ބޭންކް އޮފް މޯލްޑިވްސްއަށް ޑޮލަރު ލިބުން ދަތިވެ، ރާއްޖެއިން ބޭރުން އެތެރެ ކުރާ މުދަލަށް ޓީޓީ ހަދަން ވެސް ގޮންޖެހުންތަކެއް ކުރިމަތިވެފައިވާ ކަމަށް އެ ބޭންކުން މިއަދު ބުނެފި އެވެ.
ބޭންކުން ވަނީ ރާއްޖެއިން ބޭރުގެ އީ-ކޮމާސް ސައިޓުތަކުން ވިޔަފާރި ކުރެވޭނެ މިންވަރުގެ އާ ލިމިޓެއް މިއަދު ކަނޑައަޅައިފަ އެވެ. އެއީ މުޅި ގައުމަށް މަހަކު އެންމެ 16 މިލިއަން ޑޮލަރެވެ. އެއާއެކު ބޭންކުން ނެރުނު ބަޔާނެއްގައި ވަނީ ޑޮލަރު ނުލިބޭ ކަމަށް އެއްބަސްވެފަ އެވެ.
"އީ-ކޮމާސް ވިޔަފާރިތަކަށް ބޭނުންވާ ބޭރު ފައިސާގެ މިންވަރު ވަރަށް ބޮޑަށް އިތުރުވެފައިވެއެވެ. މި މިންވަރު މިހާރުވަނީ ބޭންކަށް އެކި ވަސީލަތްތަކުން ލިބެން ހުރި ޑޮލަރުގެ މިންވަރަށްވުރެ އިތުރުވެފަ،" ބީއެމްއެލް އިން ބުންޏެވެ.
ބޭންކުން ބުނީ ޑޮލަރު ނުލިބޭތީ ޓީޓީގެ އިތުރުން އެހެނިހެން ޒަރޫރީ ހިދުމަތްތައް ފޯރުކޮށްދިނުމަށް ވެސް ދަތިތަކެއް ކުރިމަތިވެފައިވާ ކަމަށެވެ.
"ބޭރު ފައިސާއަށް އޮތް މި ޑިމާންޑުގެ ސަބަބުން ބޭންކުގެ ބޭރު ފައިސާގެ ތަނަވަސްކަމަށް ބޮޑެތި ގޮންޖެހުންތަކެއް ކުރިމަތިވެ، ބޭންކުން ފޯރުކޮށްދޭ އެހެނިހެން ޒަރޫރީ ހިދުމަތްތަކުގެ އިތުރުން ޓެލެގްރަފިކް ޓްރާންސްފަރ (ޓީޓީ) ހެދުމަށް ވަނީ ދަތިތަކެއް ކުރިމަތިވެފަ،" ބީއެމްއެލް އިން ބުންޏެވެ.
ޑޮލަރުގެ ލިބުން ދަތިވެގެން 2024 ވަނަ ބީއެމްއެލް އިން ވަނީ ކާޑު ލިމިޓުތަކެއް ތައާރަފުކޮށްފަ އެވެ. ނަމަވެސް އެއީ ބޭންކުން ކުރަން އުޅުނު ބަގާވާތެއް ކަމަށް ބުނެ ސަރުކާރުން މަޖުބޫރުކޮށްގެން އެ ބަދަލުތައް ހަމަ އެ ދުވަހު ވަނީ އަނބުރާ ގެންގޮސްފަ އެވެ.
ޑޮލަރުގެ ދަތިކަން އިންތިހާއަށް އިތުރުވެ، ބޭންކް އޮފް މޯލްޑިވްސް އިން އިތުރު ލިމިޓެއް މި ކަނޑައެޅީ، ޑޮލަރުގެ މައްސަލައަށް ހައްލެއް ހޯދަން ސަރުކާރުން ސިޔާސަތަކަށްފަހު ސިޔާސަތެއް ތައާރަފު ކުރަމުންދަނިކޮށެވެ.
ޑޮލަރުގެ މައްސަލަ ހައްލު ކުރަން ސަރުކާރުން ވަނީ ރިސޯޓުތަކަށް ލިބޭ އާމްދަނީގެ 20 ޕަސެންޓު މާރު ކުރަންޖެހޭ ގޮތަށް 2024 ވަނަ އަހަރު ހަދައިފަ އެވެ. އެވަރުން ވެސް ޑޮލަރުގެ މައްސަލަ ހައްލު ނުވެގެން، އާމްދަނީގެ 40 ޕަސެންޓު މާރު ކުރަންޖެހެ ގޮތަށް މިހާރު ވަނީ ހަމަޖައްސައިފަ އެވެ.
ރިސޯޓުތަކުން ބުނީ ލިބޭ އާމްދަނީގެ 10 ޕަސެންޓަށް ވުރެ އިތުރު އެއްޗެއް މާރު ކުރުމަކީ ވިޔަފާރި ކުރިއަށްގެންދެވޭނެ މޮޑެލެއް ނޫން ކަމަށެވެ. މުސާރަ އާއި ސާވިސް ޗާޖާއި ތެޔޮ ބިލާއި ލޮޖިސްޓިކްސް އާއި ގެސްޓް ޓްރާންސްޕާ އާއި ޓީޖީއެސްޓީ އާއި ގްރީން ޓެކްސް އާއި ވިތުހޯލްޑިން ޓެކްސް އާއި ޓޫރިޒަމް ލޭންޑް ރެންޓު އަދި ލޯނަށް ރިސޯޓުތަކުން މިހާރު ވެސް ފައިސާ ދައްކަނީ ޑޮލަރުންނެވެ.
