ރައްޔިތުންގެ މަޖިލީހުގެ މެންބަރުންނާއި އެ މެންބަރުންގެ އާއިލާތަކަށް ސާކްގެ ގައުމުތަކާއި އާސިއާންގެ ގައުމުތަކުން ހެލްތު އިންޝޫރެންސް ލިބެންޖެހޭ ކަމަށް ބުނާ ގާނޫނުތައް އުވާލައި ހުރިހާ މެންބަރުންނަށް ވެސް އާންމު ރައްޔިތުންނަށް ލިބޭ ގައުމީ ސިއްހީ އިންޝޫރެންސް އެކަނި ލިބޭ ގޮތަށް ހެދުމަށް ގޮވާލައި ސޮއިކުރަން ފެށި ޕެޓިޝަނާމެދު މަޖިލީހުގެ ތަޅުމުގައި ބަހުސްކުރަން ލާޒިމުވާ އަދަދަށް ސޮއި ހަމަކޮށްފި އެވެ.
މި ޕެޓިޝަން ވެސް ހުށަހެޅީ ސަރުކާރުން ބޭނުންވާ ބަދަލުތައް ހިމަނައި ލާމަރުކަޒީ ގާނޫނަށް ބަދަލު ގެނައުމަށް ހުށަހަޅާފައިވާ ބިލާ ދެކޮޅަށް ޕެޓިޝަން ފެށި ސޯޝަލް މީޑިއާ އެކްޓިވިސްޓު މިދުއަމް ސައުދު އެވެ. ރޭގެ ވަގުތެއްގައި ސޮއިކުރަން ފެށި އެ ޕެޓިޝަންގައި 3015 މީހުން ސޮއިކޮށްފައިވެ އެވެ.
"އާންމު ރައްޔިތުންނަށް ނުލިބޭ ސިއްހީ އިންޝުއަރެންސްއެއް އާންމު ރައްޔިތުންގެ ފައިސާއިން އެ އާންމުން ތަމްސީލް ކުރަން މަޖިލީހަށް ވަޑައިގަންނަވާ މެންބަރުންނަށް ދިނުމަކީ ތަސައްރަފު ފުދިފައިވާ އެއްވެސް ސިޔާސީ ނިޒާމެއް ދަންނަ ކަމެއް ނޫން. އަދި ދިވެހިރާއްޖެއަށް ވުރެ އެތައް ގުނައެއް މުއްސަނދި ގައުމުތަކުންވެސް ކުރާ ކަމެއް ނޫން،" އެ ޕެޓިޝަނުގައި ބުނެފައިވެ އެވެ.
ކޮންމެ މެންބަރަކާއި އެ މެންބަރެއްގެ އަނބިމީހާ/ފިރިމީހާ އަދި އުމުރުން 18 އަހަރު ނުފުރޭ ދަރިން ރާއްޖެއާއި ސާކް ގައުމުތަކާއި އަދި އާސިއާންގެ ގައުމުތަކުން ސިއްހީ ފަރުވާ ލިބޭނެ ފަދަ މެޑިކަލް އިންޝުއަރެންސް ސްކީމެއްގައި ބައިވެރި ކޮށްދޭން ވާނެ ކަމަށް ބުނަނީ މެންބަރުން އިމްތިޔާޒުތަކުގެ ގާނޫނުގަ އެވެ. އެއީ ކުރީގެ މެންބަރުންނަށް ވެސް ހެލްތު އިންޝޫރެންސް ލިބޭ ގާނޫނެވެ.
މަޖިލިސް މެންބަރުންނަށް ލިބޭ ހާއްސަ ހެލްތު އިންޝޫރެންސް ކަނޑާލަން ގޮވާލައި ޕެޓިޝަނެއްގައި ސޮއިކުރަން ފަށައިފި
ރައްޔިތުންގެ މަޖިލީހުގެ މެންބަރުންނަށް ލިބޭ ހާއްސަ ހެލްތު އިންޝޫރެންސް ކަނޑާލައި، އާންމު ރައްޔިތުންނެކޭ އެއްފަދައިން އާސަންދަ އެކަނި ލިބޭ ގޮތަށް ހެދުމަށް ގޮވާލައި ޕެޓިޝަނެއްގައި ސޮއިކުރަން ފަށައިފިއެވެ. މިދުއަމް ސައުދު އިސްވެ ހުށަހެޅި މި ޕެޓިޝަނުގައި މިހާތަނަށް ގިނަ އަދަދެއްގެ ބަޔަކު ސޮއިކޮށްފައިވާއިރު، މީގެ މަގްސަދަކީ ދައުލަތުގެ ފައިސާއިން މެންބަރުންނަށް ދޭ އިތުރު އިނާޔަތްތައް ހުއްޓުވުމެވެ.
މެންބަރުންގެ މެޑިކަލް އިންޝޫރެންސްގެ މައްސަލައިގައި އަބަދުވެސް އާންމު ރައްޔިތުންގެ ފާޑުކިޔުން އަމާޒުވެ އެވެ. މެންބަރުންނަށް ވަކި ހާއްސަ އިންޝޫރެންސް ސްކީމެއް އޮވެގެން ނުވާނެ ކަމަށް ގިނަ ބަޔަކު ގަބޫލުކުރެ އެވެ.
މަޖިލިސް ގަވާއިދުގައި ބަޔާން ކޮށްފައިވާ ގޮތުން، ދިވެހިރާޢްޖޭގެ އާބާދީގެ 0.2 އިންސައްތަ މީހުން ސޮއިކުރާ ޕެޓިޝަނެއް ހުށަހެޅޭނީ މަޖިލީހުގެ ކޮމިޓީއަށެވެ. ތަޅުމުގައި ބަހުސްކުރަން ލާޒިމު ވާނީ ރާއްޖޭގެ އާބާދީގެ 0.5 ޕަސެންޓު މީހުން ސޮއިކުރާ ޕެޓިޝަންތަކާ ގުޅޭގޮތުންނެވެ. ރާއްޖޭގެ މިހާރުގެ އާބާދީގެ 0.5 ޕަސެންޓު މީހުންނަކީ 840 އެވެ. 0.5 ޕަސެންޓަކީ 2100 އެވެ.
މަޖިލިސް ގަވާއިދުގައި ބަޔާންކޮށްފައިވާ ގޮތުން، ދެވަނަ ތްރެޝްހޯލްޑް ހަމަވާ މިންވަރަށް ޕެޓިޝަނަކަށް ސޮއި ހަމަކޮށްފި ނަމަ، އެ ޕެޓިޝަނެއް، މަޖިލީހުގެ ޕެޓިޝަން ކޮމިޓީއަށް ލިބޭތާ މަދުވެގެން ދެ ދުވަހުގެ ތެރޭގައި އެ ޕެޓިޝަނާ ގުޅޭގޮތުން ކޮމިޓީގެ ފުރަތަމަ ބައްދަލުވުން ބާއްވައި އެ ޕެޓިޝަން ސަރުކާރުގެ ސަމާލުކަމަށް ގެންނަންޖެހޭނެ އެވެ. އަދި، އެ ޕެޓިޝަނާމެދު މަޖިލީހުގެ ތަޅުމުގައި ބަހުސް ކުރުމަށްޓަކައި، މަޖިލީހުގެ ރައީސްއަށް އެ ޕެޓިޝަން ފޮނުވަންޖެހޭނެ އެވެ.
އޭގެ އިތުރުން، ޕެޓިޝަނެއް ސަރުކާރުގެ ސަމާލުކަމަށް ގެންނަތާ ގިނަވެގެން 30 ދުވަހުގެ ތެރޭގައި އެ ޕެޓިޝަނަކާ ގުޅޭގޮތުން ސަރުކާރުން ދެކޭގޮތް ހާމަކުރުމުގެ އިތުރުން، އެ ޕެޓިޝަނެއްގައިވާ ކަންކަމަށް ހައްލެއް ގަނައުމުގެ ގޮތުން ސަރުކާރުން އެޅުމަށް ނިންމާފައިވާ ފިޔަވަޅުތައް މަޖިލީހަށް ފޮނުވަންވާނެ ކަމަށް ވެސް މަޖިލިސް ގަވާއިދުގައި ބަޔާންކޮށްފައިވެ އެވެ.
އެ 30 ދުވަސް ގުނާނީ ރަސްމީ ބަންދު ދުވަސްތައް ނުހިމަނައި ކަމަށް އެ މާއްދާގައި ބަޔާންކޮށްފައި އޮވެ އެވެ.
