ހުޅުމާލެއިން އެޕާޓުމެންޓު ކުއްޔަށް ދޫކުރާކަމަށް ބުނެ ސްކޭމްތަކެއް ހިންގަމުންދާތީ އެކަމަށް ސަމާލުވުމަށް ފުލުހުންގެ މުއައްސަސާއިން އިލްތިމާސްކޮށްފި އެވެ.
މިރޭ ފުލުހުން އާންމުކުރި ބަޔާނެއްގައި ބުނީ ދުވަހު ކުއްޔަށާއި މަހު ކުއްޔަށް އެޕާޓުމެންޓު ކުއްޔަށް ދޫކުރާކަމަށް ބުނެ ސޯޝަލްމީޑިއާގެ އެކި މަންސަތައް މެދުވެރިކޮށް މަކަރާއި ހީލަތުން ފައިސާ ހޯދަމުންދާ މައްސަލަތަކެއް ފާހަގަކުރެވިފައިވާ ކަމަށެވެ.
އެގޮތުން، އެފަދަ މަކަރާއި ހީލަތް ހަދާ ފަރާތްތަކުން، Hulhumale Daily Rent Apartment (@hulhumaleapartment) ފަދަ ޓިކްޓޮކް އެކައުންޓުތަކާއި 7217905 ނަންބަރު ބޭނުންކޮށްގެން އޮޅުވައިލުންތައް ހިންގަމުންދާކަން އެކަމާ ގުޅިގެން ފުލުހުން ހިންގި ތަހުގީގަށް އެނގިފައިވާ ކަމަށް ފުލުހުން ބުންޏެވެ.
އެފަދަ ފަރާތްތަކުން މަކަރާއި ހީލަތް ހެދުމަށް ބޭނުންކުރާ އުކުޅުތައް ވެސް ފުލުހުންގެ ބަޔާނުގައި ހިއްސާކޮށްފައިވެ އެވެ. އޭގެ ތެރެއިން ސަމާލުވުމަށް ފުލުހުން އެދިފައި ވަނީ:
- މީހުން ޝައުގުވެރި ކުރުވުމަށްޓަކައި އެހެން ފަރާތްތަކުގެ އެޕާޓުމެންޓުތަކުގެ ވީޑިއޯ އާއި ފޮޓޯ ވަގަށް ނަގައިގެން ބޭނުން ކުރުމާއި އެކަށީގެންނުވާ ހެޔޮ އަގުތަކުގައި ކުއްޔަށްދޭ ކަމަށް ބުނެ އިޝްތިހާރުކުރުން
- މެސެޖިން ޕްލެޓުފޯމްތަކުން މުއާމަލާތްކުރަން ފެށުމުން އެޕާޓުމެންޓު ހޯދުމަށް އެހެން ކަސްޓަމަރުން ވެސް އެދެމުންދާ ކަމަށް ބުނެ އަވަސް އަރުވާލައިގެން ބުކިން ކަށަވަރު ކުރުމަށް ވަގުތުން އެޑްވާސް ފައިސާ ދެއްކުމަށް ޑިމާންޑުކުރުން
- ވަކި ބޭންކް އެކައުންޓުތަކަކަށް 2500 ރުފިޔާ އާއި 10،000 ރުފިޔާއާ ދެމެދުގެ އަދަދަކުން އެޑްވާންސް ފައިސާ ޖަމާކުރުމަށް ބުނުން
- އިތުބާރު ހޯދުމުގެ ގޮތުން ވަގަށް ނަގާފައިވާ އައިޑީ ކާޑާއި ސައްހަ ނޫ؟ން ލިޔެކިޔުންތައް ޗެޓް މެދުވެރިކޮށް ފޮނުވުން
- ފައިސާ ޓްރާންސްފާ ކުރި ސްލިޕް ފޮނުވުމާއެކު އެ ފަރާތްތަކާ ކުރަމުންދިޔަ މުއާމަލާތްތައް ވަގުތުން ހުއްޓާލައި އެޕާޓުމެންޓު ހަވާލުނުކޮށް އަދި، ފައިސާ ވެސް އަނބުރާ ނުދިނުން
ފުލުހުން އެދިފައި ވަނީ ތަނެއް ކުއްޔަށް ހިފުމުގެ ކުރިން، އެ ތަނެއް ބަލައި، އެތަނުގެ މިލްކުވެރިކަން ކަށަވަރު ކުރުމަށްފަހު ނޫނީ އެއްވެސް މީހަކަށް ފައިސާ ނުދެއްކުމަށެވެ. އަދި، ސައްހަކަން ކަށަވަރު ނުކުރެވޭ ސޯޝަލްމީޑިއާ ޕްލެޓްފޯމްތަކުން ފައިސާގެ މުއާމަލާތްތައް ނުހިންގުމަށް އެ މުއައްސަސާއިން އިލްތިމާސްކޮށްފައިވެ އެވެ.
