"ދައުރު" ނޫހަށް އެއްޗެހި ގޮވައި ރައީސް މުހައްމަދު މުއިއްޒުގެ އިސް ތަރުޖަމާނު މުހައްމަދު ހުސެއިން ޝަރީފް (މުންދު) ނެރުއްވި ބަޔާން ޑިލީޓު ކުރުމަށްފަހު، ބަސްމަގު ބަދަލުކޮށް އެހެން ބަޔާނެއް ރައީސް އޮފީހުން އާންމުކޮށްފި އެވެ.
ރިސޯޓުތަކަށް ލިބޭ އާމްދަނީގެ 40 ޕަސެންޓު މާރުކުރާ ގޮތަށް ހަމަޖެއްސީ ރިސޯޓު އޯނަރުންނާ މަޝްވަރާ ކުރުމަށްފަހު ކަމަށް މުންދު ވިދާޅުވެފައިވާތީ "ދައުރު" އިން ވަނީ އެކަމުގެ ފެކްޓް ޗެކެއް ހަދައިފަ އެވެ. ދައުރުން ބުނީ މުންދު ވިދާޅުވެފައި ވަނީ "ބުހުތާނު ދޮގެއް" ކަމަށެވެ.
އެ ނޫހުގެ ހަބަރަށް ރައްދު ދެއްވަމުން މުންދު ރޭ ވަނީ ރައީސް އޮފީހުގެ ރަސްމީ ވެބްސައިޓުގައި ދެ ސަފުހާގެ ބަޔާނެއް އާންމުކުރައްވައި "ދައުރު" ނޫހުން ހެދީ "ރޯބުހުތާނު ދޮގެއް" ކަމަށް ވިދާޅުވެފަ އެވެ.
"ދައުރު" ނޫހަށް އެއްޗެހި ކިޔައި މުއިއްޒުގެ ތަރުޖަމާނު ނެރުނު ބަޔާނަށް ފާޑުކިޔުން އަމާޒުވުމުން ބަޔާން ޑިލީޓުކޮށްފި
އެ ނޫހުގެ ހަބަރަށް ރައްދު ދެއްވަމުން މުންދު މިއަދު ވަނީ ދެ ސަފުހާގެ ބަޔާނެއް ނެރެ "ދައުރު" ނޫހުން ހެދީ "ރޯބުހުތާނު ދޮގެއް" ކަމަށް ވިދާޅުވެފަ އެވެ.
ނަމަވެސް، އެ ބަޔާން ނެރުނުތާ ކުޑަ ވަގުތުކޮޅެއްގެ ތެރޭގައި ވަނީ ޑިލީޓުކޮށްފަ އެވެ. އޭގެ ފަހުން، ރައީސް އޮފީހުން އާންމުކުރި ބަޔާނުގައި ވަނީ ބަސްމަގު ބަދަލުކޮށް، ދައުރު ނޫހުގެ ފެކްޓު ޗެކްއަކީ "ބުހުތާނު ދޮގު" ކަމަށް އޮތް ބައިގެ ބަދަލުގައި އެއީ "ހަގީގަތާއި ހިލާފު" ވާހަކަތަކެއް ކަމަށް ބުނެފަ އެވެ.
އެގޮތަށް އަމަލުކުރީ ކީއްވެތޯ ސުވާލުކުރުމަށް މުންދުއަށް ގުޅުމުން ފޯނަށް ޖަވާބެއް ނުދެއްވަ އެވެ. އެ ސުވާލުގެ މެސެޖުގެ ޒަރިއްޔާއިން ކުރުމުން އޭނާ ޖަވާބެއް ނުދެއްވި އެެވެ.
"ދައުރު" ނޫހަށް އެއްޗެހި ކިޔައި ރައީސް އޮފީހުން ބަޔާނެއް އާންމުކުރުމާއެކު، ކުޑަ ވަގުތުކޮޅެއްގެ ތެރޭގައި ގިނަ ބައެއްގެ ފާޑުކިޔުން އެ ބަޔާނަށް އަމާޒުވި އެވެ. ގިނަ މީހުން ބުނީ އެ ބަޔާނުގެ ބަސްމަގު ހުރީ ގައުމުގެ އެންމެ މަތީ އޮފީހާ އެއް ފެންވަރެއްގައި ނޫން ކަމަށެވެ.
"މިއީ ހަމަ ރައީސް އޮފީހުގެ ރަސްމީ ޕޭޖު؟ ދެ ފަހަރަށް ޗެކްކޮށްލައިފިން ރަސްމީ ޕޭޖުތޯ މިއީ،" މުންދުގެ ބަސްމަގު ހުރި ގޮތުން މީހަކު ފޭސްބުކްގައި ބުނެފައިވެ އެވެ.
އެހެން މީހަކު ބުނެފައި ވަނީ "މިއީ ގައުމެއްގެ ރައީސް އޮފީހުގެ ޕޭޖަކުން ލިޔަންޖެހޭ ކަހަލަ އެއްޗެއް ނޫން" ކަމަށެވެ. އަދި "ރާއްޖޭގެ ކަންމަތި ޕޭޖުތައްހެން" ނުއުޅެން ވެސް ރައީސް އޮފީހަށް އޭނާ އިލްތިމާސްކޮށްފައިވެ އެވެ.
