ރާއްޖެއިން ބޭރުގެ ކޮންޓްރެކްޓަރުންގެ އަތުން ވިތުހޯލްޑިން ޓެކްސްގެ ގޮތުގައި ނަގާ އަދަދު އިތުރުކުރަން އިންކަމް ޓެކްސް ނެގުމުގެ ގާނޫނަށް އިސްލާހެއް ރައްޔިތުންގެ މަޖިލީހަށް ހުށަހަޅައިފި އެވެ.
ރާއްޖޭގައި ވަޒަންވެރިވެފައިނުވާ ކޮންޓްރެކްޓަރުންގެ އަތުން ވިތުހޯލްޑިން ޓެކްސްގެ ގޮތުގައި ނަގާ އަދަދު އިތުރުކުރަން ގާނޫނަށް އިސްލާހު ހުށަހެޅުއްވީ މަތިވެރި ދާއިރާގެ މެންބަރު، ހަސަން ޒަރީރު އެވެ.
އޭނާ ހުށަހެޅުއްވި އިސްލާހުގައި ވަނީ ރާއްޖޭގައި ވަޒަންވެރިވެފައިނުވާ ކޮންޓްރެކްޓަރަކަށް ދައްކާ ފައިސާގެ ޖުމުލައިން ވިތުހޯލްޑިން ޓެކުހުގެ ގޮތުގައި އުނިކުރުމަށް ކަނޑައަޅާފައިވާ ފަސް ޕަސެންޓުގެ ބަދަލުގައި އެ އަދަދު 10 ޕަސެންޓަށް އިތުރު ކުރުމަށެވެ.
އަދި، އެ އަދަދަކީ އެ ކޮންޓްރެކްޓަރުންގެ އަތުން ނަގާ ފައިނަލް ޓެކުހުގެ ގޮތުގައި ކަނޑައެޅުމަށް ވެސް އެ އިސްލާހުގައި ބަޔާންކޮށްފައިވެ އެވެ.
އެ އިސްލާހުގައި ދިވެހިރާއްޖޭގައި ވަޒަންވެރިވެފައި ނުވާ ކޮންޓްރެކްޓަރެއްގެ ގޮތުގައި މާނަކޮށްފައި ވަނީ ރާއްޖޭގައި ވަޒަންވެރިވެފައި ނުވާ އަދި، މުވައްޒަފެއްގެ ގޮތުގައި ނޫން ގޮތަކަށް ކޮންޓްރެކްޓެއް ނުވަތަ އެއްބަސްވުމެއް ނުވަތަ އެހެން އިންތިޒާމެއްގެ ދަށުން ރާއްޖޭގައި އެއްވެސް ބާވަތެއްގެ މުދަލެއް ނުވަތަ ހިދުމަތެއް ފޯރުކޮށްދޭ ފަރާތްތަކާއި އެހެން ފަރާތެއްގެ މުދަލެއް ނުވަތަ ހިދުމަތެއް ރާއްޖޭގައި ފޯރުކޮށްދޭ ނުވަތަ ދިވެހިރާއްޖޭގައި ފޯރުކޮށްދިނުމުގެ ހުއްދަ ދޭ ފަރާތަކަށެވެ.
އިންކަމް ޓެކްސްގެ ގާނޫނަށް އެ ބަދަލު ގެނައުމާއެކު، އެވަރެޖުކޮށް ދައުލަތުގެ އާމްދަނީ 251 މިލިއަން ރުފިޔާއިން އިތުރުވާނެ ކަމަށް މޯލްޑިވްސް އިންލެންޑް ރެވެނިއު އޮތޯތިޓީއާ ހަވާލާދީ އެ އިސްލާހާއެކު ހުށަހަޅާފައިވާ ކޮސްޓް އެސްޓިމޭޓުގައި ބަޔާންކޮށްފައިވެ އެވެ.
