ޔޫކްރެއިންގެ ކީވް ސަރަހައްދުގައި ހުރި ހަތިޔާރު ގުދަނަކަށް ރަޝިއާއިން ދިން ޑްރޯން ހަމަލާއެއްގައި ބާރުގަދަ ގޮވުމެއް ގޮވައި، މަދުވެގެން 37 މީހުން މަރުވެއްޖެ އެވެ.
ފާއިތުވި ދެ މަސްދުވަހުގެ ތެރޭގައި މިފަދަ ދެވަނަ ހާދިސާ ހިނގާފައިވާއިރު، މިކަމުގައި އިހުމާލުވި ފަރާތްތަކަށް އަދަބު ދޭނެ ކަމަށް ރައީސް ވޮލޮޑިމިއާ ޒެލެންސްކީ ވަނީ ވައުދުވެވަޑައިގެންފަ އެވެ.
މިއީ މި އަހަރުގެ ތެރޭގައި ކީވް ސަރަހައްދަށް ރަޝިއާއިން ދިން އެންމެ ނުރައްކާތެރި ހަމަލާ އެވެ. މޮސްކޯއިން ޔޫކްރެއިންގެ ވެރިރަށަށާއި އެ ސަރަހައްދަށް ވައިގެ މަގުން ދެމުންދާ ހަމަލާތައް މެދުނުކެނޑި ތިންވަނަ ދުވަހަކަށް ކުރިއަށްދާއިރު، ބޮޑެތި ގެއްލުންތަކެއް ދަނީ ލިބެމުންނެވެ.
ހުކުރު ދުވަހުގެ ރޭ ދަންވަރު މީލާ އަވަށަށް ދިން މި ހަމަލާގައި އެތައް ބަޔަކު ޒަހަމްވެ، އެ ސަރަހައްދުން އެތައް ސަތޭކަ ބަޔަކު ރައްކާތެރި ހިސާބުތަކަށް ބަދަލުކޮށްފައިވާ ކަމަށް ޒެލެންސްކީ ވިދާޅުވި އެވެ.
މި ހަމަލާގެ ސަބަބުން އެ ސަރަހައްދުގެ އާންމު އުމްރާނީ ވަސީލަތްތަކަށާއި، މީހުން ދިރިއުޅޭ އިމާރާތްތަކުގެ އިތުރުން، އުމުރުން ދުވަސްވީ މީހުންނާއި ނުކުޅެދުންތެރިކަން ހުންނަ މީހުން ބައިތިއްބާ މަރުކަޒަކަށް ވެސް ވަނީ ގެއްލުން ލިބިފަ އެވެ.
މި ހަމަލާއާ ގުޅިގެން އެ ސަރަހައްދުގެ ބޮޑު ބަޔަކަށް އަލިފާން ފެތުރިފައިވާ ކަމަށް އޮފިޝަލުން ވިދާޅުވި އެވެ. މި ހާދިސާގައި މަރުވި މީހުންގެ ތެރޭގައި، އެހީތެރިކަން ފޯރުކޮށްދިނުމަށް އެ ސަރަހައްދަށް ދިޔަ އަވަށްޓެރި އަވަށެއްގެ ވެރިޔާ ވެސް ހިމެނެ އެވެ.
ޒެލެންސްކީ ދެއްވި ވީޑިއޯ މެސެޖެއްގައި ވިދާޅުވީ، މިއީ ވަރަށް ބިރުވެރި ހާލަތެއް ކަމަށާއި، އާންމުން ދިރިއުޅޭ ސަރަހައްދަކާ މިހާ ކައިރީގައި ގޮވާތަކެތި ރައްކާކޮށްފައި ބެހެއްޓުމަކީ އެކަމުގެ ޒިންމާ އުފުލަންޖެހޭ ފަރާތްތަކުން ވީ ވަރަށް ބޮޑު އިހުމާލެއް ކަމަށެވެ.
