވެހިރާއްޖެއާ ދެމެދު އޮތް ގުޅުން ފާހަގަކޮށް، އެ ގުޅުން އިތުރަށް ވަރުގަދަ ކުރަން އެ ދެ ބޭފުޅުން ވެސް އެ ބައްދަލުވުމުގައި ވާހަކަ ދެއްކެވި ކަމަށް ރައީސް އޮފީހުން ބުނެ އެވެ.
އައިޓީއެފްސީއަކީ އިސްލާމިކް ޑިވެލޮޕްމަންޓް ބޭންކުގެ ދަށުން ހިންގާ ތަނެކެވެ. ޑިވެލޮޕްމަންޓް ބޭންކަކީ ސައުދީ އަރަބިއްޔާއިން އުފެއްދި ބޭންކެކެވެ. އައިޓީއެފްސީގެ މައިގަނޑު ބޭނުމަކީ ވިޔަފާރި ކުރިއެރުވުން ކަމަށް އެ ކޯޕަރޭޝަނުގެ ވެބްސައިޓުގައި ބުނެފައިވެ އެވެ.
