ހުއްދަ ނުނަގައި އަދި ކަނޑައެޅިފައިވާ އެކްސްޗޭންޖު ރޭޓުގައި މެނުވީ ބޭރު ފައިސާ މާރު ކުރުމަކީ ގާނޫނީ ބޮޑު ކުށެއް ކަމަށް ވިދާޅުވެ، މަނީ އެކްސްޗޭންޖު ކުރާ ވިޔަފާރިތަކާއި އާންމުންގެ ބޮލުގައި ހޯމް މިނިސްޓަރު އަލީ އިހުސާން މަނީ ލޯންޑާ ކުރުމުގެ ތުހުމަތު އަޅުވައިފި އެވެ.
ރައީސް އޮފީހުގައި ކުރިއަށްގެންދާ ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން އިހުސާން ވަނީ ހުއްދަ ނުނަގައި ޑޮލަރު އެކްސްޗޭންޖް ކުރާ ފަރާތްތަކުން އާމްދަނީ ހޯދުމާއި އެ އާމްދަނީއިން އެއްވެސް ބޭނުމެއް ކުރުމަކީ މަނީ ލޯންޑާ ކުރުން ކަމަށެވެ.
"ރާއްޖޭގެ ގާނޫނުގައި ބުނާ ގޮތުން ހުއްދަ ނަގައިގެން ކުރަންޖެހޭ ކަމެއް، ހުއްދަ ނުނަގައި ކުރުމަކީ ޖިނާއީ ކުށެއް. މާނައަކީ ހުއްދަ ނުނަގައި މަނީ އެކްސްޗޭންޖް ކުރުމަކީ ޖިނާއީ ކުށެކޭ. އެ ޖިނާއީ ކުށް ކޮށްގެން ހޯދާ ފައިސާ އަމިއްލަ ގޮތުގައި ބޭނުން ކުރުމާއި ވިޔަފާރީގެ ގޮތުގައި ބޭނުން ކުރުމާއި އޭގެ އިތުރު ފައިދާ ހޯދުމަކީ ރާއްޖޭގެ ގާނޫނުގައި މިވަގުތު ބުނާ ގޮތުން މަނީ ލޯންޑަރިން،" އިހުސާން ވިދާޅުވި އެވެ.
އިހުސާން ވިދާޅުވީ ހުއްދަ ނުހޯދާ މަނީ އެކްސްޗޭންޖު ކުރާ ފަރާތްތަކަށް ޑޮލަރު ދެނީ ރިސޯޓުތަކުންނާއި ޑޮލަރުން އާމްދަނީ ލިބޭ މީހުން ކަމަށެވެ.
"އަޅުގަނޑުމެން މި ބެލީ ކޮން ބައެއްތޯ މި މީހުންނަށް ބޭރު ފައިސާ ދެނީ އެކްސްޗޭންޖް ކުރުމުގެ ބޭނުމަށްޓަކައި. ބަލާލިއިރު މީގެ ތެރޭގައި މި ހިމެނެނީ ދިވެހިރާއްޖޭގައި ޑޮލަރުން އާމްދަނީ ހޯދާ ފަރާތްތައް. އަންފޯޗުނޭޓްލީ މީގެ ތެރޭގައި އަޅުގަނޑުމެންނަށް ފާހަގަ ކުރެވޭ ރާއްޖޭގެ މަޝްހޫރު ރިސޯޓުތައް.
މިއަދުގެ ނޫސްވެރިންގެ ބައްދަލުވުމުގައި އިހުސާން ވަނީ، ޑޮލަރުން އާމްދަނީ ލިބޭ ފަރާތްތައް ވަރަށް ބޮޑަށް ކުށްވެރި ކުރައްވައި ވާހަކަ ދައްކަވައިފަ އެވެ.
"ހުއްދަ ނުނަގާ ޑޮލަރު އެކްސްޗޭންޖް ކުރުމަކީ ރާއްޖޭގެ ގާނޫނުގައި ޖިނާއީ ކުށެއް އެއީ. ވަކިވަކި ފަރުދުން ވެސް އެބަ ހިމެނޭ މީގެ ތެރޭގައި އިނގޭތޯ؟ މިސާލަކަށް އަޅުގަނޑަށް މުސާރަ ލިބެނީ ޑޮލަރުން އަޅުގަނޑު އަނެއްކާ ކަޅު ބާޒާރަށް ޑޮލަރު ވިއްކަނީ. އެއީ ހުއްދަ ނުނަގާ މަނީ ޗޭންޖް ކުރުން އެނގޭތޯ؟ ބައި ޑެފެނިޝަން،" އޭނާ ވިދާޅުވި އެވެ.
