ދުންފަތުގެ އިސްތިއުމާލުކުރުން ހުއްޓާލަން ބޭނުންވާ މީހުންނަށް، އެކަމުގައި އެންމެ ބޮޑު އެހީތެރިކަމެއް ލިބެނީ ނިކޮޓިން އެކުލެވޭ އީ-ސިނގިރޭޓު ނުވަތަ ވޭޕް ބޭނުންކުރުމުން ކަމަށް ދިރާސާއަކުން ދައްކައިފި އެވެ.
ގާތްގަނޑަކަށް 30،000 މީހުން ބައިވެރިވި 80 ބޮޑު ދިރާސާއެއް މުތާލިއާކުރުމަށް ފަހު ދިރާސާވެރިން ހާމަކޮށްފައިވާ ގޮތުގައި، ދުންފަތާ ދުރުވުމަށް އާންމުކޮށް ބޭނުންކުރާ ނިކޮޓިން ޕެޗް، ގަމް އަދި އެހެނިހެން އެހީތެރިކަމުގެ ޕްލޭންތަކަށް ވުރެ ނިކޮޓިން ވޭޕް މާ ފައިދާހުރިކަން ވަނީ ފާހަގަކުރެވިފަ އެވެ.
މިގޮތުން، ވޭޕް ބޭނުންކުރުމުން ދުންފަތުގެ އިސްތިއުމާލުކުރުން ހުއްޓާލުމުގެ ފުރުސަތު 60 އިންސައްތަ އިތުރުވެގެންދާއިރު، މީގެ ކުރިން ކޮންމެ 100 މީހަކުން ހަ މީހަކަށް އެކަން ކާމިޔާބުވި ނަމަވެސް، ވޭޕް ބޭނުންކުރުމުން ކޮންމެ 10 މީހަކުން އެކަކަށް އެކަން ކާމިޔާބުވާކަން ވަނީ އެނގިފަ އެވެ.
ނިކޮޓިން ނުހުންނަ ވޭޕްތަކަށް ވުރެ ވެސް ނިކޮޓިން ހުންނަ ވޭޕްތަކުގެ ނަތީޖާ ރަނގަޅުކަމަށް ދިރާސާއިން ދައްކަ އެވެ. ނަމަވެސް، ދިރާސާކުރާ ފަރާތްތަކުން ބުނާ ގޮތުގައި ނިކޮޓިންއަށް ދެވިހިފާފައިވާ މިންވަރު ކުޑަކުރުމަށްޓަކައި، ފަހުން ނިކޮޓިން ނުހުންނަ ވޭޕަށް ބަދަލުވުމަކީ އެހީތެރިވެދޭނެ ކަމެކެވެ.
މީގެ އިތުރުން، އިނގިރޭސިވިލާތުގެ ނޭޝަނަލް ހެލްތު ސާވިސް (އެންއެޗްއެސް) އިން މިހާރު ތައާރަފުކުރަން ފަށާފައިވާ ދުންފަތާ ދުރުވުމަށް އެހީތެރިވެދޭ އާ ބޭހެއް ކަމަށްވާ "ސައިޓިސިން" އަށްވުރެ ވެސް ވޭޕްގެ ނަތީޖާ ރަނގަޅުވުމުގެ ފުރުސަތު އެބައޮތެވެ. ނަމަވެސް މިކަން ކަށަވަރުކުރުމަށް އިތުރު ދިރާސާތައް ބޭނުންވާ ކަމަށް ސައިންސްވެރިން ބުނެ އެވެ.
ވޭޕް ކުރުމަކީ އެއްކޮށް ނުރައްކަލުން ސަލާމަތްވާ ކަމެއް ނޫން ނަމަވެސް، ދުންފަތުގެ އިސްތިއުމާލުކުރުމަށް ވުރެ ވޭޕްކުރުން މާ ރައްކާތެރި ކަމަށް ތަޖުރިބާކާރުން ބުނެ އެވެ.
ތަފާސްހިސާބުތަކުން ދައްކާ ގޮތުގައި، އިނގިރޭސިވިލާތުގައި މިހާރު އާންމު ސިނގިރޭޓު ބޯ މީހުންނަށް ވުރެ، ވޭޕް ނުވަތަ އީ-ސިނގިރޭޓު ބޭނުންކުރާ 16 އަހަރުން މަތީގެ މީހުންގެ އަދަދު ވަނީ އިތުރުވެފަ އެވެ. އެގޮތުން ގާތްގަނޑަކަށް 5.3 މިލިއަން މީހުން ނުވަތަ ބޮޑެތި މީހުންގެ 10 އިންސައްތަ ދުންފަތުގެ އިސްތިއުމާލުކުރާއިރު، 5.4 މިލިއަން މީހުން ކޮންމެ ދުވަހަކު ނުވަތަ ދޭތެރެއަކުން ވޭޕް ބޭނުންކުރެ އެވެ.
މި ދިރާސާގައި ބަލާފައިވަނީ ކޮލިޓީ ހިފެހެއްޓިފައިވާ އަދި ރައްކާތެރިކަމުގެ ހަރުކަށި ގާނޫނުތަކަށް ފެތޭ، ރެގިއުލޭޓް ކުރެވިފައިވާ ވޭޕްތަކުން ލިބެންހުރި އެންމެ ފަހުގެ އަދި އެންމެ އިތުބާރު ހުރި ހެކިތަކަށެވެ.
މި ދިރާސާގައި، "ސްޕައިސް" ނުވަތަ "ޓީއެޗްސީ" ފަދަ ގާނޫނާ ހިލާފު މާއްދާތައް އެކުލެވޭ، ރެގިއުލޭޓް ނުކުރާ އުފެއްދުންތަކަށް ބަލާފައެއް ނުވެ އެވެ.
މި ރިޕޯޓް ތައްޔާރުކުރުމުގައި ބައިވެރިވި ޑރ. ޖޭމީ ހާޓްމަން-ބޯއިސް އިންޒާރު ދެއްވި ގޮތުގައި، ހުއްދަ ނެތް އީ-ސިނގިރޭޓުތަކަކީ ނުރައްކާތެރި އެއްޗަކަށް ވެދާނެ އެވެ. އޭގެ ސަބަބަކީ އޭގައި ހުންނަ ބެޓެރިތަކަކީ ރައްކާތެރި އެއްޗަކަށް ނުވުމާއި، އޭގައި ގެއްލުންދެނިވި ކެމިކަލްތައް ހުރެދާނެތީ އެވެ.
"ދުންފަތުގެ އިސްތިއުމާލުކުރުން ހުއްޓާލުމަށް އީ-ސިނގިރޭޓު ބޭނުންކުރަން ބޭނުންވާ ކޮންމެ މީހަކު ވެސް، އެ ގައުމެއްގެ ކަމާބެހޭ އިދާރާތަކުން ޓެސްޓުކޮށް ހުއްދަ ދީފައިވާ އުފެއްދުންތައް ނޫނީ ގަނެގެން ނުވާނެ،" ޑރ. ޖޭމީ ވިދާޅުވި އެވެ.
ދުންފަތުގެ އިސްތިއުމާލުކުރުން ހުއްޓާލުމަށް އީ-ސިނގިރޭޓު ބޭނުންކުރުމުގެ ސަބަބުން ސިއްހީ ބޮޑު ނުރައްކަލެއް ކުރިމަތިވާކަމުގެ އެއްވެސް ހެއްކެއް މި ދިރާސާއަކުން ނުފެނެ އެވެ.
ނަމަވެސް، ވޭޕްކުރުމުގެ ސަބަބުން ދިގު މުއްދަތުގައި ކުރިމަތިވެދާނެ ސިއްހީ ނުރައްކާތައް އަދިވެސް މުޅިން ސާފެއް ނުވެ އެވެ. އަދި ކުޑަކުދިންނާއި ދުންފަތުގެ އިސްތިއުމާލު ނުކުރާ މީހުން ދުވަހަކުވެސް ވޭޕް ބޭނުންކޮށްގެން ނުވާނެ ކަމަށް އެންއެޗްއެސް އިން ބުނެ އެވެ.
ޑޮކްޓަރުން ވިދާޅުވާ ގޮތުގައި ވޭޕްކުރުމުގެ ސަބަބުން ކުޑަކުދިންގެ ސިއްހަތަށް ގެއްލުންތަކެއް ލިބިދާނެ އެވެ. އެހެންކަމުން ކުޑަކުދިން ވޭޕަށް ޝައުގުވެރިވާ މިންވަރު ކުޑަކުރުމަށް ފިޔަވަޅުތައް އަޅަންޖެހެ އެވެ.
މައުލޫމާތު: ބީބީސީ
