ޖަރުމަނުވިލާތުގެ ބޮންގައި ހުންނަ ރަޝިއާގެ ކޮންސިއުލޭޓާއި، ބާލިންގައި ހުންނަ ރަޝިއާގެ ސަގާފީ މަރުކަޒު ބަންދުކުރަން ޖަރުމަނު ސަރުކާރުން ނިންމި ނިންމުމަށް ރައްދު ދިނުމުގެ ގޮތުން، ސެއިންޓް ޕީޓަސްބާގްގައި ހުންނަ ޖަރުމަނުގެ ކޮންސިއުލޭޓް ޖެނެރަލް ބަންދުކުރަން ނިންމާފައިވާކަން ރަޝިއާ އިން ހޯމަ ދުވަހު އިއުލާންކޮށްފި އެވެ.
ޖަރުމަނުވިލާތުން މި ފިޔަވަޅުތައް އަޅާފައިވަނީ، އެ ގައުމުގެ ލައިޕްޒިގް/ހާލޭ އެއާޕޯޓަށް ރަޝިއާ އިން ޑްރޯން ހަމަލާއެއް ދޭން އުޅުނު ކަމަށް ތުހުމަތުކުރުމަށް ފަހުގަ އެވެ. ނަމަވެސް ރަޝިއާ އިން ވަނީ އެ ތުހުމަތުތަކަކީ އެއްވެސް އަސާސެއް ނެތް، ހަގީގަތާ ހިލާފު ދޮގު ވާހަކަތަކެއް ކަމަށް ބުނެފަ އެވެ.
ރަޝިއާގެ ފޮރިން މިނިސްޓްރީން ނެރުނު ބަޔާނެއްގައި ބުނެފައިވަނީ، ސެއިންޓް ޕީޓަސްބާގްގައި ހުންނަ ޖަރުމަނުގެ ކޮންސިއުލޭޓްގެ ހުރިހާ މަސައްކަތްތަކެއް ސެޕްޓެމްބަރު މަހުގެ 18 ވަނަ ދުވަހުގެ ކުރިން ހުއްޓާލަން ޖެހޭނެ ކަމަށެވެ.
މީގެ އިތުރުން، ރަޝިއާގައި ހިންގާ ޖަރުމަނުގެ ސަގާފީ މަރުކަޒުތައް ކަމަށްވާ "ގޯތޭ އިންސްޓިޓިއުޓް" ތަކުގެ ހަރަކާތްތައް ވެސް ހުއްޓާލަން ޖެހޭނެ ކަމަށް އެ ގައުމުން ވަނީ ކަށަވަރުކޮށްދީފަ އެވެ. އަދި އެ ތަންތަނުގައި މަސައްކަތްކުރާ މުވައްޒަފުން ސެޕްޓެމްބަރު 13 ގެ ކުރިން ރަޝިއާ އިން ފުރައިގެން ދިއުމަށް ވެސް ވަނީ އަންގާފަ އެވެ.
ރަޝިއާގެ ފޮރިން މިނިސްޓްރީން ބުނީ، ދެ ގައުމުގެ ދެމެދުގައި އޮތް ގުޅުން އިތުރަށް ގޯސްވުމަށް މަގުފަހިވާ ފަދަ ކަންކަން އަނެއްކާވެސް ފަށާފައިވަނީ ޖަރުމަނު ސަރުކާރުން ކަމަށެވެ. އަދި މިކަމުގެ ސަބަބުން ކުރިމަތިވާނެ ހުރިހާ ނަތީޖާއެއްގެ ފުރިހަމަ ޒިންމާ އުފުލަން ޖެހޭނީ ޖަރުމަނު ސަރުކާރުން ކަމަށް ވެސް އެ މިނިސްޓްރީން ބުނެފައިވެ އެވެ.
