ރާއްޖޭގެ އެންމެ ދުވަސްވީ އެއާޕޯޓުތަކުގެ ތެރޭގައި ހިމެނޭ ލ. ކައްދޫ އެއާޕޯޓު ހިންގާ ކައްދޫ އެއާޕޯޓްސް ކުންފުންޏަށް މިދިޔަ އަހަރު ލިބުނު 29.5 މިލިއަން ރުފިޔާގެ ގެއްލުމާއެކީ، އެ ކުންފުނީގެ ޖުމްލަ ގެއްލުމުގެ އަދަދު 325.1 މިލިއަން ރުފިޔާއަށް އަރައިފި އެވެ.
އޮޑިޓާ ޖެނެރަލް އޮފީހުން އާންމުކޮށްފައިވާ ކައްދޫ އެއާޕޯޓު ކުންފުނީގެ ނިމުނު އަހަރުގެ މާލީ ރިޕޯޓުން ދައްކާ ގޮތުގައި، މިދިޔަ އަހަރު އެ ކުންފުންޏަށް އާމްދަނީގެ ގޮތުގައި ލިބިފައި ވަނީ 11 މިލިއަން ރުފިޔާ އެވެ. ނަމަވެސް އެއާޕޯޓް ހިންގުމުގެ ހަރަދުތަކާއި އެހެނިހެން ހަރަދުތަކަށް 38.7 މިލިއަން ރުފިޔާ ހޭދަވެފައިވެ އެވެ.
އެ ކުންފުނިން އެންމެ ބޮޑު ހަރަދެއް ހިނގާފައި ވަނީ މުވައްޒަފުންނަށް މުސާރަތާކާއި އެލަވަންސްތައް ދިނުމަށެވެ. މިދިޔަ އަހަރު އެ ކުންފުނިން ވަނީ މުވައްޒަފުންނަށް 26.9 މިލިއަން ރުފިޔާ ހަރަދުކޮށްފަ އެވެ.
ކައްދޫ އެއާޕޯޓަކީ ސިފައިންގެ މަރުކަޒެއްގެ ގޮތުގައި ބޭނުންކުރަމުން އަންނަ ތަނެއް ނަމަވެސް، އާންމު ދަތުރުފަތުރުތައް ވެސް ގަވާއިދުން ކުރާ އެއާޕޯޓެކެވެ. ސަރުކާރުން ވަނީ ވަނީ މި އެއާޕޯޓް ބައިނަލްއަގުވާމީ ފެންވަރަށް ތަރައްގީކުރުމަށް ނިންމައި، އެ މަސައްކަތް މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) އާ ހަވާލުކޮށްފަ އެވެ.
އޮޑިޓުން ހާމަވީ އަނެއް ކަމަކީ މި އަހަރުގެ އޭޕްރިލް މަހުގެ ތެރޭގައި ފިނޭންސް މިިނިސްޓްރީގެ އެންގުމެއްގެ ދަށުން، ކައްދޫ އެއާޕޯޓު ކުންފުނީގެ ހުރިހާ މުަދަލަކާއި ދަރަންޏެއް، ރީޖަނަލް އެއާޕޯޓްސް ކުންފުނި (އާރުއޭސީއެލް) އަށް ބަދަލުކުރަން ނިންމާފައިވާ ކަމެވެ. އެއީ 2024 ވަނަ އަހަރުގެ ނިޔަލަށް އެ ކުންފުނީގެ މާލީ ބާޔަންތަކުގެ މައްޗަށް ބިނާކޮށެވެ.
އާރުއޭސީއެލްއަކީ މި ސަރުކާރުން އުވާލަން ނިންމާފައިވާ ކުންފުނިތަކުގެ ލިސްޓުގައި ހިމެނޭ ކުންފުންޏެކެވެ. އެ ގޮތުން މިދިޔަ އަހަރުގެ ތެރޭގައި އެ ކުންފުނީގެ ދަށުގައި ހުރި ހުރިހާ އެއާޕޯޓުތަކާއި އެހެން މުދަލާއި ހިދުމަތް ދިނުމާ އެމްއޭސީއެލްއިން ވަނީ ހަވާލުވެފަ އެވެ.
ކައްދޫ އެއާޕޯޓަކީ ރާއްޖޭގައި ހިންގަމުންދާ ގެއްލުންވާ ގިނަ އެއާޕޯޓުތަކުގެ ތެރެއިން އެއް އެއާޕޯޓެވެ. މިފަދަ އެއާޕޯޓުތަކަށް ދިމާވެފައިވާ މާލީ މައްސަލަތަކަށް ދާއިމީ ހައްލެއް ނުހޯދި އޮތް ނަމަވެސް، ސަރުކާރުން ދަނީ އިތުރު އެއާޕޯޓުތައް ބިނާކުރަން ބޮޑެތި އިންވެސްޓްމަންޓްތަކެއް ކުރަމުންނެވެ.
މިގޮތުން މިހާރުވެސް 16 ވަރަކަށް އެއާޕޯޓެއްގެ މަސައްކަތް އެކި މަރުހަލާތަކުގައި އެބަ ކުރިއަށްދެ އެވެ. މީގެ ތެރެއިން ބައެއް މަޝްރޫއުތަކުގެ އަމަލީ މަސައްކަތް ހުއްޓިފައި އޮތް ނަމަވެސް، ބައެއް ރަށްރަށުގެ އެއާޕޯޓަށް ބޭނުންވާ ބިން ހިއްކުމުގެ މަސައްކަތް ވަނީ ނިމިފަ އެވެ.
އިގްތިސާދީ މާހިރުން ފާހަގަކުރާ ގޮތުގައި، މިހާރު ހުރި އެއާޕޯޓުތަކުން ލިބޭ ގެއްލުން ބޮޑުވަމުންދާއިރު، އިތުރު އެއާޕޯޓުތައް އެޅުމަކީ ދައުލަތުގެ ބަޖެޓަށް އިތުރު ބުރައަކަށް ވެގެންދާނެ ކަމެކެވެ.
