ދިވެހިރާއްޖޭގެ ސުޕްރީމް ކޯޓުން ނިންމާ ނިންމުންތަކުގައި އެއްގޮތްކަން ނުހިފެހެއްޓޭ ކަމަށް ވިދާޅުވެ ކުރީގެ ރައީސް އަބްދުﷲ ޔާމީން އެ ކޯޓަށް ފާޑުވިދާޅުވެއްޖެ އެވެ.
ޕީއެންއެފް އިން ބޭއްވި "ފެހި ސިގްނަލް" ޖަލްސާގައި ޔާމީން ވިދާޅުވީ ސުޕްރީމް ކޯޓުން އެކި މައްސަލަތަކުގައި ތަފާތު ގޮތްގޮތަށް އަމަލުކުރުމުގެ ސަބަބުން އިތުބާރުކުރަންވީ މައްސަލައެއް ނޭނގޭ ކަމަށާއި ގާނޫނުގައި ލިޔެގެންވެސް މައްސަލަ ހައްލުކުރަންޖެހިފައި އެބަހުރި ކަމަށެވެ.
"ސުޕްރީމް ކޯޓުން މައްސަލައެއް ނިންމީމަ ގާނޫނެއް ހެދެންދެން އެ މައްސަލަ ނިންމެވުން އެހެން ގޮތަކަށް ބަދަލުވަންދެން އަޅުގަނޑުމެން ދެކެނީ ނޫނިއްޔާ އަޅުގަނޑުމެން މިހާތަނަށް އަމަލުކުރަމުން އައީ މިއީ އިސްތިގުރާރުވެފައި ހުރި އުސޫލްތައް ކަމަށް. މިއީ ގާނޫނު ކަމަށް. ދެން އެކަން މިއަށްވުރެ ފުރިހަމަ ކުރާ ކަމަށްވާނަމަ ގާނޫނުގެ ވާހަކަ އެގޮތަށް ލިޔަން ޖެހެނީ،" ޔާމީން ވިދާޅުވި އެވެ.
ޔާމީން ވިދާޅުވީ އެއްވެސް ދާއިރާއަކުން ނިންމާ ކަމަކާ މެދު ފާޑުނުކިޔޭ ގޮތަށް އޮވެގެން ނުވާނެ ކަމަށެވެ. އެއީ ރާއްޖޭގައި ހައްލެއް ހޯދަންޖެހިފައިވާ ބޮޑު މައްސަލައެއްގެ ގޮތުގައި އެމަނިކުފާނު ފާހަގަކުރެއްވި އެވެ.
"އަޅުގަނޑުމެންނަށް ފެނިގެން މިދަނީ އެއް މައްސަލައިގައި ސުޕްރީމް ކޯޓުން ތަފާތު ގޮތްގޮތް އިހްތިޔާރު ކުރާތަން. އެހެންވީމަ ސުޕްރީމް ކޯޓުން ނިންމާ ކޮން މައްސަލައަކަށްތޯއޭ އިތުބާރު ކުރަންވީ. އެއް މައްސަލައިގައި މި ވިދާޅުވަނީ މިހެން ނިންމާފައި އޮތްނަމަވެސް ތިމަންނަމެން އެއާ ދުރަށް ގޮސްފައި ތިމަންނަމެން ވަކި ގޮތަކަށް މައްސަލަ ނިންމަން ބޭނުންވަނީއޭ."
މީގެ އިތުރުން، ފަނޑިޔާރުންނަކީ ވެސް އިންސާނުން ކަމަށްވާތީ، އެ ބޭފުޅުންގެ ކިބައިގައި ވެސް ދަހިވެތިކަމާއި، އެކި ކަހަލަ ބޭނުންތަކާއި މަގްސަދުތައް ހުންނާނެ ކަމަށް ޔާމީން ވިދާޅުވި އެވެ. އެމަނިކުފާނު ވިދާޅުވީ މިފަދަ ކަންކަމުގެ ސަބަބުން ގައުމަށް ހިތްދަތި ދުވަސްތަކެއް ކުރިމަތިވަމުންދާ ކަމަށާއި، މި ހިތްދަތިކަން އިތުރުވަނީ މިފަދަ ކަންކަމުގެ ތެރޭގައި ސަރުކާރުގެ ނުފޫޒު އޮންނާތީ ކަމަށެވެ.
"އަޅުގަނޑުމެންގެ ބަދުނަސީބަކީ، އަޅުގަނޑުމެންގެ ބަދުނަސީބަކީ ސުޕްރީމް ކޯޓަކީ ފަހު ބަސް ބުނާ މުގައްދަސް ތަނެއް ކަމަށް ނިންމައިގެން ތިބޭއިރު ސުޕްރީމް ކޯޓުން އެބޭފުޅުންގެ އަހުދާއި އެބޭފުޅުންގެ ހަވާލުވެފައި އޮތް އަމާނާތާ ހިލާފުވެވަޑައިގަތީމަ ހާދަ ބަދުނަސީބު ބައެކޭ ރައްޔިތުން މިއީ. އެހެންވީމަ މިއަށް އަޅުގަނޑުމެން ހައްލެއް އެބަ ހޯދަންޖެހެއޭ. މި ހައްލު އަޅުގަނޑުމެން ހޯދަން އެބަޖެހޭ. އެއީ ދެއި އާ ނޮޓް އޭންޖަލްސް. ދެއި އާ އިކުއަލީ ފެލިބޯސް. އަޅުގަނޑުމެން އެކަންޏެއް ނޫން ކުށް ކުރާނީއެއް،" ޔާމީން ވިދާޅުވި އެވެ.
"ހަމަ އެއީވެސް އިންސާނުން. އެމީހުންގެވެސް އެކި ކަހަލަ ގްރީޑް ހުންނާނެ. ނީޑް ހުންނާނެ. މޯޓިވްސް ހުންނާނެ. އަދި އެ ނޫން ކަންތައްތައްވެސް ހުންނާނެ. އެހެންވީމަ އަޅުގަނޑުމެންނަށް ފެނިގެންމިދަނީ ހިތްދަތި ދުވަސްތަކެއް. އެކަމަކު ހިތްދަތިކަން އިތުރުވެގެންދަނީ މިކަންކަމުގައި ސަރުކާރުގެ އަތެއްވާތީ."
ސުޕްރީމް ކޯޓަކީ ފަހު ބަސް ބުނާ މުގައްދަސް ތަނެއްގެ ގޮތުގައި ބަލައިގެން ތިބޭއިރު، އެ ބޭފުޅުންނާ ހަވާލުވެފައިވާ އަމާނާތާ ހިލާފުވުމަކީ ހިތާމަހުރި ކަމެއް ކަމަށް ޔާމީން ވިދާޅުވި އެވެ.
